Müsahibə
“Artıq özüm üçün təqvim hazırlamışdım” – Peyman Babayi
“Sumqayıt”ın futbolçusu Peyman Babayi koronavirus pandemiyasına görə tətbiq olunan karantin günlərindəki durumu ilə bağlı futbolinfo.az saytının suallarını cavablandırıb:
– Hazırda vəziyyətin necədir, özünü necə hiss edirsən?
– Evdəyəm, heç bir işlə məşğul deyiləm. Gözləyirik ki, bunun sonu necə olacaq. Sağlam insanam, amma evdə qalmaq xəstəliyinə tutulmuşam.
– İranla əlaqə saxlayırsan? Orda son vəziyyət necədir?
– Vəziyyət orada daha yaxşıdır. İnsanların küçəyə çıxmasına icazə verilib. Bu sevindirici haldır və pandemiyaya görə yaranmış vəziyyətin aradan qaldırılması üçün böyük addımlardır.
– Mayın 4-dən sonra klubların məşqlərə başlayacağı gözlənilirdi. Amma bu, baş vermədi. Belə vəziyyətin davam etməsinə üzüldünüz?
– Eşitmişdik ki, mayın 4-dən sonra karantin qaydaları aradan qaldırılacaq və məşqlərə başlayacağıq. Buna görə də mən özüm üçün təqvim hazırlamışdım. Yemək, yatmaq və məşq proqramlarını qurmuşdum. Rahatlıqla məşqlərə başlamaq barədə düşünürdüm. Lakin dünən eşitdim ki, karantin uzadılacaq. Bu gün də danışdım və deyildi ki, mayın 11-nə qədər karantin uzadılacaq və bundan sonra qərar veriləcək. Bildiyiniz kimi, bu istənilən idmançı üçün çətin günlərdir. Bilmirəm ki, nə edim. Nə yeyib-içməyimizi, nə məşqimizi dəqiq bilirik. Hal-hazırda bilmirik ki, nə edək. Uşaqlarla da danışırıq ki, səbr etməliyik. Qaydalara riayət etmək lazımdır. Bir qərar verilsə, futbolçular üçün də hər şey bəlli olar. Düzdür, birinci insan sağlamlığıdır, amma biz də qərar gözləyirik.
– Karantinin daha çox uzadılması futbolçulara hansı tərəfdən daha çox təsir edəcək?
– Bütün idmançılar onlayn məşq edir və bunun heç bir təsiri olmadığını düşünürəm. Başımız qarışsın deyə məşq edirik. Çünki meydanda məşq etmək tamamilə fərqlidir. Ordakı effekti almaq mümkün deyil. Əsas sağlamlıqdır.
– Çempionat belə başa çatsa, siz Avropa Liqasına yollana bilərsiniz. Lakin başlasa, bu yolda digər klublarla mübarizə aparacaqsız. Sizcə, hansı daha yaxşıdır?
– Bunu bilirəm. Çempionat başlayandan biz ciddi mübarizə aparmışıq. “Sumqayıt” komandası mübarizəni sevir. İstəyərdik ki, Premyer Liqa başlasın və biz meydanda mübarizə aparaq. Son aylarda da yaxşı çıxış edirdik. Açığı, mübarizəyə sevinərəm, belə şəkildə Avropa Liqasına getməyə yox. Bizim heç bir şey fərq etməz. Belə bir şey deyim ki, çempionatın davam etdirilməsinə futbolun başladığına görə sevinərik. Lakin sağlamlığımızdan ötrü ləğvinə qərar verilsə, buna da sevinərik.
AĞA