Ölkə futbolu
B kateqoriyalı məşqçi Premyer Liqa klubunda: onun “problem”ini qadın komandasının məşqçisi həll edəcək
Yerli məşqçilərin iş başında olmasının tərəfdarıyıq. Ölkədə kifayət qədər bacarıqlı mütəxəssis var və onlara özünü sübut etmək üçün şans verilmədiyi halda, əcnəbilərə qucaq açılmasının həmişə əleyhidarı olmuşuq.
Eyni zamanda veteran futbolçulara dəstək verilməsini, işlə təmin edilməsini arzulamışıq. Amma bəzən AFFA bu arzulardan sui-istifadə etməklə sözəbaxan kadrlarına layiq olmadığı etimadı göstərir. Necə ki, Cavid Hüseynovu “Şamaxı”ya baş məşqçi göndərməklə buna cəhd edirlər.
Cavid bacarıqlı futbolçularımızdan olub, hörmətə layiq insandı. Amma “yaxşı oğlan” peşə deyil, işi bacaranlara tapşırmaq lazımdı. AFFA-da at oynatmağa başlayan day-daylı Cahangir Həsənzadənin dəstəsinə daxil olmaq vəzifə sahibi olmaq üçün yetərli olmamalıdı. Peşəkar futbolun öz tələbləri var.
Həsənzadə zatən Müşahidə Şurasının üzvü olduğu “Səbail”də birinci dərəcəli idarəçidi. AFFA-nın texniki direktorunun eyni zamanda başqa klubun daxili işlərinə müdaxilə etməsi, özünü vitse-prezident Elxan Məmmədovun adamı kimi yuxarıdan aparması yolverilməzdi. Onun “Şamaxı” rəhbərliyinə Hüseynovu təklif etməsi, hətta israrçı olması diqqətə alınmalı, səbəbi araşdırılmalıdı. Həsənzadənin adamı olması, AFFA-dan göndərilməsi Cavid bəyin baş məşqçi təyin olunması üçün yetərli amildimi?
Azərbaycanda 50-dən çox PRO kateqoriyalı məşqçi var və onların mütləq əksəriyyəti işsizdi. Onların çoxu məhz AFFA-nın təşkil etdiyi məşqçi kurslarında bu lisenziyaya sahib olub. Lakin Premyer Liqa klubuna məşqçi təyin etmək lazım gələn kimi onlar yox, hətta A kateqoriyası da olmayan, hazırda B-yə sahib olan Cavid Hüseynov yada düşüb. Əcəba, niyə?
Azərbaycan Premyer Liqasında baş məşqçi işləmək üçün PRO kateqoriyasına malik olmaq mütləq şərtdi. İstisna kimi bu kateqoriyanı almaq üçün təlimlərə qoşulmaq, imtahanlara hazırlaşmaq lazımdı. Lakin Hüseynovun belə şansı da yoxdu, çünki o, hələ A kateqoriyasını almaq üçün bir il işləməlidi. Deməli, Hüseynov yalnız 2023-cü ildə A-nı ala, daha sonra PRO-ya hazırlaşa bilər. Belədə o, “Şamaxı”ya necə rəhbərlik edəcək?
AFFA-nın “fədakar planquranları” buna da çarə tapıb. Belə ki, Hüseynov “Şamaxı”da fəaliyyətə başlayan kimi ona PRO kateqoriyalı köməkçi göndəriləcək və protokolda məhz onun adı qeyd olunacaq, beləliklə, Əsanamə tələbləri yerinə yetiriləcək.
Həmin köməkçi də bəllidi. Belə ki, kişilərdən ibarət (!) “Şamaxı” klubuna 10 ildən çoxdu qadın komandaları ilə işləyən (!), hətta burada da heç bir uğurun sahibi olmayan Vüqar Əsgərli köməkçi-məşqçi kimi göndəriləcək.
Kəsəsi, yolunu bir müddət öncə həbsxanadan da salmış Cavid Hüseynovun himayədarları tərəfindən vəzifəyə gətirilməksi üçün hər cür ssenari oynanılır. “Şamaxı” AFFA-nın oyuncaq klubu kimi ortada qalıb, büdcəsi, vəzifələri bölüşdürülür.
Bu təyinat hələ rəsmiləşməyib, mətbuatda tirajlanıb, təkzib də edilməyib. Ümid edirik ki, rəsmi qərarı veərndə bu amilləri nəzərə alıb əyləcə basacaqlar…
CAVAD
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”