Güclülər qarşısında aciz “Barselona” və Bellingem fenomeni

Növbəti “El-Klassiko” geridə qaldı. Uzun illər dünyanın bir nömrəli futbol qarşılaşması hesab edilən görüş statusunu itirmək üzrədir. Bunun da bir neçə səbəbi var. Ən başlıca səbəblərdən biri, artıq Ronaldo – Messi rəqabətinin olmamasıdır. Əfsanələr sanki bir-birilərindən bezmiş kimi dünyanın müxtəlif səmtlərinə yollanıblar.

Başqa bir səbəb son illərdə İngiltərə Premyer Liqasının böyük maliyyə hesabına La Liqanı kölgədə qoymasıdır. Doğrudur, Avropa kuboklarında “Real” yenə də ingilislərə tez-tez futbol dərsi keçir. Amma bunu “Barselona” haqda söyləmək olmaz. Kataloniya klubu bütün böyük komandalara xas durğunluq dövründədir. Uzun illik hegemonluqdan sonra bir qədər tənəzzül normaldır.

Əslində, komandanın indi də potensialı yüksəkdir, heyəti dünyanın ən güclülərindən biridir. Lakin nəticələr buna uyğun sayıla bilməz. Yayda imicin və nüfuzun sayəsində bir neçə futbolçunun gəlişi də vəziyyəti dəyişməyib. İndiki “Barselona” keçən mövsümkünün bənzəridir. Yenə də qol vurmaq problemi , sönük qələbələr və güclü komandalar qarşısında acizlik. Katalon klubunun gücü yalnız İspaniyanın ortabab komandalarına çatır.

Bunun səbəblərini axtarmaq fikrimiz olmasa da, başlıca günahkar kimi baş məşqçini söyləyə bilərik. Xavidə güclü baş məşqçi olmaq üçün hər bir şey var, Qvardiola kimi bir dahinin komandasında əsas hərəkətverici qüvvələrdən biri olub, İspaniya millisinin heyətində bütün titulları qazanıb, futbolçu kimi oyunu oxumaq kimi keyfiyyəti ilə seçilib. O, baş məşqçilik təcrübəsini təzyiq olmayan bir ölkədə qazanıb, komandada ona hər şey doğma  və məlumdur, lakin qurduğu oyun nəticə vermir. Ola bilsin ki, nəvaxtsa Xavi nəticələri ilə hər kəsi susdura biləcək. Ancaq indi onun komandaya xeyri dəymir. Doğrudur, gənc futbolçuları meydana buraxır, onlara etimad göstərir. Lakin bu gənc futbolçuların inkişafının sürətlə getdiyini söyləmək olmaz. “Barselona”da Xaviyə qədər də hər il bir məktəbli əsas heyətdə meydana çıxıb özünü dünyaya göstərirdi. Onlardan əksəriyyəti elə perspektiv vəd edən kimi də qalırdı. Yəni, bu mənada Xavinin rolu güclü deyil. Futbol həvəskarları, Boyan Krkiçdən Yamin Lamala qədər katalon klubunda istedad damğası vurulan onlarla futbolçu görüb. Əsas olan onların sonrakı karyerasıdır.

“Barselona”nın fonunda “Kral Klubu” sabitlik və əzəmət rəmzidir. Florentino Peres özünə bənzəməyən tərzdə təmkin nümayiş etdirməklə komandanın inkişafına nail olur. Bu gün “Real”ın heyətində bazar qiyməti 100 milyondan çox bir neçə futbolçu var. Onların hər biri inkişaf etməkdə davam edirlər. Ən vacibi isə komandanın ağrısız gəncləşdirilməsidir. Modriç və Kross erası geridə qalıb, onların gənclərlə əvəz edilməsi təsirsiz keçir. Benzemanı da artıq demək olar ki, heç kim xatırlamır. Bunun da səbəbi Cud Bellingemdir.

Çoxdandır ki, İngiltərədən belə futbolçu çıxmayıb. Hətta deyərdik ki, bugünə qədər İngiltərədə belə futbolçu olmayıb. Gənc yarımmüdafiəçi mövsümə elə başlayıb ki, yüksələn templə davam edəcəyini təsəvvür belə etmək qorxuludur. Göstərdiyi futbol elə səviyyəyə qalxıb ki, bundan artığının mümkünlüyü inandırıcı görünmür.

Barselonadakı oyunun da taleyini həll edənlərdən biri Bellingem oldu. Burada Karlo Ançelottinin əvəzetmələrini də qeyd edilməlidir. Cəmi bir dəyişiklik etməsinə baxmayaraq, oyun tamamilə dəyişdi. Kamavinqanın meydana çıxmasına qarşı tərəf cavab verə bilmədi. Nəzərə almaq lazımdır ki, bu gün “Real”ın oyunu elə də alınmırdı. Lakin ikinci hissədə madridlilərin oyunun axarını necə dəyişdiyi heyrətamizdir. Bellingemin fantastik qolu bunun məntiqi nəticəsi idi. Hesab bərabərləşdikdən sonra “Barselona” ortabab komandaya çevrildi. Hiss olunan odur ki, komanda zərbələri qəbul edə bilmir. Bunun da başlıca günahkarı baş məşqçidir. Dəyişikliklər də bir nəticə vermədi. Xavi zədəsini sağaltmış Levandovski ilə Rafinyanı meydana buraxsa da, “Real”ın qarşısını ala bilmədi.

Növbəti “El-Klassiko” madridlilərin qələbəsi ilə nəticələndi. Çox ciddi əziyyət çəkmədən qalib gəlməsi “Barselona”nın keçən mövsümki çempionluğuna da kölgə salır. “El-Klassiko” əzəmətini itirib. Lakin “Real”da peyda olan ulduzlar qarşıdurmanın yenidən əzəmətli olacağından xəbər verir. Qalır , katalonların düşərgəsində superulduzun ortaya çıxması.

P.S.: Azərbaycan futbol azarkeşi yenə də “El-Klassiko”suz qaldı. Ölkədə iki idman kanalı və xarici çempionatları ekrana gətirən İTV var.

İLQAR AĞAYEV