“Benfika” Cəlalı “InStat”la seçib

“Zirə”nin futbolçusu Cəlal Hüseynov tezliklə Portuqaliyaya yollanacaq. Bu ölkənin ən məşhur klublarından olan “Benfika”dan rəsmi təklif almış mərkəz müdafiəçisi 10 gün baxışda olmalıdı.

Portuqaliyalılar futbolçumuzu hansısa menecerin təklifi ilə yox, özləri seçib. Müdafiəçinin “InStat” göstəricilərini araşdıran Lissabon klubunun skautları Cəlalı bəyənib. 18 yaşlı müdafiəçi üçün qəsəbə təmsilçisinə rəsmi məktub göndərilib və o, baxışa çağırılıb.

Hazırda futbolçunun sənəd problemi yoluna qoyulur. Bu gün Hüseynov viza məsələlərini həll etməli və teziklə Portuqaliyaya getməlidi. “Zirə” bu mövsüm əsas heyətdə də meydana çıxmış yetirməsinə əngəl törətməyəcək. 2019-cu ilin yayında əsas komandaya götürülən, baş məşqçi Rəşad Sadıqovun bu mövsümün VII turu çərçivəsində “Qarabağ”la oyunda (0:0) debütünə imkan yaratdığı müdafiəçi bəyənilsə, “Benfika”yla danışıqlar start götürəcək.

“Zirə” akademiyası bugünədək yetirmələri ilə yetərincə öyünə bilməyib. Amma belə istedadlı futbolçu yetişibsə, deməli, işlər heç də pis qurulmayıb. İndi qalır futboçunun özünü isbatlaması.

U-19 millimizin üzvünün “Benfika”nın əsas komandasına düşməsi real deyil, çox güman, bəyənilsə, əvəzedici heyətə götürüləcək. Lakin hətta bu fakt da onun karyerası baxımından çox önəmlidi, formasına diqqət etsə, inkişafı üçün daha yaxşı fürsət qazanacaq.

Xatırladaq ki, bir çox futbolçumuz Portuqaliya klublarında çıxış edib. Vəli Qasımov sovet futbol məktəbinin yetirməsi kimi çığır açıbsa, Emin Mahmudov, Kamran Ağayev, Elnur Cəfərov yaxın illərdə bu ölkədə qısa müddət çıxış edib. Lakin “Boavişta”, “Tondela” kimi klublardan fərqli olaraq, “Sportinq”lə müqavilə bağlamış Budaq Nəsirov yaddaşlarda daha çox qalıb. Lissabon təmsilçisinin B komandasına götürülən yarımmüdafiəçi təəssüf ki, səhlənkar davranışı üzündən ümidi doğrultmadı və Portuqaliyadan qayıdandan sonra ümumiyyətlə, heç kimə lazım olmadı.

Cəlalın müsbət mənada fərqlənəcəyinə ümid edirik. Həm yaşı, həm də xarakteri onun haqqında nikbin danışmağa imkan verir. Bəlkə də o, Azərbaycanın ən bahalı transferinə səbəkar olacaq?!

FƏRİD