Ölkə futbolu
Birgünlük liderin tapıntısı
Premyer Liqada yeni lider var. Mövsümə məğlubiyyətlə başlayan “Sumqayıt” indi hamıya yuxarıdan aşağı baxır. Ardıcıl 2 önəmli qələbə Ayxan Abbasovun yetirmələrinə belə imkan yaradıb.
Düzdü, bu liderlik cəmi bircə sutka çəkə bilər. Çünki “kimyaçılar” rəqiblərindən daha çox oyun keçirib. Bugünkü nəticələrdən asılı olaraq, “Qarabağ” və “Zirə”nin onları zirvədən endirməsi, “Neftçi”ylə “Sabah”ın “Sumqayıt”a çatmaq imkanı var. Lakin istənilən halda, hazırkı liderin 3-cü turu ilk “3-lük”də bitirəcəyi dəqiqdi.
Nəticə təsadüfi deyil. “Sumqayıt” hazırda çempionatın ən yaxşı oyun sərgiləyən kollektivlərindən biridi. Heyətdəki ciddi islahatlardan, lider oyunçuların getməsindən sonra toparlanmaq asan deyildi, amma sumqayıtlılar bunu bacardı. Təkcə toplanan xallara görə komandya qiymət vermək doğru deyil. Əsas odur ki, məzmunlu, baxımlı oyun var, adlar dəyişsə də, seçilmiş dəst-xətt qorunub.
Hələlik xalsız qalan yeganə komanda olan “Səbail” əvvəlki matçlarda olduğu kimi, yenə döyüşkənliyi ilə yadda qaldı. Gəl ki, döyüşməyə görə xal vermirlər. Heyətdə ciddi boşluqlar var, “Sumqayıt” kimi inadkar komandalar bunu bağışlamır. Oyunçu çatışmazlığı azmış kimi, Hendrik Ekşteynin düşərgədən qaçması, Rahid Əmirquliyevin zədələnməsi Aftandil Hacıyevin qayğılarını daha da artırıb. Əfran İsmayılov kimi hazır olmayan, oyun ərzində daha çox rəqibə ötürmə etməklə yadda qalan birinə start heyətdə yer verilirsə, deməli, çarəsizlikdi. Baxmayaraq ki, komandanın bərabərlik qolu məhz bu oyunçunun təcrübəsi, künc zərbəsindən ötürməsi sayəsində vuruldu.
“Sumqayıt”ın qolları isə komanda oyununun nəticəsi idi. Hesab açılarkən müasir futbolda rast gəlinən nümunəni gördük. Belə ki, sol cinah müdafiəçisinin asmasını onun sağdakı həmkarı tamamladı. Əli Qurbani isə əla kombinasiyanı qol intuisiyası yüksək forvardlara xas şəkildə yekunlaşdırdı. İranlı çempionatımız üçün əsl tapıntıdı, artıq bombardirlər yarışında zirvəyə əyləşdi, bu gedişlə onun çox qolunu görəcəyik. 3 oyuna 3 qol əla statistikadı.
Turun açılış matçına gəlincə, heç-heçə ədalətli nəticə idi. Hələlik top buraxmayan “Keşlə” ardıcıl ikinci heç-heçəsini etdi. “Qəbələ” isə ötən turdakı darmadağından sonra xalını 2-yə çatdırmağı bacardı.
Matç fərqli hissələrlə yadda qaldı. Fasiləyədək meydanda dominatlıq edən “Qəbələ” xüsusilə orta sahədə rəqibi aşkar şəkildə üstələmişdi. Lakin fasilədə Yunis Hüseynovun etdiyi əvəzetmə işə yaradı. Con Kamaranın əvəzinə meydana çıxan Alvaro Tavares qüvvələr nisbətini qonaqların xeyrinə dəyişdi. Ardıcıl qol epizodları yaradan “Keşlə”yə məsuliyyətsiz hərəkətinə görə qırmızı vərəqə alan Nikolas Raysel də yardımçı oldu. Bunadək meydana çıxan Cavid Hüseynov oyuna ağırlığını qoymağa, paytaxt təmsilçisinə çətinlik yaratmağa başlamıdı. Gəl ki, ev sahibləri məcburi əvəzetməylə hesabı qorumaq yolunu seçdi və buna nail oldular.
Ümumi götürdükdə hər iki oyun maraqlı alındı. Qol sayı fərqli olsa da, hər iki oyun həm sürətinə, həm epizod bolluğuna görə seçildi. Komandaların yavaş-yavaş formaya düşdüyü, uzun fasilədən sonra temp yaxalamaq istədiyi sezilirdi. Hələlik bunu ən yaxşı bacaran “Sumqayıt”dı, lakin etibarlı müdafiəsi olan “Keşlə”nin də mövsümün favoritlərindən olduğunu qeyd etməliyik. Bakılılar yaradılan qol epizodlarından yararlanma faizini yüksəldə bilsə, hətta “Qarabağ”a da problem yaradacaq.
AĞA
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?