Ölkə futbolu
Daha yaxşısına ümid verən oyun, layiqli qələbə
“Qarabağ” daha bir çətin rəqiblə oyunda layiqli qələbə qazandı. Bu, həm də avrokuboklar mövsümündə ikinci dəfə yeni ilə adlayan ağdamlıların ilk uğuru oldu.
“Gent” kifayət qədər möhkəm komandadır. Sıx müdafiə olunan rəqiblə görüşdə intizamlı oynamağı bacaran təmsilçimiz çoxsaylı şanslardan yalnız birini qola çevirsə də, qələbə qələbədir. Bakıda heç vaxt belçikalılara uduzmayan “atlılar”ın seriyanı davam etdirməsi müsbət məqamdır.
Kadi Borges və Ovusu Kvabenanın gedişindən sonra hücum xətti nisbətən dişsiz olan “Qarabağ”ın xüsusilə sağ cinahında axsama görünürdü. Belədə təkqanad “uçmağa” məcbur olan meydan sahiblərini zərərsizləşdirmək rəqib üçün asan idi. Elvin Cəfərquliyevlə Abdullah Zubir hər nə qədər fəal olsa da, dayaq oyunçuları ilə müdafiəçilərin mühasirəsindən çıxa bilmirdi.
Təsadüfi deyil, qol Qurban Qurbanovun bunu görərək etdiyi dəyişikliklərdən sonra vuruldu. Adama Diakabi sağ cinahı canlandırdı, Ramil Şeydayev hücumda ikən rəqib müdafiəsinə daha çox problem yaratdı. Belə məqamlarda orta sahənin hücuma dəstəyi vacibdir. Marko Yankoviç bu baxımdan əla oynadı – məhz o, standart ötürmələri unudub fərqli qərar qəbul etdi və hesab açıldı.
Düzdür, bunadək “Qarabağ” penalti qazanmış, Şeydayev uğursuz zərbə ilə “seçilmişdi”. Amma həmin epizod da daha çox rəqib müdafiəçinin fərdi səhvi və “Qarabağ”ın bəxtinin gətirməsi sayəsində reallaşmışdı.
Qurbanovun ən yaxşı qərarı qapını Luka Quqeşaşviliyə tapşırması idi. Gürcü qapıçı fövqəladə bir şey etmədi, amma müdafiəçilər arxada təcrübəli birinin olduğunu bilərkən daha inamlı oynayırdı. Çətin ki, Amin Ramazanov eyni güvəni verərdi.
“Qarabağ”ın baş məşqçisinin Qara Qarayevi ehtiyatda saxlayıb Romaonu oynatması pressinqi yaxşı bacaran rəqibə qarşı əla gediş idi. Braziliyalı fiziki gücü və cüssəsi hesabına əksər ikili mübarizələri uddu, bəzən cəsarətli, kəskin ötürmələrlə diqqət çəkdi. Komanda bir az da onun sayəsində qüvvəsini 90 dəqiqəyə bölməyi, ikinci hissədə daha üstün oynamağı bacardı.
Ağdamlıların yeni transferləri də yavaş-yavaş “ansambl”a uyğunlaşdıqlarını göstərdi. Diakabinin sürətli reydləri, irəli topdaşıma bacarığı, Benzianın qeyri-standart qərarları maraqlı idi. Onlar tam formaya düşdükdən sonra çətin ki, kimsə Kadini xatırlasın. Cica isə qısa müddətdə göstərdiyi oyunla bəlkə də cavab görüşü üçün start heyəti təmin etdi. Onun tirdən dönən zərbəsi, daha bir məqamda rəqib qapıçıyla üz-üzə qalması ustalığına işarə idi.
Bəli, “Qarabağ” payızdakı ilə müqayisədə nisbətən cansıxıcı futbol oynadı. Amma heyətdəki önəmli itkiləri nəzərə alsaq, bu, gözlənilən idi. Yəqin ki, cavab matçında daha fərqli komanda görəcəyik.
Növbəti mərhələyə adlamaq üçün şanslar hələ də bərabərdir. “Qarabağ” minimum vəzifəni yerinə yetirdi. Belçikada daha yaxşısına nail olmaq üçün imkan var və Qurbanov əyani gördüyü rəqibə qarşı xüsusilə əks-hücumlarda birşeylər fikirləşəcək. Yeni transferlər cavab matçına kimi formasını daha da yaxşılaşdıracaq və məşqçinin seçim imkanlarını artıracaqlar.
“Gent” dünən göstərdi ki, sıradan komanda deyil. Belçikalılar “Qarabağ”ın topasahibolma üstünlüyünü qismən əlindən almaqla təmsilçimizin əsəbləri ilə oynadı. Onlar evdə daha aqressiv oynayacaq və ağdamlıları səfərdə daha çətin sınaq gözləyir. Şans isə… var.
FƏRİD