De Byazinin vida ərəfəsindəki etirafı

Milli komandamızı baş məşqçisi Canni de Byazi də həqiqəti gördü. Onun ölkəmizdən gedişi ərəfəsində dediyi sözlər həqiqətin etirafıdı. Bitən müqaviləsinin uzadılmayacağını bildiyindən açıq danışmağa başlayıb.

İtaliyalı məşqçinin Lüksemburqla oyundan öncəki mətbuat konfransında dilə gətirdikləri reallığın özüdür: “Bizdə cəmi 8 klub var, çoxu da legionerlərə üstünlük verir. Müəyyən layihə hazırlanmalıdır. Bundan sonra inkişafa nail olmaq olar”.

De Byazi iki il boyunca çox yalanlar danışdı, AFFA rəhbərliyini vəziyyətdən çıxarmaq, öz müqaviləsinin davam etməsi üçün fərqli fikirlər söylədi. Ancaq indi illərdi bizim – mətbuatın yazdığını dilə gətirir. Bəli, milli komandaya əcnəbi məşqçi gətirməklə deyil, inkişaf üçün düşünülmüş plan, layihə olmalıdır.

Müqaviləsi bitsin, AFFA-ya bağlılığı qalmasın, hələ ondan başqa etiraflar da eşidəcəyik. Məsələn, deyəcək ki…

…AFFA-nı futbolun inkişafı maraqlandırmır, ona işləməyə imkan verməyiblər;

…Riad Rəfiyev Aleksey İsayevi komisyon haqqını ödəmədiyi üçün milli komandaya çağırmağı qadağan edib;

…Ümumiyyətlə, yığmaya futbolçunu sifarişlə çağırımış;

…Azərbaycanda çoxlu istedadlı futbolçular var, amma AFFA-da istedadlı dələduzlar daha çoxdu.

Müqaviləsindən kimlərin nə qədər qamarladığını və s. mətləbləri də bəlkə açığa çıxardı. Müqaviləsi bitsin, maraqlı müsahibəsi olacaq.