Ölkə futbolu
Elxan Məmmədovun müharibə “təbliğat”ı
Elxan Məmmədov zühur edib. Aylardı izi-tozu görünməyən, Vətən mühaibəsi zamanı çıraqla axtarılarkən də tapılmayan AFFA-nın icraçı vitse-prezidenti yenə fotosessiyalara başlayıb.
Üzə çıxmağın 2 səbəbi ola bilər.
Birincisi, AFFA-nın fəaliyyətindən kəskin narazılığa görə özünü guya işləyirmiş kimi göstərir, ölkə reallıqlarına uyğun kampaniya aparıb, korlanmış imicini təmizləmək istəyir.
İkincisi, yanacağın qiymət artımından sonra SOCAR-ın büdcəsinə gələcək əlavə milyonların qoxusunu alıb, yeni layihələrlə talama missiyasını davam etdirmək, biznesini genişləndirmək niyyətindədi.
Hər iki halda niyyət xarabdı. 14 ildi Azərbaycan futbolunun tarixdəki ən biabırçı duruma düşməsinin səbəbkarı olan bu şəxs yenə manevr edir. Ermənilərin qrup birincisi olduğu tsikldə Azərbaycan yığmasının autsayder olmasının hesabatını vermək əvəzinə, yalanşı şoular düzəldir. Ən pisi odur ki, bunun üçün Vətən müharibəsindən istifadə edir.
AFFA maraqlı bir statistika paylaşıb. Xəbərə inansaq, 44 günlük Qarabağ savaşında 190 futbolçu, 1 məşqçi şəhid olub. Şəhidlərin ən gənci 2002-ci il, ən yaşlı olanı isə 1982-ci il təvəllüdlüdür.
Şəhidlərimizin ruhu qarşısında baş əyir, sonsuz minnətdarlığımızı bildiririk. Peşəsindən asılı olmayaraq, hamısı qürur mənbəyimizdi. Lakin AFFA-nın manipulyasiyasına da göz yuma, şəhidləri hansısa siyahılarına salmalarına, ruhlarını incitmələrinə seyrçi qala bilmərik.
Rəsmi açıqlamada bu şəxslərin AFFA-nın Qeydiyyat sistemində müxtəlif vaxtlarda qeydiyyatdan keçmiş şəxslər olduğu vurğulanıb. Görünür, az qala Azərbaycanın əhalisinin yarısını qeydiyyata salıb, yalançı siyahı formalaşdıran AFFA-nın məqsədi də elə bu imiş. Qurumun mənasız topçiləmə festivallarında 2-3 dəfə topa toxunanlardan tutmuş məktəblərdə idman dərslərinə qatılanlara kimi hamını qeydiyyata alan AFFA öz məqsədi üçün belə çıxarışlar edir.
Ölkədə futbolun kütləviliyini göstərmək istəyənlər kimsəni yanıltmasın – cəmi 13 peşəkar klubumuz var. Bu səbəbdən guya 212 min adamın futbol ailəsində qeydiyyata alınması yalnız ictimaiyyəti aldatmaqdı, şişirtmədi.
8 Premyer Liqa, 5 divizion klubumuz mövcuddu, onların da heç birinin hansısa oyunçusu müharibədə iştirak etməyib. Uşaq liqalarında çıxış edənlərin isə yaşı döyüş iştirakçısı olmağa yetmir. Yalnız Region Liqasında həvəskar səviyyədə oynayan, eləcə də vaxtilə əvəzedici komandalarda çıxış etmiş, lakin karyerasını müxtəlif səbəblərdən erkən bitirmiş bir neçə nəfərin torpaqlarımızın işğaldan azad edilməsi uğrunda canını fəda etdiyini bilirik.
Deməli, AFFA həmin 190 şəhidimizin adından öz məqsədləri üçün istifadə edir. Şəhidlər bir ömür boyu borclu olduğumuz insanlardı. Nəvaxtsa kiminsə adı hansısa səbəbdən AFFA-nın siyahılarına düşübsə, indi bunu kimlərsə özləri üçün reklam imkanına çevirməməlidi. Sağlıqlarında bir gün ağlamadığınız, əksinə, həyatlarını məhv edib, taleyin ümidinə buraxdığınız insanların müqəddəs ruhlarını incitməyin.
AFFA-nın icraçı vitse-prezidenti Elxan Məmmədov Vətəni, şəhidləri düşündüyünü indi yox, 44 günlük savaş zamanı göstərməliydi. Amma nə bir təşəbbüs gördük, nə də hansısa açıqlama. Əksinə, SOCAR-ın milyonlarını xərclədib milli komandaya gətirdiyi Eddi İsrafilov kimi milliləşənlər “erməni dostlarımızın xətrinə dəyə bilmərik” deyib, hətta informasiya döyüşünə də töhfə vermədilər.
Məmmədov Vətən müharibəsinin iştirakçısı, Kütləvi futbol departamentinin əməkdaşı Orxan Mikayıllı ilə AFFA-nın inzibati binasında görüşüb, fotolarını rəsmi sayta yerləşdirib. Müharibədə zabit kimi iştirak etmiş Mahal Məmmədov da torpaqlarımızın işğaldan azad olunmasında əziyyət çəkib. Maraqlıdı, vitse-prezident niyə digər əməkdaşı yada salmayıb? Yoxsa bir neçə ay əvvəl şərt qoyaraq işdən çıxardığı Mətbuat və İctimaiyyətlə Əlaqələr Şöbəsinin işçisinə qarşı etdiyi haqsızlığın xəcalətini çəkir? Axı, “iki işdən birini seçməlisən” tələbini Elxan bəy dost-tanışına yox, yalnız zəhmətiylə yaşayan, Vətənin dar günündə silaha sarılan Mahala şamil etmişdi. Yoxsa cənab zabit fədakarlığı ilə baş katibi utandırıb?
Elxan bəy, fotosessiya edirsizsə, görüşməli olduğunuz birinci adam Fariz Nəcəfovdu. Siz bağ evinizdə top çiləyərkən “Qəbələ”nin prezidenti ən qaynar nöqtələrdə döyüş topu ilə düşmən qırırdı. İlk gündən döyüşdü və heç kimdən təşəkkür gözləmədən sakitcə işinin başına döndü, müharibədən öncə prezidentin çağırışı zamanı könüllü yazılanar siyahısına adını qeyd etdirməklə yalançı vətənpərvərlik edən dostunuz, şərikiniz, “Sumqayıt”ın prezidenti Riad Rəfiyev kimi döyüşlər başlayandan sonra özünü tapşırtdırmadı.
Ümumiyyətlə, Elxan Məmmədovun hansısa müharibə iştirakçısı ilə hətta yanaşı dayanmağa mənəvi haqqı varmı? 28 yaşında AFFA-nın baş katibi postuna yiyələnən, layiq olmadığı hər cür dəstəyi görən bu şəxs hətta hərbi xidmətdə olmayıb. Nə təhsili dövlət çağırışından yayınmağa imkan verir, nə vəzifəsi, nə sağlamlığı. Bəlkə də Məmmədovun hərbi biletinə “yararsız” yazılıb, bəlkə də ən yaxın dostu, sirdaşı “Mamed”in atası, Qərargah rəisi Nəcməddin Sadıkovun sayəsində adı hansısa hərbi hissədə qeydiyyatda olub. Dəqiq olan odur ki, Məmmədovun vizit vərəqində hərbi xidmətdə olduğu dövr sayıla biləcək “boş illər” yoxdu. Fərari olub-olmadığı araşdırılması lazım ikən o, müharibə qəhrəmanı Orxan Mikayıllı ilə yanaşı dayana bilərmi?
CAVAD
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-23 08:00
“Səbail” “Sabah”a uduzsa…
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”