Müsahibə
İqnasio Errera: “Neftçi”yə rəqib olmaq istəmirdim”
2017-ci ilin yanvarından 2018-ci ilin yayına qədər “Neftçi”nin formasını geyinmiş çilili yarımmüdafiəçi İqnasio Erreranın futbolinfo.az saytına müsahibəsi
– Cənubi Amerika ilə yanaşı, Avropa və Asiyada çıxış etmisiniz. Karyeranızdan razısınız?
– Məncə, maraqlı karyeram alındı. Qazaxıstan, Azərbaycan, Cənubi Koreya kimi ölkələrdə oynadım, dünyanın bir çox yerlərini kəşf etdim. Yaşadığım ölkələrin mədəniyyətini öyrəndim, yerli insanların sevgisini qazandım. Bütün bunlar karyeramı bitirdikdən sonra da mənə çox kömək edəcək. Karyeramın əvvəlindən sonuna qədər Çilidə də qala bilərdim. Amma ekzotik ölkələrdə oldum. Bunları həyatımın ən doğru qərarları hesab edirəm.
– Karyeranızın ilyarımını həsr etdiyiniz “Neftçi” dönəmini necə xatırlayırsınız?
– Orada maraqlı vaxtım keçdi. “Neftçi”də həmişə ürəyimi ortaya qoyurdum. Səhv etmirəmsə, 2017-18 mövsümündə komandanın bombardiri oldum. Orada insanlar məni sevirdilər. Komandadan ayrılandan sonra da mesajlar yazırdılar, qayıtmağımı istəyirdilər.
– Amma çempion ola bilmədiniz…
– Etiraf edirəm ki, həmin mövsüm çempion olmağımız qeyri-mümkün idi. Çünki fikrimcə, “Qarabağ” tarixinin ən uğurlu dönəmini keçirirdi. Heyətində möhtəşəm oyunçular var idi və Çempionlar Liqasının qrupuna düşmüşdülər.
– “Neftçi” ilə “Qarabağ”a qarşı, yoxsa “İrtış”ın heyətində “Astana” və “Kayrat”a qarşı oynamaq çətin idi?
– Məncə, “Qarabağ”a qarşı oynamaq daha çətin idi. Axı, onlar daim avrokubokların qruplarında çıxış edirlər. Oyun sistemi baxımından “Kayrat” “Qarabağ”a bənzəyirdi. Amma “Qarabağ” daha güclü komanda idi.
– “Neftçi”dən ayrıldığınız zaman Azərbaycanda qalmaq ehtimalınız var idi?
– Düzü, var idi. “Neftçi”dən ayrılan kimi mənimlə əlaqə saxlayanlar oldu. Ancaq həmin vaxt “Neftçi”yə rəqib olmaq istəmirdim. Düşünürdüm ki, Azərbaycanda yalnız bu komandada oynayaram. 2019-cu ildə “Seul”u tərk etdiyim vaxt “Neftçi”yə qayıda bilərdim. Amma təəssüf ki, danışıqlar uğurlu yekunlaşmadı. Buna baxmayaraq, hələ də “Neftçi” azarkeşiyəm.
– “Neftçi” azarkeşlərinin sizə münasibəti necə idi?
– “Neftçi” azarkeşləri möhtəşəmdirlər. Məğlub olduğumuz matçlarda da bizə dəstək verirdilər. Belə halla tək-tük yerlərdə rastlaşa bilərsiniz. Fərqlənəndə onlar adımı elə səsləndirirdilər ki, sırf bunu eşitmək üçün qol vurmağa can atırdım. Onlar daim ürəyimdə olacaqlar.
– Komandanın oyunlarını izləyirsiniz?
– “Neftçi”nin tərcüməçisi ilə çox yaxşı münasibətim var. Mənə oyunlarının linklərini göndərirdi, imkan tapdıqca baxırdım. Orada dostlarım var. Həmişə “Neftçi”nin çempionluğunu arzulamışam.
FƏRİD
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Premyer-liqa2024-05-05 20:57
“Sabah”dan növbəti qələbə
- Milli komanda2024-05-04 15:39
Millimiz UEFA İnkişaf Turnirində ikinci oyununda da uduzdu
- Premyer-liqa2024-05-04 18:59
Samir Abasov: “Bu, “Qarabağ”la matçdakı yorğunluqdan irəli gələ bilər” – VİDEO