Ölkə futbolu
“Keşlə”dən FIFA-ya şikayət: sanksiya gözlənilir
“Keşlə”dən hələ mövsümün startında ayrılan Aleksandr Kristavao bakılılardan FIFA-ya rəsmi şikayət edib. Anqolalı hücumçu bu barədə futbolinfo.az saytına özü məlumat verib.
Həm də Hollandiya vətəndaşlığı olan hücumçu bildirib ki, klubla 2021-ci ilin mayına qədər müqaviləsi olsa da, Bakı təmsilçisi onu bitərəfli şəkildə komandadan göndərib. Bu səbəbdən klub futbolçuya maaş ödəməyi lazım bilməyib: “Mənimlə yeni müqavilə imzalanandan bu tərəfə heç bir ödəniş olmayıb. Klub maaşımı vermir. Bu səbəbdən FİFA-ya şikayət etdim. Müqaviləmin sonuna qədər nəzərdə tutulan pulumu klubdan tələb edirəm. Ali futbol qurumunun bu barədə qərar verməsini gözləyirəm”.
Ötən ilin qışında “Keşlə”yə gələn futbolçu ilə yayda yeni anlaşma imzalanmışdı. Avrokuboklarda, ardınca mövsümün əvvəlində forma geyən Aleksandr sonradan çempionatdakı fasilədən yararlanaraq Hollandiyaya yollanmışdı. Klub onun icazəsiz getdiyini bildirərək müqaviləyə birtərəfli xitam vermişdi. Ovaxtkı baş məşqçi Yunis Hüseynovun qərarı ilə belə addım atan klub rəsmiləri məsələnin hüquqi tərəflərini vecə almamışdı.
Kluba yeni gələn idman direktoru Ceyhun Sultanovun bu işdə ciddi günahı var. Məhz o, müqaviləsi davam edən oyunçunun FIFA-ya üz tuta biləcəyini düşünməliydi. Gəl ki, başı heyətdəki oyunçuları azaltmağa, yeni gələcək legionerlərdən faiz “tutmağa” qarışan Sultanov bu amili nəzərə almamışdı.
Kristavaonun tam haqlı olduğunu deyə bilmərik, onun xarakterində də ciddi problemlər var idi. Lakin söhbət hüquqi sənəddən gedirsə, “Keşlə”nin başı dərddədi. Bu kimi məsələlərdə adətən futbolçunun haqqını müdafiə edən FIFA-nın cəzası qaçılmazdı. Beləcə bakılılar xidmətindən istifadə etmədiyi oyunçuya görə 100 min dolları havaya sovuracaq.
“Keşlə” rəhbərliyi də səhvinin fərqindədi. Elə bu səbəbdən yola salınan digər futbolçulardan fərqli olaraq, Kristavaonun adı hələ də komandanın iştirak ərizəsindən çıxarılmayıb.