Ölkə futbolu
Narazıların könlünü almaq üçün BƏYANAT: AFFA haqlı etirazlar üzündən geri çəkildi
Aylardı, illərdi yazırıq, amma görməzdən gəlir, qulaqardına vururlar. Stadionlarda böyük qalmaqallar yaşanmadan, qan çıxmadan, kimsə ölmədən ölçü götürmək istəyən yoxdu. Sanki narazılığın böyüməsini, iğtişaşlar yaranmasını istəyirlər.
AFFA arzusuna çatdı. Cəzasızlıqdan harınlayan, mövsüm boyu kiminsə haqqını yeməkdən qorxmayan hakimlər nəhayət, “cinayət başında” tutuldu. Vüqar Həsənlinin rəhbərlik etdiyi briqada “Sabah” – “Neftçi” görüşündə əndazəni aşınca ortalıq qarışdı. Meydan sahiblərindən 4 nəfərin qırmızı, ümumiyyətlə, 16 nəfərin vərəqə aldığı görüş böyük ajiotaja səbəb oldu. Baş hakimin idarəçiliyi bacarmaması, bəlkə də qərəzi üzündən rahat qələbə qazandığı görüşdə “Sabah”ın ardıcıl zərbələr alması vəziyyəti dəyişdi, sonda iki klubun nümayəndələrinin az qala əlbəyaxa olmasına gətirib çıxardı.
Məsələ o qədər ciddidi ki, AFFA dünən tələsik bəyanat yayıb, məsələnin araşdırılacağını elan etdi. Mövsüm boyunca fərqli məşqçilər hakimlərin bərbad idarəçiliyinə üsyan edir, mətbuat konfranslarında dilə gətirirdilər. Aftandil Hacıyev, Ayxan Abbasov, Elmar Baxşıyev, ən sonda da Qurban Qurbanovun açıqlamaları vecə alınmırdı, amma canlı yayımda AFFA-nın qarapaltarlılarının rəzil idarəçiliyi ifşa olunduqdan sonra qurum olayı sakitləşdirmək üçün əməli addım atmalı oldu.
Elxan Məmmədovda tənqidlərə, haqlı etirazlara immunitet yaranıb. AFFA-nın icraçı vitse-prezidenti o qədər arxayındı ki, hətta ciddi narazılıqları da vecinə almır. Hamilərinin onu qoruyacağını bildiyindən azarkeşlərin, ictimaiyyətin fikirlərinə önəm vermir.
Cəzasızlıq mühiti bu adamı rahatlaşdırıb, özündənrazılığını artırıb. Ona görə də milli komandanın biabırçılıqlarını, ölkə çempionatının rəzil durumunu, uşaq futbolunun məhv olmasını adi hal kimi qəbul edir, yuxarıları da buna inandırır. Kimsə də futbol təsərrüfatına ayrılan yüzmilyonların hesabatını istəmir. İnkişaf üçün ümid yoxdursa, qalstukundan sallanan bu bəy niyə hələ də postundadı, nəyə görə dövlət vəsaiti havaya sovrulur?
Əslində, ölkə futbolunun böyük potensialı var, sadəcə, BAŞLAR yerində deyil. Elxan Məmmədov mutasiya olunmuş virus kimidi, futbolun canına daraşıb, çarəsi tapılmır. Onu kənarlaşdırıb, işi bilən adamları təyin etməklə bütün problemləri qısa müddətdə həll etmək mümkündü. Ancaq arxalı adam olan bu zatın şəxsi maraqları hər şeydən vacib bilinir, azarkeşlərin əsələriylə oynanılır. Bütün futbol təsərrüfatı bir nəfərin ambisiyalarına, kabinet oyunlarına qurban verilir.
Bu rahatlıqla narazıları “müxalifətçi” adıyla damğalayan, yuxarılara yalançı raportlar verən vitse-prezident srağagünkü olaydan sonra çətin vəziyyətə düşüb. Çünki indi narazılıq edən hansısa məşqçi deyil, biabırçılığı canlı yayımda hamı izləyib, hansı ssenarilərin qurulduğunu görüb. Və təzyiqlər hər şeyi yola verməyə öyrəşən Məmmədovun kreslosunu laxladıb, o da ciddi tədbir görüləcəyi ilə bağlı bəyanata əl atıb.
Bildiyimizə görə, “Sabah”ın sponsorlarının ciddi narazılığı Elxan bəyin kürkünə birə salıb. Bu insanların nüfuzuyla oynadığı canlı yayımda isbatlanan AFFA-nın narahatlığı da qapazdan qorxmasındadı. Yaxın saatlarda hakimlərlə bağlı ölçü götürüləcək və klublar da gözdən pərdə asmaq üçün müəyyən cəzaya məruz qoyulacaq.
İndiyə kimi iyrənc planları xəlvətdə reallaşdıran, biabırçılıq efirə çıxdıqdan sonra isə tədbir görməyə məcbur qalan AFFA rəhbərliyinin verəcəyi para cəzası formallıq olacaq. Çünki klublardan cərimələri toplamaq mümkün deyil. Və bunun da günahkarı assosiasiyadı. Klublara borcu olan qurum cərimələri həmin məbləğdən çıxır, hansısa vəsaitə iddia edə bilmir.
Premyer Liqanın yayım hüququnu hiyləylə ələ keçirmiş “CBC Sport” buna görə klublara müəyyən məbləğ ödəməlidi. Lakin illərdi kimsəyə pul verilmir, oyunlar dədə malıymış kimi göstərilir. Əvəzində klublar AFFA-ya rüsum və cərimələri ödəmir, həmin vəsaitlə kompensasiya edilir. Axı, sözügedən telekanal da AFFA-nındı, bir cibdən maliyyələşir.
Hazırda ən maraqla gözlənən hakimlərin hansı cəzanı alacağıdı. Həsənlinin briqadası o qədər bərbad idarəçiliklə yadda qaldı ki, ciddi cəzası olmalıdı. Və bu cəza AFFA Hakimlər Komitəsinə sillə olmalıdı. Komitə sədri Frits Stuxlik gəldiyi gündən hakimlərin cəzalandırılmasının əleyhinə olduğunu bildirib və heç vaxt kiminsə diskvalifikasiyasını elan etməyib. Elə bu cəzasızlıq mühiti hakimlərin belə hoqqa çıxarmasına səbəb olub.
Xatırladaq ki, 2:2 hesabıyla bitən “Sabah” – “Neftçi” matçında baş hakim Vüqar Həsənli “Sabah”ın üç futbolçusuna, bir məşqçisinə qırmızı vərəqə göstərib, meydan sahiblərinin qapısına iki mübahisəli penalti təyin edib, “Neftçi”nin təmiz qolunu saymayıb.
CAVAD
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-23 08:00
“Səbail” “Sabah”a uduzsa…
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”