“Neftçi” “Qarabağ”ın iki futbolçusunu istəyir

“Neftçi” yeni mövsüm üçün tam fərqli heyət qurmaq niyyətindədir. Legioner transferlərində ciddi addımlar atmağı düşünən bakılılar yerli oyunçu potensialını da yaxşılaşdırmağa çalışır.

Futbolinfo.az xəbər verir ki, paytaxt klubu əsas rəqibləri olan “Qarabağ” və “Sabah”ın bəzi oyunçularına maraq göstərir. Daha yaxşı maaş vədi ilə bəzi futbolçuların heyətə cəlb olunması mümkündür. Xüsusilə “Qarabağ”da əsas heyətdən kənar qalan iki nəfərlə bağlı vəziyyət ciddidir. Uğur qazanmaq üçün yerli oyunçu potensialının güclü olmasını anlayan bakılılar ən yaxşıların izindədir.

“Neftçi” çoxdandır heyətə qatmaq istədiyi Toral Bayramov və Qara Qarayevi “Qarabağ”dan qoparmağa çalışır. Hətta onlara görə ağdamlılara yaxşı transfer təklifi göndərilməsi mümkündür. Çempion avrokubokda ciddi hədəfləri olduğu üçün heyəti zəngin saxlamağa çalışır, lakin sözügedən futbolçular da əsas heyətdə yerlərini itirdikləri üçün tərəddüd edirlər.

Baş məşqçi Qurban Qurbanov sol cinahda rəqabət yaradan başqa oyunçu olmadığından Toralın getməsinə razı deyil. Gənc futbolçunun bakılılara meylli olsa da, keçidin baş tutması çətin görünür.

Qarayevlə bağlı məsələ isə fərqlidir. Patrik Andradenin transferindən sonra dayaq bölgəsində futbolçu sayı kifayət qədər çoxalıb. Bu iki oyunçudan başqa Julio Romao, Riçard Almeyda və Marko Yankoviç də var. Ona görə Qaranın rəqib düşərgəyə yollanması mümkündür.

Əldə etdiyimiz məlumata görə, “Neftçi” Qarayevə təklif göndərib. Futbolçu razılaşacağı halda komandası ilə danışıqlar başlayacaq. Qara özü razılıq verəcəyi halda “Qarabağ”ın onu saxlamaqda israr etməyəcəyi gözlənilir.