“Sabah” Konfrans Liqasına Qəbələdə hazırlaşacaq

Ölkəmizi UEFA Konfrans Liqasında təmsil edəcək “Sabah” debüt mövsümünün planlarını cızıb. “Bayquşlar” avrokubok matçlarına üç fərqli məkanda hazırlaşmaq niyyətindədir.

Bakılıların iyunun 21-də toplanışa başlayacağı və hazırlıq üçün Avstriyaya gedəcəyi bəlli idi. Futbolinfo.az isə hazırlıq mərhələsinin digər detallarını dəqiqləşdirib.

Tam rəsmiləşməyən plana görə, “Sabah” ölkə daxilində iki həftəlik hazırlıq keçəcək və iki yoxlama oyununa çıxacaq. Paytaxt təmsilçisi bu müddətin hamısını Bakıda keçirmək istəmir və 29-da Qəbələyə yollanmaq ehtimalı var. Bölgəyə gedilərsə, oradakı birhəftəlik toplanış elə Konfrans Liqasına gedəcək digər təmsilçimizə – “Qəbələ”yə qarşı matçla bitəcək. Amma nə “qırmızı-qaralar”la, nə digər rəqiblə sınaq matçı hələ tam razılaşdırılmayıb.

Əvəzində “Sabah”ın Avstryaya yollanacağı dəqiqdir. İyulun 6-da səfərə çıxacaq komanda 21-dək orada olacaq. Daha sonra püşkatmanın nəticəsinə uyğun olaraq qərar veriləcək. İlk oyunun harda keçirilməsi bakılıların evə dönüş planlarını dəqiqləşdirməsini müəyyən edəcək.