I Liqa
“Sumqayıt” – “Şamaxı” oyununda qumar?
“Sumqayıt”la “Şamaxı”nın rəhbərliyinin qumar oynadığını və ya komandalarında qumar oynayanlara yer verdiyini yazsaq, bizi məhkəməyə verərlər. Prosesi də udarlar, çünki əlimizdə fakt yoxdur. Sadəcə, ortada müəmmalı nəticə, ciddi şübhə var.
Olayın baş verdiyi yerin I Divizion olduğunu xatırlatsaq, bizim kimi şübhələnənlərin sayı çoxalar. Çünki illərdir bu yarışda nələrin baş verdiyini hamı bilir, UEFA hər ay siqnallar, məktublar göndərir və bugünədək günahı isbat olunan onlarla şəxs həbsə atılıb, yüzlərlə şəxs futboldan ömürlük kənarlaşırılıb. Çox təəssüf ki, bizdə aşağı liqa nəticəsi manipulyasiya olunan oyunlardan xali deyil.
Dünən I Divizionda “Sumqayıt-2” – “Şamaxı-2” matçı baş tutdu. 4:3 hesabı ilə qonaqların xeyrinə başa çatan matçda 7 qolun vurulması, ilk yarıda meydan sahiblərinin, 90 dəqiqənin sonunda isə qonaqların qalib gəlməsi faktı çox şeydən xəbər verir. Bukmeker oyunları ilə maraqlananlar yaxşı bilir ki, “7+” və “1/2” kombinasiyalarının əmsalı 25-30-dan az olmur, oyuna pul qoyanlar məhz 25-30 mislini qazanır. Hər turda bircə belə oyun “fırlatmaq”, hər iki ssenarini təmin etmək onu təşkil edənlərə milyonlar qazandırır.
Təbii ki, futbolda kənar müdaxilə olmadan da belə nəticələr reallaşır. Amma söhbət mövzusu I Diviziondursa, şübhələnməli olursan. Hətta həqiqətən nəticə təmiz futbolun yekunu olsa belə, araşdırmaq, nəzarət etmək lazımdır.
Təsəvvür edin, dünənki matçda 35-ci dəqiqəyə kimi meydan sahibləri 3 cavabsız topla önə keçir. Bu həmin “Sumqayıt”dır ki, 26 tur ərzində cəmi 30 qol vurmuşdu. Və ikinci hissədə, əmsalın kəllə-çarxa çıxdığı anda matçda dönüş yaranır. Mövsüm ərzində cəmi 34 qol vuran şamaxılılar 81-ci dəqiqədən sonra 4 dəfə (!!!) fərqlənib oyunu qələbə ilə bitirir.
Heç kimi ittiham etmirik, sadəcə, AFFA-nın, PFL-in, sözügedən klubların rəhbərlərinin bu matçı araşdırmasını təklif edirik. Yarışın, qurumların, klubların imici üçün bu, vacibdir. Matçın videosuna baxmışıq – adi oyun epizodları da var, şübhəli məqamlar da. Mümkünsə mütəxəssislər də diqqət etsin, futbolçuların, məşqçilərin rəyi öyrənilsin və s. tədbirlərə əl atılsın.
Təkcə bu oyun olsaydı, diqqət etməzdik. Amma az qala hər tur azı bir şübhəli matç tapmaq olar. Məsələn, bir tur əvvəl “Turan Tovuz-2” – “Zaqatala” matçı da qəribə ssenari ilə keçib. 71-ci dəqiqəyə kimi 2:0 hesabı ilə öndə olan qonaqlar yekunda 2:3 hesabı ilə uduzub. Və bu matçda da ilk hissənin və oyunun qalibi fərqli komandalar olub.
Bu həmin Tovuz klubudur ki, 22-ci turda evdə “Araz-Naxçıvan”a 5:6 kimi unikal hesabla uduzmuşdu, tərəflər dəfələrlə bir-biri qarşısında önə keçmişdi. Həmin oyunun araşdırılmasına görə idi ki, naxçıvanlıların Premyer Liqaya buraxılması son ana kimi təhlükə altında idi.
Biz yalnız bolqollu oyunlara diqqət etdik. Qumar oynayanların başqa variantları da var. Araşdırılsa, çox mətləb üzə çıxar. Elə oyunlar var ki, 20-ci dəqiqəyə kimi 4 qol vurulub, daha sonra qapılar “qıfıllanıb”. Və ya bir neçə qarşılaşmada hesabın açılmamasına “stavka” edildiyi və həmin oyunun qolsuz başa çatması faktları ilə bağlı söz-söhbətlər gəzir.
Bəhs etdiyimiz oyunun nəticəsi, gedişatı çox şübhəlidir. İttiham etmirik, şübhələnirik. Lütfən təmiz futbol, təmiz idman mübarizəsi naminə araşdırın! Biz şübhələrimizdə yanılmağımızdan peşman olmaq istəyirik…
FƏRİD