Ölkə futbolu
“Super “Neftçi”, yoxsa “sindromlu “Neftçi”?
“Neftçi”nin sindromu davam edir. Son 3 mövsümdə yarımfinal üzü görməyən bakılılar, 2 ildi bu yarışda qol da vura bilmir. Daha bir bəd statistika “Zirə”ylə bağlıdı. Flaqman bu mövsüm 360 dəqiqə ərzində qəsəbə təmsilçisinin qapısına yol tapmayıb. Çempionatda olduğu kimi, kubokda da “Zirə” 1:0 və 0:0-a sevinib.
Avrokuboklara aparan ən qısa yolda ölkə kubokuna 4 iddiaçı qaldı. “Qarabağ” – “Sumqayıt” cütü şənbə matçlarından sonra dəqiqləşmişdisə, dünən finalda paytaxt təmsilçisinin olacağı dəqiqləşdi. Gəncədə qələbə qazanan “Keşlə” “Kəpəz”in növbəti sürprizinin qarşısını aldı, “Zirə” – “Neftçi” oyununda isə hesab açılmayınca “qartallar” arzusuna çatdı.
¼ finalda “Sabah”ı sıradan çıxaran gəncəlilər “Keşlə”yə qarşı Bakıdakı oyunda əla mübarizə aparmışdı. Hakimin şübhəli penalti qoluna üzülən qərb təmsilçisinin evdə top buraxması bütün ümidlərin üstündən xətt çəkəcəkdi. Bu səbəbdən maksimum ehtiyatlı oynayan Yaşar Vahabzadənin yetirmələri bir hissəni ümidlə başa vurdu. Lakin fasilədən sonra səviyyə fərqi özünü göstərdi, 2 qol vuran “Keşlə” adını yarımfinala yazdırdı.
“Zirə” də ilk oyundakı 1:0 hesablı qələbəni ümumi zəfərə çevirə bildi. Səfər matçında vurulan həlledici qoldan sonra da şanslar bərabər sayılırdı. Bu səbəbdən Rəşad Sadıqov əks-hücumlara hesablanan taktika seçmişdi və bu, işə yaradı. Daha təmkinli oynayan, meydanın hər qarışı uğrunda amansız mübarizə aparan “qartallar” rəqibinə ciddi şans vermədi. Samir Abasov isə baş məşqçi postuna gəldiyi gündən bu yana reallaşan 3-cü oyunda “Zirə”nin qapısına qol vurmağın yolunu tapmadığını göstərdi.
Maraqlıdı ki, Abasov oyundan sonra “Super “Neftçi”dən dəm vurdu, əla oynadıqlarını bildirdi və təəssüflənmədiyini dilə gətirdi. “Super” komanda belə olmur və kubokda mübarizəni dayandırmaq “Neftçi” kimi komandanın məşqçisində təəssüf doğurmursa, bu durumun özünə təssüflənmək lazımdı. Bəli, “Neftçi”nin çempionluq mübarizəsi davam edir, avrokuboklara vəsiqə də böyük ölçüdə təmin edilib. Lakin kubokdan kənarlaşmaq bu qədər rahat qəbul edilməməlidi.
“Neftçi” yaxşı futbol oynayır, xüsusilə Abasovun gəlişindən sonra komanda fərqli görünür. Amma azarkeşlər titul istəyir, Samir bəy isə hələ uğur formulunu tapa bilməyib. “Zirə” kimi möhkəm ortabablarla oyunda qələbəni təmin etmək mümkün olmursa, deməli, hələ çox işləmək lazımdı.
Sadıqovun ortaya qoyduğu iş isə təqdir edilməlidi. Faktiki yeni kollektiv formalaşdıran gənc məşqçi hər iki cəbhədə iddialıdı. Çempionatda izləyicilərindən uzaqlaşaraq, ilk “üçlük”də möhkəmlənən “Zirə” kubokda da finala yaxındı. “Keşlə” ilə matçlara hələ ayyarım var, bu zaman ərzində çox şey dəyişə bilər. Lakin bugünə qədər görülən işləri nəzərə alsaq, “Zirə” qismən favorit sayılmalıdı. Eyni templə davam edilsə, komanda tarixində ilk dəfə kuboka bu qədər yaxın olacaq.
Statistika hər şey deyil, amma ümumi mənzərəni görmək baxımından əyani vəsaitdi. Və rəqəmlər “Neftçi”nin hələ də arzulanan vəziyyətdə olmadığını göstərir. Bakılılar çempionatın növbəti turunda “Qarabağ”a yenilsə, çempionluq yarışından da qopacaq. Abasov yəqin ki, bunun fərqindədi. Toparlanmaq, psixoloji təzyiqdən qurtulmaq lazımdı. Hələ gec deyil…
FƏRİD
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?