Ölkə futbolu
Yoxlama oyununa klubdan xəbərsiz bilet satır – “Şamaxı” TV-nin əməkdaşı
Bu gedişlə biabırçı idarəçiliyi ilə məşhur olan sabiq prezident Zaur Axundova şükr edəcəyik. “Şamaxı”nın indiki rəhbərliyinin futboldan, klub idarəçiliyindən ümumiyyətlə, xəbəri yoxdu. Vəziyyət o həddə çatıb ki, komandanın oyununa bilet satılır, amma klub məlumatsızdı.
“Şamaxı” hər gün daha çox gülüş obyektinə çevrilir. Klub rəhbərliyi gizləndikcə, mətbuat qarşısına çıxıb ictimaiyyətə açıqlama verən biri olmayınca hadisələrin belə yön alması təbiidi.
Məşqçi təyinatları ilə bağlı gülünc qərarlara görə hədəfə çevrilən klub, indi də bilet satışı ilə bağlı biabırçı vəziyyətə düşüb. Dünən sosial şəbəkədə yayılan məlumat təkzib olunmayana qədər klubun qeyri-ciddiliyi barədə söhbətlər böyüyəcək. Həqiqətdirsə, bir ayıb, yalandısa və təkzib olunmursa, növbəti ayıb. Yoxlama oyununa 3 manata bilet satan çempionat matçlarında qiyməti 10-20 manata qaldırar.
Klubun rəsmi məlumatlarında yalnız Şamaxıda “Turan Tovuz”la yoxlama matçının keçiriləcəyi qeyd olunub. Bilet satışı barədə isə heç bir açıqlama yoxdu. Amma sosial şəbəkədə yayılan elan diqqətimizdən yayına bilməzdi. Klubun mətbuat xidmətinin onlarda belə bir informasiyanın olmamasını deməsindən sonra “Futbolinfo”nun əməkdaşı olayın izinə düşdü.
“Zirə”nin Konfrans Liqasında “Makkabi”yə qarşı keçirəcəyi oyunun biletləri 2 manatdan başlayır. Amma “Şamaxı”nın “Turan Tovuz”la yoxlama matçının bilet qiyməti 3 manatdır. Bölgə stadionunda bazarı kim açıb? Asan yolla qazanc əldə etmək istəyən kimdi?
Qeyri-adi bir şey etmədik, elanda yazılan nömrəni araşdırdıq. Məlum oldu ki, nömrə “Şamaxı” TV-yə məxsusdu və zəngimizə cavab verən əməkdaş salamlaşan kimi çəkinmədən oyuna bilet satdığını və görüşüb alveri bitirmək üçün yer, vaxt təyin etməyimizi istədi. Sadəcə, sözlərinə biletin klub tərəfindən satılmadığını əlavə etdi, onu kimin təşkil etdiyini isə gizli saxladı. Hətta jurnalist olmağımızı, Bakıdan gəldiyimizi, matça bir saat qalmış görüşmək istəməyimizi deməyimiz də vecinə olmadı. Sövdələşdik, zəngimizi gözləyəcək.
Bizim üçün bu informasiya kifayət idi. Əsas odur ki, sosial şəbəkədə yayılan elan yalan deyil, həqiqətən yoxlama matçına bilet 3 manata satılır. Onu kimin satdığını qoy klub rəhbərliyi araşdırsın. Nömrə “Şamaxı” TV-yə aiddirsə, kluba himayədarlıq edən İcra Hakimiyyəti xəbərsiz olmaz. Xəbərsiz idisə də, indi xəbərləri var…
FƏRİD
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək