Müsahibə
"Əsas komandaya yaxşı futbolçu yetişdirib verə bilmirsənsə…"
“Simurq"un əvəzedici komandasının baş məşqçis…
“Simurq"un əvəzedici komandasının baş məşqçisi Rövşən Babayevin futbolinfo.az saytına müsahibəsi
– Artıq yeni mövsümə start verilib. Baxmayaraq ki, "Bakı" ilə oyununuz təxirə salındı, ikinci turda AZAL-ı 2:0 hesabı ilə məğlub etdiz. Həmin qələbəni necə şərh edərdiz?
– Bu mövsümdə yeni komanda yaratmışıq. Heyəti cavanlaşdırdıq. Həm U-19, həm də əvəzediciləri gəncləşdirdik. Yeni mövsümə başlamaqla bağlı pis o oldu ki, yoxlama oyunları keçirə bilmədik. "Bakı" ilə oyunumuz alınmadığı üçün AZAL görüşü yeni mövsümdə ilk matçımız idi. Oyuna gəldikdə isə, birinci hissə bir az ağır oldu. Çünki futbolçularım oyun oynamamışdı. İkinci hissədə isə həm istədiyimiz oyunu göstərə bildik, həm də yaxşı nəticə qazandıq. Məqsədimiz də odu ki, əsas komandaya yaxşı futbolçular yetişdirək.
– Ötən mövsümlə müqayisədə bu dəfə komandada nə kimi yeniliklər, yaxud çatışmazlıqlar var?
– Ötən mövsüm komandamız bir az yaşlı idi. Yenilik də odu ki, komandanı cavanlaşdırdıq. 1995, 95, 97-ci il təvəllüdlü uşaqları komandaya dəvət etdik. Yaşı çox olanlarla işləyərkən, perspektiv baxımında yaxşı nəticə qazana bilmirsən. Fərqi yoxdu ki, çempionatda ilk yerləri tutasan. Əsas komandaya yaxşı futbolçu yetişdirib verə bilmirsənsə, bu, yaxşı nəticə deyil. Misal üçün onu deyə bilərəm ki, əvəzedicilərdən əsas komandaya iki futbolçumuz – Oruc Balaşlı və Kənan Müslümov qatıldı. Bunu yenilik kimi qeyd etmək olar. Çalışacağıq ki, bu mövsüm əsas komandaya daha çox furbolçu qazadıraq.
– Ümumiyyətlə, aşağı yaş qrupları üzrə komandalardan əvəzedicilərə qatılmağa namizədlər çoxdu?
– Üç ildi ki, burada işləyirəm. Prezidentimizin göstərişindən sonra aşağı yaş qrupları üzrə komandalarımıza məşqçilər dəvət olundu. Ondan sonra həmin komandalardakı vəziyyəti yaxşılaşdıra bildik. Aşağıdan bizə futbolçu gəlmirdi. Məktəbimiz yeni-yeni dirçəlir. Bu səbəbdən bir az çətinliklərimiz olur. Hazırda U-19-da da, əvəzedicilərdə də 11-12 yerli uşaq var.
– Əsas komandaya futbolçu yetişdirə bildiyinizi deyirsiz, Bəs bu yetişdirdiyiniz oyunçular buralı, yəni zaqatalalıdı, yoxsa digər bölgələrimizdən gələnlərdi?
– Bu mövsüm bizdən əsas komandaya gedən Oruc Balaşlı zaqatalalıdı. O, burada böyüyüb. Kənan Müslümov da yerlidi. Vüqar Mustafayev “Bakı” klubunda idi. O, zaqatalalıdı və onu buraya gətirdik. Ötən mövsüm bizdə oynayan yerli 1992-ci il təvəllüdlü uşaqlar vardı, indi onlar birinci divizon komandalarındadı.
– Növbəti matçınız “Xəzər Lənkəran”ladı. Həmin rəqibə qarşı necə hazırlaşırsız?
– Bilirik ki, orada güclü mütəxəsiss işləyir. Doğurdan da, o, yaxşı futbolçular yetişdirir. Amma artıq 3 mövsümdür ki, o, eyni heyətlə işləyir. Amma biz yeni mövsümə, yeni futbolçularla başladıq. 1-2 il bundan qabaq əvəzedicilərin oyununa azarkeş gəlmirdisə, artıq tribunalarda çoxlu tamaşaçı görə bilirik. Biz də çalışacağıq ki, yaxşı oyun göstərərək yenə də qələbə qazanaq və azarkeşlərimizi sevindirək.
– Yeni mövsümdə hansı rəqiblərinizin sizə daha çox çətinlik yaradacağını düşünürsünüz?
– Yeni mövsümdə ancaq “İnter”-“Qəbələ” oyununu izləyə bilmişik. Hər iki rəqib də öz heyətini saxlaya bilib. Onlar da iddialı komandalardı. 2 ildir ki, “İnter”ə qarşı çətinlik çəkirik. “Neftçi”, “Xəzər Lənkəran”, “Qəbələ” kimi rəqiblərə qarşı çətin oyun olur. “Bakı” da bizimlə ötən oyunu buraxmalı oldu. Onların da vəziyyətini hələ ki yaxşı bilmirik. Ümid edirik ki, hər şey yaxşı olar. Hesab edirəm ki, əvəzedicilərin çempionatında rəqabət güclü olmalıdır. Biz çalışmalıyıq ki, əsas komandalarımıza daha çox yerli futbolçu qazandıraq.
– Bayaq əvəzedicilərə diqqət ayırmaqdan danışdınız. Sizin çempionata diqqət qayğı necədir? Narazı olduğunuz məqamlar hansılardır?
– Çox istəyərdim ki, əvəzedicilərin çempionatına dırnağarası baxmasınlar. Mən heç vaxt hakimlərlə bağlı şikayətlənməyi xoşlamıram. Amma əsas komandamızın AZAL-la oyununa baxırıq ki, Əliyar Ağayev yaxşı idarə edir, hər epizoda görə vərəqə paylamır. Amma bizim AZAL əvəzediciləri ilə oyunda elə epizodlar oldu ki, 5-6 sarı vərəqə paylanıldı. Bu da futbolun sürətini, keyfiyyətini azaldır. Biz deyirik ki, Avropa futbolu ilə ayaqlaşaq, mübariz futbol oynayaq. Amma hakimlər hər epizoda fit çalması bizim işimizə mane olur.
– Yeni mövsüm əsas komandadan nə gözləyirsiniz?
– AZAL-la oyunda da görürük ki, əsas komandamız hücumameyilli futbol oynayır. Topa nəzarət edirik. Biz də çalışırıq ki, bizdən əsas komandaya gedən uşaqlar bu futbolu oynaya bilsin. Ümid edirik ki, komandamız layiqli yeri tutar.
ELMAR VƏLİYEV
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”