Premyer-liqa
Abdullayev üçün Naxçıvan həqiqəti
Premyer Liqada klubların azlığı yerli mütəxəssislərin işs…
Premyer Liqada klubların azlığı yerli mütəxəssislərin işsizliyin birbaşa səbəbidi. Buna görə də uzun müddət işsiz qalmamaq üçün məşqçilər heç bir perespektiv vəd etməyən klublarda çalışmağa razılıq verirlər. Bunlardan biri də “Araz Naxçıvan”ın baş məşqçisi Əsgər Abdullayevdi.
Əsgər bəy Premyer Liqanın 7-ci turunda “Bakı” məğlubiyyətindən sonra istefa verdiyini açıqladı. Çalışdırıcını buna vadar edən səbəblər vardı. Komandasının uğursuz çıxışı, “Bakı” məğlubiyyəti və qarşılaşmadan sonra azarkeşlərin çox kəskin şəkildə istefa tələbi baş məşqçinin fikirində əsas rol oynadı.
Amma şahidlik etdiyim mənzərədən sonra belə qənaətə gəldim ki, “Araz Naxçıvan”ın uğursuzluqlarında tək günah baş məşqçidə deyil. Belə ki, onun üçün istənilən səviyyədə şərait yaradılmayıb. Komandanın bazasının bərbad durumda olması, futbolçuların 1500 dollardan artıq maaş almaması, oyunçuların məişət problemləri ilə üzləşməsi “Araz Naxçıvan”ın uğursuz çıxışına təsir edən səbəblərdi.
Nəzərə almaq lazımdı ki, Naxçıvan təmsilçisi “transfer pəncərəsi” dönəmində bir neçə futbolçu ilə müqavilə bağlasa da, üzərindən 10 gün keçməmiş həmin oyunçularla yolları ayırmaq məcburiyyətində qaldı. Bu da rəhbərliyin əvvəlcə futbolçulara 3000 dollar söz verməsi, daha sonra bunu yarıbayarı azaltmasına görə idi. İş burasındadı ki, heç bir futbolçu Naxçıvanda oynamaq istəmir. Oynayanlar isə məcburiyyət qarşısında qalanlardı. Nə qədər güclü məşqçi olsa da, məcburiyyət qarşısında qalıb, karyerasını “Araz Naxçıvan”da davam etdirən veteran futbolçularla uğur qazanmaq qeyri-müşkül məsələdi. Abdullayev sadəcə, əlində olan materiallardan istifadə edir. Əldə olan materialla isə yalnız aşağı dəstədə uğur qazanmaq olar.
Əsgər bəyin istefa verib, canını qurtarması daha yaxşı olardı. Amma rəhbərlik onun bu xahişini qəbul etməyib. Çünki klub prezidenti Orxan Cabbarovun başqa şansı da yoxdu. Şəraitsiz bir bazada, Naxçıvanda, vaxtı keçmiş futbolçularla və müəyyən məhdudiyyətlərin olduğu muxtar respublikada heç bir məşqçi çalışmaz. Klub rəhbərliyin buna görə Abdullayevə az qala yalvarır.
Orxan bəy hələ birinci divizionun ab-havasından ayılmayıb. O, hələ də aşağı dəstədə müəyyən yollarla qazanılan qələbələrin elitada da davam edəcəyini düşünür. Çalışdırıcdan uğur gözləmək üçün isə baş məşqçinin arzuladığı, onun istifadə edə biləcəyi futbolçuları komandaya cəlb etmək lazımdı. “Arxeoloji qazıntılar zamanı tapılmış oyunçulara” 1500 dollar verməklə uğur qazanmaq qeyri-mümkündü. Lap baş məşqçi Joze Mourinyo da olsa.
EMİN SƏFƏROV