Premyer-liqa
“Simurq” Anar Bəkirovun siqaretini tükətdi
Əzmkarlıq, komanda oyunu, meydanın hər yerində mübarizə – b…
Əzmkarlıq, komanda oyunu, meydanın hər yerində mübarizə – bu keyfiyyətlər yeni mövsümdə maliyyə problemləri içində üzən “Bakı”ya ikinci qələbəni qazandırdı. Paytaxt təmsilçisi bu dəfə “Simurq”u Zaqatalaya əliboş göndərdi.
Nurlan Novruzovun başla vurduğu qol oyunda həlledici oldu. Hücumçu sözün hər mənasında başının yaxşı işlədiyini bu qarşılaşmada da göstərdi. Beləliklə, minimal hesablı qələbədən sonra “Bakı” xallarının sayını 7-ə yüksəltdi.
Qarşılşamaya gəlincə, tam əminliklə demək olar ki, qonaqlar ev sahibinə ciddi müqavimət göstərə bilmədi. Qarşılaşmada “Simurq”un ciddi, uğurlu bir taktika ilə oynadığı, məntiqli, kombimasiyalı oyun qurmağa çalışdığı hiss olunmurdu. Zaqatalalılar xoşbəxtliyi cərimə meydançasına edilən asmalarda axtarırdı. Amma “Bakı”nın qapıçısı Aqil Məmmədovun çıxışlarda dəqiq olması rəqibin istəyinə çatmasına mane oldu.
“Simurq”un yeni mövsümə hazır olmadığı açıq-aşkar hiss olunur. Yay fasiləsində Sloveniya və Avstriyada keçirilən təlim-məşq toplanışları da “sarı-qaralar”ın hazırlığı üçün bəs etməyib. Yeni transferlər göz dolduran oyun sərgiləmir. İddialılar sırasına düşmək istəyən zaqatalalıların bu cür oyunla hədəfə çatacağı heç inandırıcı deyil. Baş məşqçi George Çixradze də durumun acınacaqlı olduğundan xəbərdardı. Gürcü çalışdırıcı qarşılaşmadan sonra keçirilən mətbuat konfransında vəziyyətin ürəkaçan olmadığını bildirməklə yanaşı, problemlərin olduğunu gizlətmədi.
Bu, bir reallıqdı ki, hazırda “Bakı”nın gənc futbolçuları “Simurq”un əvəzedicilərinin aldığı maaşa oynayır. Eyni zamanda onlar son 6 ayda cəmi bir dəfə əməkhaqqı üzü görüblər. Amma bu amil ilk turun təxirə salınmış oyununda meydanda hiss olunmadı. “Bakı” azərbaycanlı gənc futbolçularla da uğur qazanmağın mümkünlüyünü “Simurq”la oyunda nümayiş etdirdi. Sadəcə, İbrahim Uzuncanın yetirmələrində bir qədər təcrübə çatışmır desək, yanılmarıq. Bu təcrübəsizlik olmasaydı, “Simurq” Bakıdan böyükhesablı məğlubiyyətlə də ayrıla bilərdi. Belə ki, bir neçə dəfə əks-hücumlarda rəqibini yaxalayan “zolaqlılar” təcrübəsizlikdən qol epizodlarını boşa verdi.
Qarşılaşmada diqqət çəkən məqamlardan biri isə əyalət təmsilçisinin rəbərliyi ilə bağlıdı. Belə ki, idarə heyəti ilə yanaşı klub prezidenti Anar Bəkirovun da komandasının oyunundan razı qalmadığı açıq-aşkar hiss olunurdu. Bəkirov komandasının oyununa o qədər əsəbləşmişdi ki, ikinci hissədə xeyli siqaret çəkməsi ilə yadda qaldı. Amma “Simurq”un matçda geri dönüş edə bilməməsi əsəbini tüstülətməklə soyutmağa çalışan prezidentin siqaretininin bitməsi ilə nəticələndi. “Simurq” növbəti turlarda da belə oyun sərgiləsə, tam əminliklə demək olar ki, bu, Anar Bəkirovun sağlamlığına ciddi ziyan vuracaq.
EMİN SƏFƏROV
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”