Milli komanda
Berti Foqts: "İtaliyaya qarşı əlimizdən gələni edəcəyik"
Futbol üzrə Azərbaycan yığmasının baş məşqçisi Be…
Futbol üzrə Azərbaycan yığmasının baş məşqçisi Berti Foqts Avropa çempionatının seçmə mərhələsinin İtaliya ilə oyunu öncəsi mətbuat konfransı keçirib. Futbolinfo.az xəbər verir ki, almaniyalı çalışdırıcı öncə qarşlaşma haqqında fikirlərini bildirib.
– Böyük bir həvəslə burda məşq keçirik. Burda hava gözəldi. Dənizi görəndə adam həzz alır. Məni tanıyan bilir ki, İtaliya futbolunun dostuyam. Təəssüf ki, sonuncu DÇ-də İtaliya pis çıxış etdi. Rəqibin heyətində hansı futbolçuların olduğuna baxanda onların niyə mundialı erkən tərk etməsi təəccüb doğurur. Oyun 90 dəqiqə olur. Hər komandanın 2 üzü olur. Oyunçularım bilir ki, qorxmaq lazım deyil. Ümid edirəm ki, məşqdə etdiklərimizi meydanda da göstərə biləcəyik. Belə matçlardan öyrənmək lazımdı. İtaliya, Almaniya kimi rəqiblərlə oyunlar çox önəmlidi. İngilislərin bir misalı var: oynaya oynaya öyrənmək lazımdı. Biz də belə etməliyik.
– Siz İtaliya ilə tez-tez görüşmüsüz. İtaliya deyəndə sizin ağlınıza nə gəlir?
– İtaliya deyəndə həmişə texnikalı, sürətli, qələbə qazanmaq istəyən komanda ağlıma gəlir. Fərdi cəhətdən texnika və taktikaları çox güclüdü.
– Mahir Şükürovla Vaqif Cavadovun heyətdə olmamasının səbəbi nədi?
– Mən sizə bu haqda ətraflı sonra danışacam. Amma hər iki oyunçunun fiziki hazırlığı çox aşağı səviyyədədi. Bildiyiniz ki, 2020-ci ildə AÇ-nin 4 oyunu Bakıda keçiriləcək. İndidən bunu düşünmək lazımdı. Ona görə də gəncləri belə komandalara qarşı oynatmaq lazımdı.
– Frankfurtdakı 5 günlük hazırlıq futbolçulara nə verdi?
– Çox şadam ki, bizim orda hazırlıq keçmək imkanımız oldu. Bundan qabaq mən “Qarabağ”ın “İnter”lə oyununa baxmışdım. Onu deyə bilərəm ki, “Qarabağ”ın oyunçuları tam yüksək səviyyədə deyil. Başa düşmürəm ki, Avroliqada oynayan komandanın çempionatda oyunu niyə görə təxirə salınmalıdı? Biz 4 gün sonra Xorvatiyaya qarşı oynamalıyıq.
– İtaliya kimi komandaya qarşı oynayanda futbolçuların dizləri əsməyəcək ki?
– Biz kişiyik. 18 yaşdan sonra kişi sayılırıq. 20-23 yaşında futbolçu qorxa-qorxa meydana çıxırsa, məncə, o başqa idman növünü seçməlidi. Mən 1,67 boyundayam. Amma hündürboy Matsoliyə qarşı oynamaq imkanım olub.
– İtaliya ilə Almaniya arasında DÇ-1970-in yarımfinalındakı görüş haqqında yadınızda nə qalıb?
– Çox pis təəssüratlar qalıb. Almaniyanın bəxti gətirmədi. Hakimlikdə səhv vardı. Amma həmin vaxt İtaliya Almaniyadan güclü idi. Bərabərlik qolunu “Milan”da oynayan Şnelinger vurmuşdu.
– Həmin oyunu yenidən keçirmək istərdiz?
– Məncə, həmin oyun bu komandalar arasında keçirilən ən böyük matç idi. Kimdən soruşsaz, hamı İtaliya – Almaniya matçları arasında DÇ-70-i göstərər.
– Antonio Konte haqqında nə bilirsiz? “Borussiya”da çıxış edən Çiro İmmobile haqqında nə deyə bilərsiz?
– Konte ilə FİFA-nın son konqresində görüşmək imkanımız olub. O, yaxşı məşqçidi. Hollandiya və Norveç üzərindəki qələbələr İtaliyanın yeni üslubda oynamasından xəbər verir. Məncə, İtaliya yeni keçid dövründədi. İmmobileyə gəlincə, o çox yaxşı oyunçudu. Rəqibin cərimə meydançasında topla yaxşı rəftar edir. Almaniya çempionatında onun öyrəşməsi üçün vaxta ehtiyacı var. O Mario Balotellidən fərqli oyunçudu.
– Qarşıdakı günlərdə komanda neçə xal toplamağa köklənib?
– Bundan da qabaq demişəm ki, məsələyə real yanaşmaq lazımdı. Deyə bilmərəm ki, İtaliya və Xorvatiyadan 6 xal alacağıq. Bura mübarizə göstərməyə gəlmişik. Biz 90 dəqiqə mübarizə aparmalıyıq. Göstərməliyik ki, son 6 ildə bizdə inkişaf var. Komandama inanıram və sabah İtaliyaya qarşı əlimizdən gələni edəcəyimizi deyə bilərəm.
– Cavid İmamverdiyev son 2 turda Türkiyənin 1-ci dəstəsində qol vurur. O açıqlamasında bildirib ki, yığmadan dəvət gözləmir. Sizcə, bu ümidsizliyə qapılmaqdandı, yoxsa günahı özündə axtarmalıdı?
– Azərbaycan çempionatı sizcə, Türkiyənin aşağı dəstəsindən zəifdi? Ondansa, “Neftçi”, “Qarabağ”, “İnter” və “Xəzər Lənkəran” kimi komandalarda oynayıb Avroliqada çıxış etsə, daha yaxşıdı.
– Futbolçularımızın Avropaya çıxış edə bilməməsinin səbəbi nədi?
– Çox yaxşı bir sualdı. Bu haqda saatlarla danışmaq olar. Siz məndən də yaxşı Azərbaycanlıların mentalitetini bilirsiz. Son 3-4 ildə yaxşı oynayan futbolçularımız vardı. Amma pulu düşündülər və indi formalarından aşağıdadılar. Azərbaycanda gənc futbolçu müəyyən səviyyəyə çatdıqdan sonra pulu düşünür. Halbuki bizdə Avropada oynaya biləcək səviyyədə oyunçular var.
– Bu gün millimizin açıq məşqi var. Amma maraqlıdı ki, bu, “Renso Barbera”da olmayacaq…
– Çünki UEFA-nın qaydalarına əsasən oyunun keçiriləcəyi stadionda bir dəfə məşq etmək olar. Biz də orda dünən məşq keçmişik. (apasport.az)
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”