İngiltərə millisinin sabiq hücumçusu Maykl Ouen 2026-cı il dünya çempionatında komandanın baş məşqçisi Tomas Tuhelin fəaliyyətini kəskin tənqid edib. O, həmçinin bir daha vurğulayıb ki, İngiltərə millisinin baş məşqçisi vəzifəsini yalnız yerli mütəxəssis tutmalıdır.
Ouenin bu fikirləri İngiltərənin mundialın yarımfinalında Argentinaya 1:2 hesabı ilə uduzaraq mübarizəni dayandırmasından sonra səslənib.
Sabiq futbolçu hesab edir ki, həlledici qarşılaşmada Tuhelin qəbul etdiyi qərarlar komandanın məğlubiyyətində əsas amillərdən biri olub. Onun fikrincə, alman mütəxəssis çətin məqamda gözlənilən liderliyi göstərə bilməyib: “Tuhelin taktiki qərarları və əvəzetmələri böyük narazılıq və şübhələr doğurdu. Bunlar indiyədək gördüyüm ən uğursuz əvəzetmələrdən idi. Onu vəziyyəti dəyişmək üçün dəvət etmişdilər, amma sonda o, problemin həllinə çevrilmədi, əksinə, vəziyyəti daha da ağırlaşdırdı”.
Ouen hesab edir ki, Tuhelin əvvəlki uğurları onun dünya çempionatındakı səhvlərinə haqq qazandırmır: “Tuhelin zəngin karyerasını və çoxsaylı üstün cəhətlərini inkar etmək olmaz. Ancaq bu, onun karyerasının ən vacib oyunu, həmçinin İngiltərə millisinin müasir tarixində ən mühüm matçlardan biri ola biləcəyi halda uğursuzluğa yol verməyin vaxtı deyildi. Əsl ustalar məhz belə çətin anlarda özlərini göstərirlər və təzyiq altında ən doğru qərarları qəbul edirlər”.
Sabiq futbolçunun fikrincə, İngiltərə Futbol Assosiasiyası turnirdən əvvəl müqaviləni uzatmaqla tələsik qərar verib: “Turnir başlamazdan əvvəl onunla müqavilənin uzadılması əsassız görünür. Bu qərar hansı əsasla verilib? Məgər seçmə mərhələdə açıq-aşkar zəif rəqiblər üzərində qazanılan qələbələr bunun üçün kifayət qədər ciddi arqument idi?”
Ouen sonda yenidən milli komandanın yerli mütəxəssisə tapşırılmasının tərəfdarı olduğunu vurğulayıb: “İndi İngiltərə Futbol Assosiasiyasını çətin günlər gözləyir. Yaxın gələcəkdə baş məşqçiyə ünvanlanan tənqidlərin səngiyəcəyini düşünmürəm. Mən əvvəldən onun bu posta təyin edilməsinin əleyhinə idim. Başa çatan dünya çempionatı isə fikrimi daha da möhkəmləndirdi: İngiltərə millisinə ingilis mütəxəssis rəhbərlik etməlidir”.