Ölkə futbolu
Çempionatımızın finalçıları
Dünən Avropa Çempionatının seçmə mərhələsi &…
Dünən Avropa Çempionatının seçmə mərhələsi çərçivəsində səfərdə Ermənistanı üstələyən Albaniya tarixində ilk dəfə böyük turnirin final mərhələsində yarışacaq. Bu hadisəni bizim üçün önəmli edən amillərdən biri də sözügedən ölkənin heyətində “Qarabağ”ın futbolçusu Ansi Aqollinin də çıxış etməsidi. Müdafiəçi ilk dəfə Azərbaycan Premyer Liqasında oynaya-oynaya Dünya və Avropa çempionatının final mərhələsində iştirak edəcək ilk futbolçu ola bilər. Ancaq Aqolliyə kimi ölkəmizdə kifayət qədər Dünya və Avropa çempionatının final mərhələsində iştirak etmiş futbolçu olub. Lakin onların heç biri böyük turnirlərdə iştirak edəndə Azərbaycan çempionatında top qovmayıb.
Bu mənada “ilk qaranquş” “Bakı”nın seneqallı qapıçısı Xalidu Sissoko olub. DÇ-2002-ci ildə ölkəsinin yığmasında 3-cü qapıçı olan əlcək sahibi Yaponiya və Cənubi Koreyada keçirilən turniririn final mərhələsində forma geyinmək şansı qazanmayıb. Bundan 2 il sonra paytaxt klubuna transfer olunan Sissoko “zolaqlılar”ın heyətində 8 il forma geyinib. O, bu müddətdə kapitan sarğısını da qoluna keçirməyə imkan tapıb.
Növbəti belə futbolçu da məhz “Bakı” klubunda oynayıb. Belə ki, 2005-ci ilin yayında klub Latviya yığması ilə AÇ-2004-də iştirak etmiş Andrey Ştolsersi heyətinə qatıb. Qitə kubokunda cəmi 7 dəqiqə meydanda olan hücumçunun Azərbaycan karyerası elə də uğurlu alınmayıb. O, paytaxt klubunun heyətində 10 görüşdə 4 dəfə rəqib qapısına yol tapmağa müvəffəq olub.
AÇ-2004-də Latviyanın heyətində iştirak etmiş daha bir futbolçu – Andrey Rubins ölkəmizdə oynadığı müddətdə 3 klubun şərəfini qoruyub. İlk olaraq, “İnter”də çıxış edən futbolçu ardınca “Qarabağ”a transfer olunub. Onun həm Azərbaycanda, həm karyerasında son klub isə tarixin yaddaşına köçmüş “Simurq” olub.
2010/11 mövsümünü icarə əsasında “Xəzər Lənkəran”da keçiriən Uinston Parks isə 2002-ci il Kosta-Rika millisi ilə DÇ-də iştirak etməklə yanaşı hətta fərqlənməyə də müvəffəq olub. Onun vurduğu qol isə yəqin ki, azarkeşlərmizə tanışdı. Qardaş Türkiyə yığması ilə matçda sonradan meydana daxil olan Parks son dəqiqələrdə komandasının bərabərlik qoluna imza atmışdı. Hücumçu cənubluların heyətində meydana çıxdığı 28 qarşılaşmada 8 dəfə rəqib komandaları məyus edib.
Elə həmin mövsüm AZAL-ın şərəfini qoruyan nigeriyalı Pius İkedia da Uzaq Şərqdəki mundialın iştirakçılarından olub. O, həmin çempionatda hər 3 matçda sonradan meydana girsə də, millisini növbəti mərhələyə daşıya bilməyib. Cəmi 1 il “təyyarəçilər”in formasını geyən afrikalı bu müddətdə 21 oyunda 1 dəfə fərlənib.
DÇ-1998-də Yamayka yığması ilə 3 matçda meydana çıxan Dean Barton isə 2 il “Qəbələ”nin şərəfini qoruyub. Bu müddətdə 49 matça çıxan hücumçu 15 qola imza atıb.
Ölkəmizdə çıxış edən legionerlər arasında Emil Mpenza bəlkə də, ən tanınmışıdı. 2 Dünya (1998,2002), 1 Avropa çempionatının (2000) iştirakçisi olmuş belçikalı forvard 2010-cu ildə transfer olduğu “Neftçi”də istəniləni vermir. Bakılılara transfer olunmamışdan öncə İsveçrə çempionatında “Syon”un heyətində 31 görüşdə 21 qol vuran hücumçu Azərbaycanda eyni məhsuldarlığı nümayiş etdirə bilmir. O, 2 mövsüm ərzində “Syon”dakı ilə eyni sayda matça çıxsa da, cəmi 6 dəfə rəqib qapıların torunu silkələyir.
Latviya millisinin tarixində ən çox qol vuran futbolçu sayılan Maris Verpakovskis də Ştolsers kimi “Bakı”da çıxış edib. O da digər həmyerliləri kimi AÇ-2004-ün iştirakçısıdı. Komandasını demək olar ki, təkbaşına qitə kubokunun final mərhələsinə çıxardan Verpakovskis, millisinin turnirdəki yeganə qolunun da müəllifidi. Üumiyyətlə, forvard Latviya yığması tarixində ən çox qol vurmuş oyunçudu.
Kosta-Rikalı Randall Brenes isə adı siyahıda olan digər futbolçulardan seçilir. Belə ki, o, başqalarından fərqli olaraq, “Xəzər Lənkəran”da çıxış etdikdən sonra DÇ-na yollanıb. 2012-ci ildə cənubluların heyətində 11 matçda 4 qol vuran futbolçu komandadan ayrıldıqdan 2 il sonra Brazilyadakı mundiala yollanıb. Yığmasının keçirdiyi 5 matçın 3-də əvəzetmədən daxil olan Brenes bu görüşlərdə qol vurmağa müvəffəq olmayıb.
2014-cü ilin qışında “Rəvan”a transfer olunan Kamil Kopuneki isə İtaliya millisinin qənimi saymaq olar. Belə ki, DÇ-2010-un qrup mərhələsinin son turunda Slovakiyanın appeninliləri 3:2 məğlub edərək qrupda saxladığı qarşılaşmada yarımmüdafiəçi komandasının 3-cü qolunu vurmağa müvəffəq olub. Kopunek “sarı-qırmızılılar”ın heyətində meydana çıxdığı 11 matçda qol hesabını aça bilməyib.
Emip Mpenza kimi Marat İzmayılov da zəngin karyeraya məxsusdu. Rusiya millisi ilə 1 Dünya (2002), 2 Avropa çempionatının (2004, 2012) iştirakçısıdı. O, 2014-cü ildə qış fasiləsindən sonra “Qəbələ”də icarə əsasında çıxış edib. O, 2 DÇ, 4 AÇ matçında meydana çıxıb. Futbolçu əyalət təmsilçisinin heyətində meydana çıxdığı 14 qarşılaşmada 1 dəfə qol sevinci yaşayıb.
ELMAR ABDULLA-ZADƏ
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”