Yusif Vəliyev: “Həmin məşqçilər “qara siyahı”ya salınıb”

AFFA-nın Uşaq və Gənclər üzrə yarışlarının təşkili şöbəsinin rəisi Yusif Vəliyevin futbolinfo.az saytına müsahibəsi.

– Ötən mövsümün yekunları barədə fikirlərinizi bilmək istəyərdik.
– Əvvəlki illə müqayisədə bir sıra irəliləyişə nail olmuşuq. Doğrudu, həll edə bilmədiyimiz problemlər də qalıb. Qarşıdakı mövsümdə bunları da aradan qaldırmağa çalışacağıq.

– Konkret olaraq, hansı problemlər aradan qalxıb və nələrin öhdəsindən gələ bilməmisiniz?
– Ümumi götürdükdə, əvvəlkindən də çox oyunda texniki məğlubiyyətlər qeydə alınıb. Ancaq məsələ burasındadı ki, komanda ümumi oyun sayının 50 faizindən az keçiribsə, ona bütün qarşılaşmalara görə texniki məğlubiyyət verilir. Əslində çempionatdan kənarlaşan komandaların sayı azalıb və bu, gördüyümüz işin bəhrəsidi. Əlbəttə, istəyərdik ki, ümumiyyətlə, heç bir komanda çempionatı tərk etməsin. Ancaq bu, kütləvi futboldu. 10-14 yaşlılar arasında 300-400 kollektiv yarışır. Belədə, kimlərinsə çempionatdan imtina etməsi təbiidi.

– Əvvəlcədən yoxlanış aparıb, komandadakı durumu öyrənmək fayda vermir?
– Biz hər bir iştirakçı komandaya diqqət yetiririk. Adətən komandaların rəhbər şəxsləri məşqçiləri olur. Ancaq gedib izlədikdə, məşq prosesinin normal keçdiyini görürük. 4-5 turdan sonra isə yarışdan imtina edirlər. Halbuki komandaların nəqliyyat xərclərini də AFFA öz üzərinə götürür.

– Həmin komandalara qarşı sanksiya tətbiq olunurmu?
– Bəli, bu kollektivlər AFFA-nın bayrağı altında keçirilən yarışlara buraxılmır.

– Bəs, sabah eyni məşqçi, eyni uşaqları başqa komanda adı altında toplasa necə?
– Doğrudu, bu cür hallar yaşanıb və atdığımız növbəti addım dediyiniz problemi də aradan qaldıracaq. 2015-2016 çempionatında komandaları yarışı yarımçıq tərk edən məşqçilərin siyahısı tutulub. Həmin məşqçilərin rəhbərliyi altında heç bir kollektiv növbəti çempionatda iştirak edə bilməyəcək. Belə deyək, həmin məşqçilər “qara siyahı”ya salınıb.

– Ötən mövsüm əsas problemlərdən biri də yuxarı yaş qrupları üzrə komandaların oyunlarının həftəiçi keçirilməsi idi. Belədə, uşaqlar məktəbdəki dərsləri buraxmalı olurdular.
– Bu məsələylə bağlı Premyer Liqa klublarının nümayəndələri ilə görüşümüz olub. Ayın sonunda daha bir toplantı keçirəcəyik və bundan sonra yekun qərar veriləcək. İndidən deyə bilərəm ki, məsələ böyük ölçüdə həllini tapıb. AFFA tərəfindən oyunları şənbə və bazar günləri keçirilməsində heç bir problem yoxdu. Bir sıra komandalar ev oyunlarını istirahət günü keçirmək üçün şəraitə sahib olduqlarını bildirib. Son qərar ayın sonunda verilsə də, indidən deyə bilərəm ki, böyük ehtimalla növbəti mövsüm bir neçə yaş qrupu üzrə çempionat oyunları şənbə və bazar günləri keçiriləcək.

CEYHUN ƏLİYEV