Ölkə futbolu
"Şkendiya"nı favorit edən səbəblər
Bu gün "Neftçi" üçün sınaq g&u…
Bu gün "Neftçi" üçün sınaq günüdü. Sınıq-salxaq heyət, yerində olmayan əhval-ruhiyyə, evdə 4 illik qələbəsizlik sindromu və mobil komanda təsiri bağışlayan "Şkendiya"…
Makedoniya klubu qorxulu rəqib deyil. Amma bakılıların "Baltsan"la oyunlarına əsasən deyə bilərik ki, hətta ən zəif rəqib də bu gün "Neftçi" üçün keçilməz sədd təsiri bağışlayır. Axı, "Neftçi"nin quru adı qalıb.
Zəif oyun heç də nə rəhbərliyin, nə də baş məşqçi Vəli Qasımovun günahıdı. "Neftçi"nin aciz görünməsinin səbəbi maliyyə problemləridi. Vəziyyət o qədər acınacaqlıdı ki, bir neçə il öncə 2-3 futbolçuya verilən maaş indi az qala bütün kollektivin əməkhaqqısından üstün idi. Belədə "Neftçi" 3000 dollara oynayan legioner gətirməyə məhkumdu, daha böyük paralar tələb edənlər üçün qapı açıq deyil.
Əslində, klubun büdcəsi də az deyil. "Qarabağ" və "Qəbələ"dən sonra maliyyə baxımından ilk "üçlüy"ü məhz bakılılar tamamlayır. Fərq ondadı ki, 5 milyon manatlıq büdcə indi təkcə klubun bugününə xərclənmir. Klubun bazası da o pulla tikilir, köhnə borclar da həmin məbləğlə "bağlanır".
Təkcə sanksiyadan qaçmaq, Emil Mpenzayla əldə olunan razılığa əməl edilməsi üçün ödənilən məbləğə komandanı xeyli gücləndirmək olardı. 6 aydı belçikalının hesabına hər ay 199 min dollar köçürülür – bu pul isə 7-8 yüksək səviyyəli oyunçunun aylıq maaşı ola bilərdi. Amma köhnə rəhbərliyin vaxtında buraxılan səhvlərin cəzasını "Neftçi" məhz indi çəkməyə məhkumdu. Həm də təkcə Mpenzayla iş bitsəydi, nə var idi ki… Flavinyo, Kaue və başqaları da qalan pullarını elə bugünlərdə alıb qurtarıblar.
Bu səbəbdən "Neftçi" niyə güclənmədi" tipli sualların cavabı aydındı. Rəhbərlik bunu açıqlamaq istəmir, çünki sponsorunun imicinə xələl gəlməsini, büdcənin azaldıldığının bəyan edilməsini məqsədəuyğun bilmirlər. Axı, əvvəlki "Neftçi"nin də, indiki komandanın da hamisi, pulverəni eyni mənbədi. Sadəcə, dişi dişə sıxıb dözmək, imkan daxilində vəziyyətdən alnıaçıq çıxmaq lazımdı.
Zaman gözləmir. Bu mövsüm "Neftçi"nin 80 illiyidi. Yubiley mövsümündə hamı komandadan çempionluq, avrokubokda uğur gözləyir. Bunun üçün real maddi baza isə yoxdu. "Şkendiya" ilə oyunda mümkün uğursuzluqdan sonra rəhbərlik, baş məşqçi hədəfə götürüləcək. Görünür, onların taleyinə tənqid olunmaq yazılıb. Hər halda, kimləri isə sudan quru çıxartmaq üçün bu, barışılan taledi.
Qışda klubun Müşahidə Şurasının sədri Çingiz Abdullayev əcnəbi məşqçidən danışırdı, lap yaxınlarda isə xaricdən idman direktoru gətirəcəklərini demişdi. Amma reallıqda bunların heç biri yoxdu. Çünki ona da vəd edilən "qızıl dağlar"a qar ələnib. O isə arzuladığını, ona vəd olunanları deyir, sözləri reallaşmayanda səbəbini açıqlayıb sponsorları, onu bu işə sövq edənləri "güllə qabağına" atmır. Beləcə zaman gedir, "Neftçi" yaxşı nəticələrin arzusuyla daha da qocalır.
Amma "Şkendiya" ilə oyunda komandadan uğur tələb edəcək azarkeşlərə bunun isti-soyuğu yoxdu. Onlar gedən səviyyəli oyunçuların yerinə nəyə görə zəif, sıradan əcnəbilərin gətirilməsini anlamaq istəmir. Azarkeşi nəticə maraqlandırır, büdcənin azaldılması, xərclərin minimuma endirilməsi yox. Qasımov tənqid olunur, o isə dönüb ehtiyat oyunçular skamyasına baxanda komandanı canlandıracaq heç kimi tapa bilmir. Nə Flavinyo var, nə Vobay, nə Kanales, nə Ramos, nə Anyete, nə də başqa biri. Təcrübəsiz gənclər, Premyer Liqa matçları üçün belə yaramayan futbolçularla isə uzağı "Baltsan"ı keçmək olardı. Onu da bəxtəbəxt…
Elə bu səbəbdən "Şkendiya" əzəmətli, favorit görünür. Halbuki bu komanda "Zirə", AZAL kimi komandaların da yenə biləcəyi rəqibdi.
FƏRİD
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”