Ölkə futbolu
"Qarabağ" ayılmasa, era bitəcək!
“Qəbələ”dən qələbə, “Qarabağ”dan isə …
“Qəbələ”dən qələbə, “Qarabağ”dan isə sərfəli nəticə gözləyirdik. Roman Qriqorçukun komandası işinin öhdəsindən əla gəldi. Bakıda əldə edilən 3:1 hesablı zəfər “qırmızı-qaralar”ın Avropa Liqasının qrup mərhələsinə gedən yolunu aydınladacaq qədər parlaqdı.
“Qarabağ”ın durumu isə bir qədər fərqlidi. “Fərqli” deyərkən, yalnız Ağdam klubunun İsveçdə “Höteborq”a uduzmasına eyham vurmuruq. Əsas sıxıntı son illər avrokuboklarda qürur yerimiz olan komandanın öz yolunu yadırğamasıdı: “Qarabağ” bilmir ki, hansı yana getsin: it hürən tərəfə, yoxsa işıq gələn…
Bizim tanıdığımız “Qarabağ”ın öz dəsti-xətti vardı – rəqibin kimliyindən asılı olmayaraq, çıxıb öz oyununu oynayardı. Ağdamlılar bu mövsüm bunu bacarmadıqları üçün Çempionlar Liqasında mübarizəni dayandırdılar. “Viktoriya” ilə duellərdə adət etdiyimiz komandanı görə bilmədik. Ancaq “Höteborq”la matçın ilk dəqiqələrdinə elə hiss yarandı ki, Qurban Qurbanovun rəhbərlik etdiyi kollektiv səhvlərdən nəticə çıxardıb.
“Köhlən atlar”ın ardıcıl hücumları erkən qoldan xəbər verirdi. Almeydanın matçın əvvəlində qapıçı ilə üzbəüz qaldığı epizodda “qoool” deyib, ayağa da qalxdıq. Gəl ki, 90 dəqiqə ərzində top yalnız 1 dəfə tora getdi, onda da bizim qapımıza.
Düzdü, “Qarabağ” İsveçdə xoşbəxtliyi müdafiədə deyil, hücumda axtarmağa cəhd etdi. Lakin lazım olanı bacaramdılar – son nöqtəni qoyan tapılmadı. Yalnız ona görə yox ki, meydan sahibləri arxaya çəkilib savadlı oynadılar. Fikrimizcə, ağdamılalrın qol vurmamasının əsas səbəbi futbolçularımızın öncəki matçlarla müqayisədə, məsuliyyətsiz və bir qədər də istəksiz olmalardın irəli gəlir. Təbii ki, onlar fərqlənməyi bizdən də çox istərdilər. Ancaq istəməklə iş bitmir. “Qarabağ” qol vurmaq üçün potensialının 70 faizini belə ortaya qoya bilmədi…
Təbii ki, günahı yalnız ön xətt oyunçularının üzərinə qoymaq da düz deyil. Digər tərəfdən, indiki durumda tənqidin “barıtını” çox etməyə də gərək yoxdu. Yalnız onu qeyd edək ki, müdafiənin mərkəzindəki Rəşad Sadıqov – Bədavi Hüseynov cütlüyü əvvəlki qədər etibarlı deyillər…
Nə etmək olar, 1 cavabsız qolla uduzduq. Ancaq bu, faciəvi nəticə də deyil. Düzdü, “Höteborq”un evdə qol buraxmaması komandamızın işini bir qədər çətinləşdirir. Lakin tapşırığın öhdəsindən gəlmək mümkündü. Yetər ki, “Qarabağ” öz yolunu getsin. Həmin yolun sonu aydınlıqdı…
Ağdamlılar Bakıda məsələni bir hissəyə də həll edə bilər. Cavab matçında güclü azarkeş dəstəyinə ehtiyac olmayacaq. Faciədən qaçmaq üçün oyunçular da toparlanmalıdı. Məşqçilər ənənəvi oyun üslubundan imtina etməməlidi, lakin hücumu məntiqi sonluğa çatdırmaq üçün heyətdə müəyyən dəyişikliklər lazımdı. Səfər oyunlarında uğursuz nəticələr bir yana, komanda qol vurmaqda çətinlik çəkir. Mahir Mədətovla küsülülüyü bitirmək, ya da yeni transfer Dino Ndlovudan faydalanmaq lazımdı. "Qarabağ"da məhsuldar forvard yoxluğu ciddi şəkildə hiss olunur.
"Höteborq"la cavab matçı həyati əhəmiyyətə malikdi. Rəqib o qədər də güclü deyil. Vurulacaq ilk qoldan sonra isveçlilər pərən-pərən düşəcək. Amma bu olmasa, "Qarabağ"ın özündə problem yaranacaq, futbolçular təşvişə düşəcək, tələskənlik isə səhvlərə səbəb olacaq.
Ağdamlılar unutmamalıdı ki, tarix şans qapıdadı, ardıcıl 3-cü dəfə qrupa düşmək üçün bütün iplər öz əlindədi. Bunu dəyərləndirə bilməsələr, bəlkə də uzun bir eranın sonu olacaq, maddi zərbələr üst-üstə dəyəcək, bahalı legionerlərdən imtina ediləcək və komanda sıradan kollektivə çevriləcək. Ona görə də cavab oyunu çox önəmlidi. "Höteborq" mütləq məğlub edilməlidi. "Qarabağ" rəqibdən çox güclüdü və 0:1-i ümumi qələbəyə çevirmək üçün silkələnmək lazımdı.
AĞA
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”