Ölkə futbolu
Azərbaycanda gizlənən İran ordusu
Ölkə çempionatının birinci divizionunda mübarizəy…
Ölkə çempionatının birinci divizionunda mübarizəyə start verildi. Bu yarış eyni zamanda bir sıra eybəcərlikləri və müəmmaları da özü ilə gətirdi.
Diviziondakı limit oyununun səbəbi çoxdu. Amma apardığımız bir araşdırma göstərdi ki, məsələ heç də yerli oyunçu sayında və ya yeniyetmə futbolçulara şans yaradılmasında deyil.
İndiyəqədərki iştirak ərizələrinə əsaslansaq, bu mövsüm aşağı dəstədə 16 legioner var və bunlardan 11-i (!) iranlıdı – 69%. Onların məskunlaşdığı klublara diqqət edək:
Rəvan – Omid Masumi, Saed Faxarişalde, Çangiz Şahriari, Cavid Taleb.
Şahdağ – Seyedaydın Hosseyni, Ziai Seyedhosseyn.
Energetik – Sepehr Torkamanianafşar, Vahid Rostami.
Bakılı – Hadı Azımı, Mohammadcafar Mazrai.
Mil-Muğan – Seyidhəmid Mirabdullahi.
İlk baxışdan normal mənzərədi. Yaxın qonşu, ucuz işçi qüvvəsi, dil, mədəniyyət yaxınlığı və s. Amma…
Gəlin, “Rəvan”ın heyətinə baxaq. Komandanın əsas qapıçızı Tural Abbaszadə, onun ehtiyatı Fərid Ağayevdi. Yalnız 3-cü qapıçı iranlıdı. Sizcə hansı ağlı başında olan klub rəhbəri bu yerə legioner qapıçı götürər?
Bu oyunçuların kimliyini araşdırmaq üçün müxtəlif internet qaynaqlarına baş vurduq. Təsəvvür edin ki, 11 oyunçudan 11 hərflik məlumat əldə edə bilmədik. Bunlar normal futbolçudusa, niyə haqqlarında bir kəlmə də yoxdu, futbolçu deyillərsə, Azərbaycanda nə itləri azıb?
Futbolçuların təvəllüdləri müxtəlifdi. 1988-ci il doğumlusu da var, daha gənci də. Ən balacası 18 yaşındadı. Əksəriyyəti yarımmüdafiəçi və ya hücumçu olsa da, ilk turda komandalarının uğurunda heç bir rol oynamayıb, çoxu heç heyətə düşə bilməyib.
Əcəba, divizion klublarının belə əcnəbi sevgisinin səbəbi nədi?
Kiçik araşdırma apardıq və bəlli oldu ki, onların hamısı əsgərlikdən yayınanlardı. Ötən mövsüm AZAL, “Rəvan” və “Kəpəz”də belə problem yaranmış, hətta gəncəlilər bəyanat verməyə məcbur olmuş, onların adından istifadə edən işbaz menecerləri ifşa etmişdi. İranlılar bu işlərlə məşğul olan menecerlərə 5 min dollar haqq ödəyir, menecerlər də məşqçilərlə işbirliyinə girib onları klublara yerləşdirir. Nəticədə məşqçilər, menecerlər ehtiyatda qalaraq oynamayan və ya say düzəldən bu futbolçular sayəsində müəyyən miqdarda pul qazanır, iranlılar isə “ölkə xaricində işləmək” limitindən yararlanaraq əsgərlikdən yayınırlar. Qonşu ölkədə buna imkan verən qanunlar mövcuddu.
Bu işlərlə kim məşğul olur? Sualın cavabında ilk olaraq yada Adil Mahmudov düşür. Ötən mövsüm “Şəmkir” üçün menecerlik edən bu şəxsin bazarlıq edən zaman lentə alınan videosunu futbolinfo.az-da izləmisiz. İndi isə rəhbərlik etdiyi “Şahdağ”da 2 iranlıya yer verib.
“Rəvan”da bu iş daha kütləvi xarakterlidi. İranlı futbolçuları gətirən menecerlərlə işbirliyini müsahibəsində etiraf edən “aslanlar”ın baş məşqçisi Bəhmən Həsənov 4 futbolçunu birdən sifariş edib. Onlardan da biri – yuxarıda qeyd etdiyimiz kimi – 3-cü qapıçı kimi götürülüb. Söhbət təkcə 5 min dollarla bitsəydi, nə vardı ki? Razılaşmaya əsasən, bu futbolçuların adına yazılan maaşlar da klub məşqçilərinə çatır. Yəni ki, “Rəvan”ın sahibi Nuru Əliyevin futbola yatırdığı pullar iranlının vasitəsi ilə baş məşqçi Bəhmən Həsənovun cibinə “uçur”.
Bu praktika “Rəvan”da yeni deyil. Hələ ötən mövsüm Həsənov komandaya 3 iranlı götürmüşdü. Onlar 6-7 ay klubun bazasında qaldılar, müqavilə bağladılar, amma çempionat üçün sifariş olunmadılar. Sonra isə yoxa çıxdılar. Yaxınlarda həmin iranlılardan biri ilə ADBTİA-nın stadionunda rastlaşdıq. Fərdi məşq edən əcnəbidən vəziyyəti ilə maraqlandıqda maraqlı cavab aldıq: “Hələ axtarıram, görüm hansı komandaya adımı yazdıra bilərəm?” “Hansı komandada oynaya bilərəm?” yox ha, “hansı komandaya adımı yazdıra bilərəm?”
Hazırda iranlı futbolçu gətirmək biznes sahəsinə çevrilib. Orduya getmək istəməyən gənclər bu yolla aradan çıxırlar, Bəhmən Həsənovun əliylə Nuru Əliyev, Adil Mahmudovun vasitəçiliyi ilə digər klubların rəhbərləri İran ordusuna “xidmət edir”.
Bu futbolçuların miqrasiya ilə bağlı problemləri çıxır, həll etmək üçün hər cür xərcə razılaşırlar. Əks halda, vətənə qayıdan kimi onları əsgər aparırlar. Onlar da xərcə qatlaşıb ölkəmizdə qalırlar ki, hərbi xidmət yaşları bitənə kimi vətənə dönməsinlər.
Özünüz fikirləşin: futbolçusuna 150-200 manat maaş verə bilməyən “Energetik” 2 iranlı legioneri niyə transfer etsin ki? Və ya elitada oynayarkən əcnəbi gətirə bilməyən, gətirdiklərinə külli miqdarda borcu qalan “Rəvan” birdən-birə 4 iranlını haradan tapdı? Səviyyəsi olan legioner Ramazan Abbasovu 400 manat verib saxlaya bilməyən kluba gələrmi?
İranda idmana və təhsilə görə ölkə xaricində olan şəxslərə müəyyən yaşa qədər hərbi xidmətdən möhlət verilir. Gərək ki, 30 yaşdan sonra onlar əsgərliyə çağırılmır. Haqqında danışdığımız qonşu ölkə nümayəndələri də bu şansdan rüşvət hesabına yararlanır.
Deyəsən, bu biznes yavaş-yavaş elita klublarına da ayaq açır. “Sumqayıt” 2 iranlını sifariş edib, AZAL da dünən ikisi ilə müqavilə bağladı. Maraqlıdı ki, onlardan yalnız biri haqda internet qaynaqlarında məlumat var. “Sumqayıt”ın transfer etdiyi Afşin İsmailzade 10 il ərzində müxtəlif klublarda 46 oyuna çıxıb, İranın müxtəlif millilərində (U-17 – 12, U-22 – 1) 13 matça çıxıb. Baxanda görürsən ki, pis-yaxşı – futbolçudan danışırıq. Ancaq digər 3 oyunçu haqda hələ araşdırma aparmaq lazımdı. Diviziondakı iranlıları isə axtarmayın, çünki onlar topu da yəqin ki, ölkəmizdə tanıyıb.
Göründüyü kimi, İran ordusu Azərbaycan çempionatının I divizionunda gizlənir. Kimin pul qazanması, kimin rüşvət alması bizim problemimiz deyil, lakin unutmayaq ki, fırıldaqşıların qazanc mənbəyi olan bu şəxslər neçə-neçə azərbaycanlı balasının qarşısını kəsir.
FƏRİD
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”