Premyer-liqa
40 günlük “atəşkəs” öncəsi…
Topaz Premyer Liqası rəsmən məzuniyyətə çıxdı. Yanvarı…
Topaz Premyer Liqası rəsmən məzuniyyətə çıxdı. Yanvarın 28-dək elita klubları həm istirahət edəcək, həm də çatışmazlıqları aradan qaldırmağa çalışacaq. Kimlər üçünsə 14-cü tur bayram ab-havası yaratdı, kimlərsə onsuz da “yıxılan evlərinə” dəyən növbəti dəyənəkdən sonra daha da sarsıldılar.
AZAL nəhayət, çempionatda ilk qələbəsini qazandı… əlbəttə ki, “Neftçi” üzərində. “Ağ-qaralar”ı məğlub etməyən yeganə kollektiv Tərlan Əhmədovun yetirmələri idi ki, onlar da 2-ci dövrənin son turunda “planı yerinə yetirdilər”. “Biz flaqmanıq”, “bizim tarixi uğurlarımız var” deməklə isə nə xal verən var, nə də qələbə. İndi “Neftçi” rəhbərliyi “papağını qabağına qoyub” fikirləşməli və cəmi 1 suala cavab tapmalıdı: vəziyyətdən necə çıxmalı?
Əgər bu suala cavab/məlhəm tapa bilməyəcəklərsə, qoyulan sualın son sözünə (çıxmalı) müraciət etməli olacaqlar. Başqa çarə yoxdu. Komandadan hamı nəticə gözləyir, mövsüm yarı olub, “Neftçi” isə hələ də ardıcıl 2 qələbə qazana bilməyib. İndi “ağ-qaralar” sonuncu pillənin sahibi AZAL-dan cəmi 1 xal öndədilər.
AZAL siftəsini 14 tur gözləməli olsa da, minimal əməkhaqqına oynatdığı futbolçularla buna da şükür etməlidi. Hər halda, komanda ilk qələbəsini qazandı və nəzərə alsaq ki, qarşıda “Neftçi”ylə hələ 2 oyunu var, minimum daha 2 dəfə eyni sevinci yaşamaq şansını saxladığını söyləyə bilərik.
“Zirə” yenə uduzdu. Bu dəfə “Sumqayıt”a. Çempionatın ortababına çevrilən ötənilki gümüş mükafatçı qışda ciddi islahatalara əl atmasa, çətin ki, cari mövsümdə nəyəsə ümid edə bilər. Axı, Adil Şükürovun yetirmələri de-fakto, ölkə Kuboku uğrunda mübarizədən də kənar qalıblar. Hətta Şükürov istefaya göndərilsə belə, bunda təəccüblü bir şey görməyəcəyik. Hər halda, mövsümün yarısı geridə qaldığı bir vaxtda, “Zirə” keçirdiyi oyunların 50 faiizindən məğlub ayrılıb. Bu da klub rəhbərliyini qane edə bilməz.
“Sumqayıt”ın 4-cü pilləyə yüksəlməsi nə qədər təəccüblü olsa da, bir o qədər də qanunauyğundu. “Kəpəz”, “Zirə”, “Neftçi” komandaları qeyri-sabit futbol oynayırsa, 4-cü yerə çıxmaq üçün əlahiddə istedad nümayişinə ehtiyac qalmır. Samir Abasovun rəhbərlik etdiyi komandanın qələbə/məğlubiyyət saldosu mənfidi – cəmi 4 qələbəyə sevinən “Gənclik şəhəri”nin təmsilçisi 5 dəfə uduzub. Ancaq bu göstərici belə, “Sumqayıt”ın 4-cü yerə yüksəlməsinə kifayət edib. Bu da çempionatın səviyyəsinin faciəvi səviyyəyə enməsindən qaynaqlanır.
Hakimlərin “xüsusi xidməti” sayəsində “Neftçi”dən alınan məğlubiyyəti saymasaq, “İnter” markasını “Qarabağ”la oyunda da qorudu. Əlbəttə, ağdamlılar daha çox hücum edir, real qol təhlükələrini sıralayırdı. Lakin “bankirlər”in fədakarlığı sonda 1 xala sevinmələrini təmin etdi.
Bu xal itkisi “Qarabağ”ı lider kürsüsündə saxlasa da, “Qəbələ” fərqi minimuma endirməyi bacardı. “Kəpəz”lə görüşdə Əliyar Ağayev “penalti planı”nı artıqlaması ilə yerinə yetirdi. FİFA referisi qonalqların qapısına təyin etdiyi 2 penaltidən sonuncusu kifayət qədər şübhəli oldu. Bunu hətta “Qarabağ”la oyunda Rəhim Həsənovun buraxdığı səhvlərin kompensasiyası kimi qələmə verənlər də oldu. Bütün hallarda, “Qəbələ” qış fasiləsinə major notda yollanmağı bacardı.
“Kəpəz” isə ötənmövsümkünün kölgəsini xatırladır. Elə turnir cədvəlində qərarlaşdığı mövqe də bunun bariz nümunəsidi. Elə 14 tur ərzində vur-tut 3 qələbəyə sevinməsi də gəncəlilərin böhran içində olmasından xəbər verir.
Hələliksə, yanvarın 28-dək çempionatda “atəşkəs” elan olunur. Bu 40 gündən kimin necə yararlanacağı mövsümün həlledici mərhələsində üzə çıxacaq.
CEYHUN ƏLİYEV
- Ölkə futbolu2024-04-26 08:00
Juninyo – Avropanın ən yaxşı braziliyalısı
- Ölkə futbolu2024-04-26 09:08
“Qarabağ”ın ildən-ilə böyüməsi məni qətiyyən təəccübləndirmir”
- Ölkə futbolu2024-04-26 10:17
Samir Abasov Laporta ilə görüşdü
- Müsahibə2024-04-26 12:11
Veşoviç ikinci titulu istəyir: “Rəqib formada olan çətin komandadır”