Gözümüzün “ağ-qarası”…

80 yaş, 80 il. Çoxumuzun bəlkə də görə bilməyəcəyimiz qədər bir ömür, məktəb. Özü də necə bir məktəb… Hansı ki, bu məktəbdə Ələkbər Məmmədov, Anatoli Banişevski, Kazbek Tuayev, Valeri Hacıyev, İsgəndər Cavadov, Maşallah Əhmədov kimiləri təhsil alıb.

Bu gün ölkəninən köklü, titullu klubunun 80 yaşı tamam olur. 1937-ci ildə əvvəllər “Balaxanı Futbolçular Dərnəyi” və “Proqress” adları ilə fəaliyyət göstərmiş Lenin rayonunun (indiki Sabunçu) “Leninneft” neftçıxarma idarəsinin komandası neftçilərə məxsus ən güclü kollektiv olduğundan bu komandanın bazası ətrafında yaradılıb. 1968-ci ilə kimi “Neftyannik” adını daşıyan paytaxt təmsilçisi artıq  49 ildi ki, “Neftçi”di. 

Bu 80 ildə komandanın tarixinin böyük hissəsi SSRİ ilə bağlı olub. İttifaq yarışlarında ölkəni daim təmsil edən “ağ-qaralar”ın ən böyük uğuru 1966-cı ildə SSRİ çempionatında qazanılan bürünc medallardı.

Komandanın taleyi də elə rəngləri kimi “ağ-qara”dı. 60-cı illərin ikinci yarısında tarixinin ən güclü vaxtlarından birini yaşayan komanda 70-ci illərin böyük hissəsini birinci dəstədə keçirməli olub. Daha sonra 10 il də güclülər dəstəsində çıxış edən komanda 88-ci ildə birdəfəlik elitanı tərk edib. 

SSRİ dağıldıqdan sonra 1992-ci ildən bəri keçirilən müstəqil Azərbaycan çempionatının 2 daimi sakinindən biri olan “Neftçi” ölkəmizin ən titullu klubudu.
Azərbaycan çempionuluğu – 8 (1992, 1995/96, 1996/97, 2003/04, 2004/05, 2010/11, 2011/12, 2012/13) 
Azərbaycan kuboku – 6 (1994/1995, 1995/1996, 1998/1999, 2003/2004, 2012/2013, 2013/2014)
Azərbaycan superkuboku – 2 (1993, 1995)
Birlik kuboku – 1 (2006) 

Devizi “İlklər alın yazımız” olan komanda həqiqətən də bir çox ilkə imza atıb. Hazırda fəaliyyət göstərən komandalar arasında ilk yarananı, ilk Azərbaycan çempionu, təmsilçilərimiz arasında avrokuboklarda ilk xal və ilk qələbə qazanan və ən əsası, avrokubokların qrup mərhələsinə vəsiqə qazanan ilk Azərbaycan klubu. Tarixin hər cür sınağından, keşməkeşindən keçən bir klub…

Bilinməyir yaşın sənin,
Nələr çəkmiş başın sənin…