Ölkə futbolu
Uşaq futbolunda uduzduğumuz oyun
Milli komanda ölkə futbolunun güzgüsüdü. Onu…
Milli komanda ölkə futbolunun güzgüsüdü. Onun hansı səviyyədə olması bütün mənzərəni göz önündə canlandırır. Əsas yığma uşaq futbolunun, klub futbolunun, ümumiyyətlə, bu idman növü ilə bağlı seçilmiş strategiyanın tablosudu.
Almaniya ilə oyun bəlkə də müqayisə üçün yersizdi. Dünyanın bir nömrəli komandası ilə matça çıxırsansa, milli komandadan xal(lar) gözləmək fantastikadı. Yox, AFFA prezidentinin dediyi kimi, almanlara uduzmağı şərəf hesab etmirəm. Sadəcə, belə komandaya yenilgi qəbulediləndi. O başqa məsələ ki, uduzmağın da səbəbləri olur və onu aradan qaldırmaq yolları haqda düşünmək həmişə aktualdı.
Almanlara qol vurmaq yaxşıdı, ardıcıl 3 oyundu bunu bacarırıq. Bu, kifayətdimi? Əsla! İnkişaf üçün hər məğlubiyyət dərs olmalıdı, hər növbəti oyunda daha yaxşısına çalışmalısan.
Hə, komanda döyüşdü, mübarizə apardı, oynamağa çalışdı. Lakin tank üzərinə əlibaltalı getməklə döyüşü udmaq olmaz. Rəqibdən zəifsənsə, öz üstünlüklərini kəşf etməlisən, “səngər”də oturub, az itki vermək üçün daha yaxşı müdafiə planı fikirləşməlisən. İş ondadı ki, bizim döyüşçülər bunu da bacarmır, sanki adi “müharibə bilikləri” yoxdu.
Robert Prosineçkinin oyun anlayışını tənqid etmək çətindi. Onun yerində mən də baş məşqçi olsaydım, oxşar heyət, oxşar taktika qurardım. Bəlkə də ideal deyildi, amma ən yaxşı oyun qurğularından biri düşünülmüşdü. Almanları mərkəzdə qarşılayıb, əks-hücumlarda qol vurmağa cəhd – dünya nəhənginə qarşı hücum futbolu oynamaycaqdıq ki? Rəqib kiçik səhvi bağışlamayan biridisə, xüsusilə diqqətli olmalısan. Hecə ki, onlar bütün qolları məhz bunun sayəsində vurdular.
Məğlubiyyətin başlıca səbəbi oyunçuların ustalıq səviyyəsi arasındakı fərq idi. Almanlar hamıya qarşı oynadıqları kimi çıxış etdilər. Fərq onda idi ki, 4 gün əvvəl qarşılaşdıqları İngiltərə bir səhv etdi, bizimkilər daha çox. Bu da ifaçılara bağlı olan bir şeydi.
1-ci və 3-cü qollarda Məhəmməd Mirzəbəyovun, 2-cidə Əfran İsmayılovun, 4-cüdə ikisinin birgə səhvi qolla nəticələndi. Lakin iş ondadı ki, onlar sadəcə, görünən simalar idi – qollar, qol ötürmələri onların cavabdeh olduğu sağ cinahda reallaşdı. Bəs, onları sığortalamalı olan oyunçular?
Almanlar bütün qollarda eyni stilə sadiq qaldılar: hücumda çoxaldılar, başgicəlləndirici kombinasiyalarla müdafiəni dar bir sahəyə yığıb, topu ustalıqla digər cinaha yönəltdilər – boş sahə, dəqiq birtoxunuşlu ötürmələr və qol. Əfranın aşkar səhvi öz yerində, amma Mirzəbəyov bütün hallarda müdafiənin mərkəzinə gələrkən cinahını boş qoydu.
Deməli, komanda halında yetərsiz idik. Dayaq yarımmüdafiəçiləri fərdi mübarizələri uduzur, zonaları bağlaya bilmirdi, ön xətt oyunçuları da onlara yardımda yubanırdı. Bu onu göstərir ki, sistematik, komanda halında olan səhvlər sonda hansısa oyunçunu çatdırmaması səbəbindən “qurbanlıq edirdi”. Qara Qarayev, Rahid Əmirquliyev son vaxtlar oyun praktikasından əziyyət çəkir, klubunda az forma şansı qazanır, Cavid Hüseynov həbsdən çıxandan sonra hələ də yetərli səviyyədə deyil. Mizəbəyovun fiziki imkanları daha yaxşısına ümid etməyə şərait yaratmır, Pavel Paşayev də gözləniləndən yaxşı oynamasına baxmayaraq, belə rəqib qarşısında dayanacaq futbolçu deyil. Belədə oyun praktikası olmayan Kamran Ağayevdən, təcrübəsi hesabına bacardığını edən Rəşad Sadıqovdan və ən yaxşılardan biri olan Bədavi Hüseynovdan az qüvvəylə “alman maşını”nın qarşısını almağı gözləmək ağılsızlıq olardı.
Əfran daha çox tənqid olunur – razıyam, çox səhvlər etdi. İsmayılovun topla rəftarı, sürəti, tez qərar vermək qabiliyyəti zəifdi, müdafiə planında da axsayır. Lakin unutmayaq ki, o, heç nədən qol yaratdı. Bəs, ondan yaxşısı varmı? Ruslan Qurbanov meydana çıxana kimi mən də Prosineçkini qınayırdım. Amma “Qəbələ”nin oyunçusu göstərdi ki, o, start heyətində yer alsaydı, vəziyyət daha pis ola bilərdi. Eyni sözləri Araz Abdullayev və başqaları haqda da demək olar. Bəlkə də Namiq Ələsgərov zədəli olmasaydı, sağ cunah daha dişli görünərdi. Ancaq onun da ümumi ansamblda fərqlənəcəyini gözləmirəm.
Dmitri Nazarov fərq yaradırdı, qol vurdu, əla top saxladı, soyuqqanlı idi, lakin… Lakin o da buraxılan qollarda günahkarlardan idi. Aşkar görünürdü ki, fiziki cəhətdən möhkəm deyil, Paşayevlə yardımlaşmada qüsurları var idi. Pavel daim topu geri ötürməyi sevən, Dima hücuma çıxanda ona dəstək verməyi bacarmayan biri kimi fərqləndi. Ramil Şeydayev, eləcə də əvəzləmədən oyuna çıxan digər futbolçular da ümumi ab-havaya uyğun oynadılar.
Mənzərə zənnimcə, sizə aydın oldu. Bu durumda olan komanda çexlərdən, Norveçdən xal ala bilər, heç Şimali İrlandiyayla səviyyə fərqi də uçurum həddində deyil. Lakin ulduzu görünməyən, əsl qüsursuz komanda təsiri bağışlayan Almaniya ilə matçda bu qədər çatışmazlıqla xal qazanmaq mümkün deyil.
Prosineçki əlində olan materiala görə ən yaxşısını etməyə çalışdı. Daha səviyyəli cinah oyunçuları, heç olmasa, Hediranın, Krossun yarısı səviyyəsində oynaya biləcək yarımmüdafiəçiləri olsaydı, nəyəsə ümid etmək olardı. Lakin yoxdu və hələ uzun illər də olmayacaq. Çünki milli komandanı deyil, ona qədər olan pilələri araşdırmalıyıq. Klublarda o səviyyənin oyunçuları yoxdur və təəssüf ki, uşaq-gənclər futbolunda da saysız problemlər var. Hansısa mövqe üçün rəqabət yarada biləcək oyunçular gözə dəymir, faktiki hər mövqeyə 1, uzağı 2 namizəd var. Rəqabət olmadan inkişafdan danışmaq mənasızdı. Güclü yığmaya sahib olmaq üçün uşaq futbolunda ulduzlar sayrışmalı, hər an forma geymək şansı gözləyən namizədlər olmalıdı.
Prosineçkinin bu oyun üçün tənqid ediləcək bircə səhvini qeyd edə bilərəm. Nəticənin bəlli olduğu son dəqiqələrdə meydana Eddi İsrafilov yox, hansısa gənc oyunçu buraxılmalıydı. Milyonlar qarşılığında millimizə gəlməyə razılıq verən bu futbolçu heç vaxt yığmaya hansısa fayda verməyib. Başa düşürəm, onun yığmadakı oyun sayını artırıb, xərclənən pulların havaya sovrulmadığını isbat etmək istəyənlərin diqtəsinə qulaq asdı, lakin hansısa gəncin almanlara qarşı 5 dəqiqə oynaması digər gənclərə də əla çağırış olardı. Belə stimul yaratmadıqca millimiz həmişə qocaların, milliləşdirilənlərin ümidinə qalacaq.
FƏRİD
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”