Ölkə futbolu
Layiqli qalibə layiqli rəqib
Mövsümün layiqli finalı idi. Həm də təkcə ölk…
Mövsümün layiqli finalı idi. Həm də təkcə ölkə kubokunun yox, ümumilikdə bir futbol ilinin…
Bəri başdan hər iki yarışda ən güclünün qalib gəldiyini etiraf edək. Zaman-zaman büdrəmələr, çıxışında müəyyən enişlər olsa da, hətta zəifləmiş heyəti də "Qarabağ"ın hegemonluğunun davam etməsinə əngəl olmadı. Qurban Qurbanov əsl strateq kimi hədəfə gedən yolu düzgün hesabladı, əldə olan materialdan maksimum istifadə etdi.
Hər iki cəbhədə ağdamlıların bir rəqibi var idi. Amma "Qarabağ"ın ən böyük üstünlüyü rəqib kimi bütün komandaları görməsi idi. Elə bu səbəbdəndi ki, digər komandalarla görüşlərdə daha az xal itkisi komandanı qızıl medallara uzatdı. Ölkə kubokunda da səbrlə mübarizə aparan, heç bir rəqibə barmaqarası yanaşmayan çempion həlledici matçda "Qəbələ"yə minimal şans vermədi.
Naxçıvan finalında amansız mübarizə gözlənilirdi. Mövsümü titulla bitirmək istəyən "Qəbələ" ölkə kubokunu muzeyinə aparmaq niyyətində idi. Lakin oyunun startındakı əngəllər matçın axarına təsir etdi, daha sonra isə ardıcıl səhvlər "Qarabağ"ın basqısı önündə bir az da artdı və yekun nəticə müəyyənləşdi.
Əslində, "Qəbələ" matçı ilk yarının ortalarında uduzdu. Tellur Mütəllimovun əla reyddən sonra talesiz zədə alması Roman Qriqorçukun bütün planlarını pozdu. Limit üzündən eyni zamanda edilən iki dəyişiklik oyuna daha yaxşı başlayan "qırmızı-qaralar"ın taktiki planlarını məhv etdi. Bundan sonra sağ cinahın fəallığı azaldı, Teo Uiksin əldə saxladığı mərkəzdə üstünlük qonaqlara keçdi.
"Qəbələ"ni tam ruhdan salmaq üçün bircə qol lazım idi. Və onu fasilə bitən kimi Mahir Mədətov vurdu. Çempionla oyunda hesabda geri düşmək, üstəlik, heyət çatışmazlığı faktiki, titulun əldən getməsi üçün kifayət etməliydi. Bununla belə, xaotik oyun sərgiləyən "qırmızı-qaralar"ın silkələnmək imkanı olacaqdı. Son dəqiqələrdə aktiv oynamaqla, təzyiqi artırmaqla ən azı matçı əlavə vaxta daşıyacaq qolu vurmaq gözlənilən idi. Amma bir fərdi səhv hər şeyin üstündən xətt çəkdi.
Ürfan Abbasov bəlkə də bütün mövsümü eyni gərginlikdə keçirdi. Ustalığının aşağı olması öz yerində, bu müdafiəçinin psixoloji durumda da yerində deyil. Sanki hər an səhv etməkdən qorxur və elə bu səhv növbəti səhvləri gətirir. Kubokun finalında da belə oldu – adi vəziyyətdə tərs vuruş, avtoqol və hər şeyin sonu.
Rəqiblər finalda oynamağa layiq idi. Qeyd etdiyimiz kimi, qələbəni də daha çox layiq olan qazandı. Ağdamlılar sanki 4 ildi bütün titulları toplayan komanda deyildi, yenə qazanmaq üçün alışıb-yanışırdılar. "Qəbələ" daha istəkli olmalı, titul üçün döyüşməli idi. Bu istək, motivasiya ağdamlılarda daha çox oldu və ustalıq səviyyəsi də sözünü deyincə matçın qalibi müəyyənləşdi.
İndi qarşıda uzun fasilə dönəmi, ardınca avrokuboka hazırlıq dövrü var. Səhvlərdən nəticə çıxarmaq üçün hamının şansı olacaq. "Qarabağ" uğurlardan rahatlaşmamalı, avrokubokda ciddi uğurlar üçün heyəti gücləndirməlidi. Düzdü, bəzi oyunçular rəqabətin zəif olduğu Azərbaycan çempionatı üçün ağır gələcək, hətta limit üzündən ehtiyatda qalıb formadan da düşəcəklər. Bununla belə, hədəf Çempionlar Liqasının qrupudusa, risk etməyə dəyər.
"Qəbələ" hər iki cəbhədə ikinci olmasının günahını məhz özündə axtarmalıdı. Həlledici məqamlardakı büdrəmələr, sabitliyin olmaması komandanı bu tale ilə barışdırdı. Xüsusilə səviyyəli yerli oyunçu ehtiyatının yetərsizliyi bunda rol oynadı.
İndi rəhbərlik büdcənin azaldılması ehtimallarına işarə vurur. Təbii ki, belə olan halda komanda daha da zəifləyəcək. Çünki "Qarabağ"ın sabitliyi qoruduğu bir zamanda maliyyənin azaldılması ağdamlıların titul yolunu bir qədər də hamarlaşdıracaq. Halbuki əla ənənə yaradılmışkən, gözəl bünövrə qoyulmuşkən eyni həvəslə yola davam etmək daha məntiqlidi.
FƏRİD
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”