Müsahibə
Veteran futzalçı: “Gövdəmlə işimi görürəm”
Dövrünün güclüləri sırasında yer alan, amm…
Dövrünün güclüləri sırasında yer alan, amma sonradan bir müddət kənara çəkilən Rüfət Hüseynovu bu dəfə Birinci Liqada yaxaladıq. Sevgisindəndir ki, bu yaşda və artıq çəkisi olmasına rəğmən parketdə top qovmaqdan doymur. “Yasamal-2” – “Hell Energy” oyununda komandasının yeganə qoluna imza atsa da, artıq aktivində 7 qol var. Təbii ki, təcrübəli oyunçu ilə söhbətləşmək imkanını qaçırmadıq, onu bir neçə dəqiqəlik də olsa, Futzal Federasiyasının tribunasına dəvət edilib:
– Yaş üstə yaş gəlsə də, artıq çəkin olsa da, oynamaqdan yorulmursan…
– Necə doyum? “Yasamal-2”yə yeni qoşulmuşam. Mən gələndən sonra keçirdiyimiz 3 oyundan birində qələbə qazanmışıq, qalan 2 matçı uduzmuşuq. Rəqiblərimiz təcrübəli, oturuşmuş komandalardı. Hətta bir az da güclərinə güc qatıblar və Birinci Liqanın mükafatlarına favorit komandalardı. “Hell Energy” ilə oyunda 1:6 hesablı yenilgi bir az böyük oldu. Razıyam, uduzacağdıq, ancaq bu hesabla yox.
– Birinci Liqada mənzərə necədi?
– 9-10 komandanı fərqləndirərdim ki, onlardan 3-ü favoritlər sırasında yer alıb. Qalan 6-7 komanda eyni gücdədir. Biz də şansımızı itirməmişik. Çünki indiyə qədər əsasən güclülərlə üz-üzə gəlmişik, orta və aşağı sıralarda yer alan komandalarla bundan sonra qarşılaşacağıq. Məqsədimiz bu mərhələni “8-lik”də başa vurmaq və play-off oyunlarının iştirakçısı olmaqdır. Komandaya ikinci dövrədə gənc futzalçıları dəvət edəcəyəm. İstəyirəm, “Yasamal”ın əsas komandası üçün ehtiyat baza yaradaq və gənclər püxtələşdikdən sonra Yüksək Liqadakı əsas komandamıza yollansınlar. Bu gün “Yasamal”ın əsas komandasında İrandan dəvət edilən futzalçılar yer alıb və onların sayı çoxdur. Klub olaraq istəyirik ki, əsas millidə bizim də yetirməmiz yer alsın. Ona görə axtarışlarımız davam edir. İkinci dövrədən fərqli “Yasamal-2” görəcəksiniz.
– Birinci Liqada diqqətini cəlb edən, perspektiv vəd edən futzalçı varmı?
– Var, amma ad çəkməyəcəm. Təkcə Birinci yox, İkinci Liqanı da izləyirəm və diqqətimi cəlb edən oyunçu görmüşəm. MFL-in oyunlarını da mütəmadi diqqətdə saxlayıram. Oradan da 1-2 oyunçu dəvət edəcəyəm. Onların 23-24 yaşı var, MFL-ə getsələr də, yerləri parketdi. MFL onlar üçün hələ tezdir.
– Həm oynayırsan, həm də izlədiyim qədər ikinci komandada baş məşqçi funksiyasını yerinə yetirirsən…
– Komandanın rəhbəri Orxan Allahverdiyevdi və məni o, dəvət edib. Yüksək Liqada çıxış edən komandamıza da məsləhətçi kimi kömək edirəm. Yenə deyirəm, məqsədimiz milli komandaya oyunçu qazandırmaqdır.
– Bu yaşda oynamaq çətin deyil?
– Təcrübənin hesabına oynayıram. Artıq çəkim var, amma hücumda yer almaqla komandama köməyim dəyir. Gövdəmlə işimi görürəm.
– Ustalıq qalıb yerində…
– Ustalıq heç vaxt itmir. Ola bilər sürət, fiziki hazırlıq qaydasında olmasın, amma ustalıq heç vaxt “ölmür”.
– Bəs gənclər bu ustalıqdan qablarına nəsə qoya bilirlər?
– Hazırkı komandamızda yer alanlar tərbiyələri, davranışları ilə rəğbətimi qazanıblar. Əksəriyyəti məhəllə futbolundan gəlib, müəyyən vərdişləri, hərəkətləri bilmirlər. Ona görə də çalışırlar ki, öyrənsinlər, futzalı düzgün oynasınlar. Bizim işimiz də bildiklərimizi onlarla bölüşmək, nəyişə öyrətməkdir.
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”