Əfsanəvi basketbolçu Uilt Çemberlenə məxsus gödəkçə “Sotheby’s” hərracında 89 600 dollara satılıb.
Maraqlıdır ki, gödəkçəni 19 yaşlı Kuinn Braun adlı biri bu ilin yanvarında “Goodwill” mağazasında endirim səbətindən cəmi 3,07 dollara alıb. İnternetdə araşdırma apardıqdan sonra o, şəkilləri paylaşıb və “Sotheby’s”in müasir kolleksiya əşyaları şöbəsinin rəhbəri Bram Vaxter ona gödəkçənin hərraca çıxarılmasını tövsiyə etdi. Ekspertizadan sonra müəyyən olunub ki, bu, 1971/72 mövsümündə, o cümlədən 1972-ci il NBA finalında Çemberlenin istifadə etdiyi orijinal “Los Anceles Leykers” gödəkçəsidir. Nəticədə nadir idman xatirə əşyası hərracda alıcıya 89 600 dollara satılıb.