“Adrian Mutu mənə güvənir” – Mark Tamaş

“Neftçi”nin macarıstanlı futbolçusu Mark Tamaş ölkəsinin mətbuatına açıqlama verib.

Futbolinfo.az saytı xəbər verir ki, 30 yaşlı mərkəz müdafiəçisi ilk olaraq, komandasının düşdüyü durumu dəyərləndirib:

“Əvvəlki çempionat oyunlarında olduğu kimi, “Qarabağ”la görüşdə də çoxlu qol imkanları yaratdıq. Təəssüf ki, həmişə olduğu kimi, şansları əldən verdik. Artıq həftələrdir bu problemlə mübarizə aparırıq. Bu durum da bizi hədsiz dərəcədə əsəbiləşdirir. “Qarabağ”, demək olar ki, iki şans əldə etdi, hər ikisində qol vurdu. Yenə də optimistəm, çünki mövsümün hələ əvvəlindəyik. Hücumçularımız effektli olsalar, turnir cədvəlində yuxarı pillələrə qalxmağa başlayırıq. Zərbələri qola çevirməməyimizə səbəb ustalıq problemi və ya konsentrasiyanın olmaması deyil. Sadəcə uğursuzluq seriyasındayıq. Bəzən qapı dirəyinə zərbələr vururuq, bəzən rəqibin qapıçısı topu necə qaytaracağını bilmir. İnanıram ki, üzərimizdə çox işləməyimiz öz bəhrəsini verəcək və növbəti turda “Səbail”lə oyunda uğurlu seriyaya başlayacağıq”.

Tamaş baş məşqçi Adrian Mutunun komandanı bu durumdan çıxaracağına inanır: “Əvvəlcə Konfrans Liqasında, ardından isə çempionatda meydanda olmaq fürsəti əldə etdiyim üçün şadam. Son 3-4 matçda özümü gözlədiyim formada hiss etdim. Baş məşqçi Adrian Mutu mənə güvənir və xoşbəxtlikdən klub rəhbərliyi də ona güvənir. Ötənlərin güclü hücumçusu, şübhəsiz ki, bizi daha effektiv etmək üçün bir şey tapacaq. Bəlkə də, hücumçularımız özünəinam qazanmaq üçün məşqdə boş qapıya zərbə vurmalı olacaqlar”.

O, Macarıstan millisinə çağırılmamasına da münasibət bildirib: “Millimiz son vaxtlar stabil və yaxşı futbol sərgiləyir. Dəvət almayacağımı təxmin etmişdim. Yenə də adlar oxunanda öz adının səslənəcəyini də gözləyirsən. Mənim yeganə vəzifəm yaxşı futbol oynamaq və meydanda hər şeyi etməkdir. Təslim olmuram”.