Ölkə futbolu
“Qəbələ” üçün “xilasetmə əməliyyatı”
AFFA, deyəsən, “Qəbələ”ni böhrandan çıxarmaq üçün əməli addımlar atmaq qərarına gəlib. 2022-ci ili bərbad keçirən bölgə klubunun son qələbələri həm də bununla bağlıdı.
Qurum maliyyələşdirdiyi, büdcəsini bütünlüklə təmin etdiyi bölgə təmsilçisinə diqqəti artırıb. Klubun meydan mübarizəsində “Zirə”ylə “Sabah”a məğlub olması, avrokuboklara vəsiqə şansını itirmək həddinə gəlməsi assosiasiya rəsmilərini ayıldıb. AFFA üçün arzuolunmaz klublar sayılan “Zirə”ylə “Sabah”dan ən azı birini sıradan çıxarmaq naminə belə cəhdlər edilir.
“Qəbələ”nin 25-ci turda “Zirə”ni 3:0 hesabıyla məğlub etməsi meydan sahiblərinin öz günahı idi. 120 dəqiqəlik kubok mübarizəsindən yorğun çıxan bakılılar, oyuna yanaşmada da yanlışlıqlara yol verdi və məğlub oldu. Amma bu qarşılaşmada digər məqam “Qəbələ” futbolçularının stimullaşdırılması idi. Təsadüfi deyil, komanda 2 aydır yubadılan maaşını məhz bu oyunöncəsi aldı.
Komandanın yenidən 4-cü pillədə möhkəmlənməsinə daha bir töhfə son turda verildi. “Neftçi”nin məğlubiyyətsiz oyunlar seriyasının qırıldığı epizodda hakim səhvi yekun nəticəni müəyyənləşdirdi. “Qəbələ”nin öz gücünə qələbəni əldə edə bilmədiyini görən AFFA-nın qarapaltarlıları 74-cü dəqiqədə gülünc penalti təyin etdi və hesab açıldı.
Fərid Hacıyev qərarının doğruluğunu isbatlamağa çalışa, Frits Stuxlik yetirməsini müdafiə edə bilər. Lakin videosunu təqdim etdiyimiz epizod göz önündədi. Azər Salahlı topa zərbə endirmək istərkən, “Qəbələ”nin hücumçusu ayağını zərbənin önünə qoyur. Hakim “nakladka”ya görə “Neftçi”nin lehinə cərimə zərbəsi təyin etməli, Rafael Utziqə sarı vərəqə göstərməliydi. Amma AFFA-nın klubunun lehinə qərar verildi…
“Neftçi”nin baş məşqçisi Samir Abasov oyundan sonra öz azarkeşlərinə söz atmaqdansa, onları təhqir etməkdənsə, bu epizoddan danışsaydı, daha yaxşı olardı. Göz görə-görə haqqı yeyilən yetirmələrini müdadiə etməyən çalışdırıcı kimi klub rəhbərliyi də gizlənib. Görünür, AFFA-nın xoşuna gəlməyən mövzulardan söz salmağa onlar da ehtiyat edir. Görəsən, onlar bunu “öz taleləri ilə oynanılanda” da edərlərmi?
Bu gedişlə son turun “Qəbələ” – “Sabah” matçında çox şey baş verə bilər. Diqqətli olmaqda fayda var, AFFA sevmədiyi klubları doğmalarının ayağına verməyə başlayıbsa…
CAVAD
P.S.: AFFA rəsmi qərar verib hakimlərin mübahisəli epizodları şərh edəcəyini açıqlamışdı. Amma indiyədək belə bir halın şahidi olmamışıq. Bəlkə indi Fərid Hacıyev bunu etsin, özünü təmizə çıxarsın? Gözləyirik!
- Ölkə futbolu2024-04-26 08:00
Juninyo – Avropanın ən yaxşı braziliyalısı
- Ölkə futbolu2024-04-26 09:08
“Qarabağ”ın ildən-ilə böyüməsi məni qətiyyən təəccübləndirmir”
- Ölkə futbolu2024-04-26 10:17
Samir Abasov Laporta ilə görüşdü
- Müsahibə2024-04-26 12:11
Veşoviç ikinci titulu istəyir: “Rəqib formada olan çətin komandadır”