“Bütün rekordları yeniləmək istəyirəm” – Cokoviç

Serbiyalı tennisçi Novak Cokoviç Parisdə “Masters” seriyalı yarışda qələbədən sonra ATP turnirlərinin rekordlarını yeniləmək fikrində olduğunu bildirib.

Futbolinfo.az xəbər verir ki, hazırda ATP seriyalı turnirlərdə çempionluğa görə rekord Cimmi Konnorsa məxsusdur.

Amerikalı sabiq tennisçi 109 turnirdə qələbə qazanıb. Rodjer Federerin karyerası ərzində 103 titul olub. Novak Cokoviç Parisdəki uğurdan sonra titullarının sayını 97-yə çatdırıb.

“ATP seriyalı turnirlərdə qələbələrin sayına gəldikdə , hər şeyin mümkün olduğunu söyləyə bilərəm. Niyə də bu rekordu yeniləmək üçün çalışmamalıyam? Hazırda 12 titul geridəyəm, amma qarşıda bir neçə illik karyera var.

Mən bütün rekordları yeniləmək istəyirəm. Bunu söyləməkdən və etiraf etməkdən heç bir zaman çəkinməmişəm. Buna görə də insanların xoşuna gəlmirəm. Heç kimə bənzəməyə çalışmıram və özümü olduğumdan fərqli göstərməyə cəhd etmirəm”, – deyə serbiyal tennisçi qeyd edib.