Çeran Zaqatala üçün darıxıb: “Azərbaycanda futbol Avropadan çox Özbəkistan liqasına yaxındır”

2013-2015-ci illərdə Azərbaycanda “Simurq”un formasını geyinən, hazırda isə karyerasını Özbəkistan klubu “Paxtakor”da davam etdirən 35 yaşlı serbiyalı hücumçu Draqan Çeranın futbolinfo.az saytına müsahibəsi

– İşləriniz necə gedir?

– İndiyə qədər hər şey qaydasındadır. Həyat öz axarı ilə davam edir.

– Azərbaycanda keçirdiyiniz dövrü necə xatırlayırsınız?

– 2013-2015-ci illərdə orada yaşadım. Azərbaycanda həyatdan həzz aldım. Mənim üçün iki gözəl il alındı.

– Darıxırsınız?

– Həqiqətən də Azərbaycan üçün çox darıxıram. Xüsusən də “Simurq”da birgə çıxış etdiyim komanda yoldaşlarımın hamısından ötrü. Hətta onlardan bir neçəsi ilə hələ də əlaqə saxlayıb, hal-əhval tuturuq.

– Bəs ölkəmizdə ən çox nəyi bəyənmədiniz?

– Nəyisə xüsusi vurğulaya bilmərəm. Bəlkə səfərləri və pis yolları qeyd etmək olar. Ancaq bunlar sadəcə, kiçik xoşagəlməzlikdir.

– Ötən illər ərzində karyeranızı yenidən burada davam etdirmək imkanınız olmayıb?

– Orada kiçik əlaqələrim var. Hansısa formada xırda söhbətlər aparılıb. Amma heç vaxt ciddi bir şey olmayıb.

– Çempionatımızı izləyirsiniz?

– Bəli, izləyirəm. Ancaq müntəzəm diqqətdə saxladığımı deyə bilmərəm. İmkan düşdükcə baxıram.

– Serbiya, Belçika, İsrail, Səudiyyə Ərəbistanı, Şimali Makedoniya və Özbəkistanda oynamısınız. Azərbaycan çempionatının səviyyəsi onlardan hansının liqasına yaxındır?

– Əslində, bu çempionatların hamısı bir-birindən fərqlənir. Amma məncə, Azərbaycanda futbol Avropadan çox Özbəkistan liqasına yaxındır. Bu iki liqa arasında bənzərliklər var.

– “Simurq”da keçirdiyiniz 2 il sizə nə qazandırdı?

– “Simurq”da çox yaxşı iki mövsüm keçirdim. Azərbaycan karyeram həyatıma yeni təcrübə və bəzi yaxşı dostlar gətirdi.

– Hücumçu kimi Azərbaycanda sizə ən çox çətinlik yaradan müdafiəçi kim olub?

– Orada yaxşı müdafiəçilər var idi. Onlardan birini fərqləndirərdim. Bu, həmin vaxt “Bakı”nın formasını geyinən oyunçu idi. Düzü, adı yadımda deyil, amma ispaniyalı olduğunu bilirəm.

– Adətən bura gələn əcnəbilər Bakını arzulayırlar. Zaqatalada yaşamaq çətin deyildi?

– Xeyr, heç bir çətinliyi yox idi. Orada yaxşı dönəm keçirdim. Əla kollektivimiz var idi. Məşqlərdən əvvəl birlikdə vaxt keçirirdik. Zaqatalanın dağları, təmiz havası çox xoşuma gəlirdi.

– Sizdən Azərbaycan haqda soruşanda nə deyirsiniz?

– Əlbəttə ki, orada gördüyüm gözəlliklərdən danışıram. Azərbaycanda iki möhtəşəm ilim oldu və zövq aldım. Mənə daim dəstək və hörmət göstərdiyi üçün Azərbaycan xalqına minnətdaram.

CAVAD