“Kəpəz”də istefa, “Sumqayıt”da maaş qorxusu

Misli Premyer Liqasının 24-ci turunda baş tutacaq oyunlar barışmaz mübarizə vəd edir. “Turan Tovuz” – “Zirə” oyunu 4-cü yer uğrunda çəkişmə baxımından önəmlidirsə, “Qarabağ” – “Neftçi” duelinin fərqli özəlliyi var.

Bu qarşılaşmalar ilə yanaşı, “Sumqayıt” – “Kəpəz” matçı da gərginliyi ilə seçiləcək. Rəqiblərin son pillərdən qurtulmaq yarışında şəxsi dueli çox əhəmiyyəlidir. Çünki “altıxallıq oyun”da qalib gələn vəziyyətini düzəldəcək, növbəti matçlarda daha az təzyiq hiss edəcək.

Lakin klublar özləri ölərinə təzyiq yaratmaqdadırlar. Belə ki, “Kəpəz”də baş məşqçi Tərlan Əhmədovun adı ətrafında baş verən olaylar bəllidir. Azarkeşlərin istefaya səslədiyi mütəxəssisə rəhbərliyin də münasibəti yaxşı deyil. Bu oyunda komandası ən azı bir xal qazanmasa, məşqçinin istefası yenidən gündəmə gələcək. “Şamaxı” ilə qarşılaşmada qazanılan qələbə bir az rahatlıq yaratsa da, bu matçda da uduzmamaq önəmlidir. Növbəti turdan ağır qrafikə daxil olan “Kəpəz”in ardıcıl məğlubiyyətlərə uğramaq ehtimalı böyük olduğundan zirzəmidən maksimum uzaqlaşmaq lazımdır.

“Sumqayıt”da vəziyyət daha sabit görünür. Komandada nisbi inkişaf var, məşqçi və futbolçular üzərində azarkeşlərin xüsusi təzyiqi yoxdur, üstəlik, xal ehtiyatı daha yaxşıdır. Lakin “kimyaçılar”ın düşərgəsində də klub prezidenti Riad Rəfiyev vəziyyəti gərginləşdirir.

Əldə etdiyimiz məlumata görə, Rəfiyev iclas keçirərək futbolçuların qarşısına şərt qoyub. Belə ki, gəncəlilər məğlub edilməsə, hamının maaşının yarısı “tutulacaq”. Doğrudur, müqaviləli futbolçularla bunu etmək çətindir, lakin Riad bəy dəfələrlə bu yola əl atıb, kəsdiyi maaşların verilməsini yubadıb, yekunda müqaviləsi bitən oyunçular komandadan gedərkən onları məbləğdən imtinaya razı salıb. Digərləri isə komandada qalmaq, əlavə problemlər yaşamamaq üçün qanunsuzluğa boyun əyib.

Riad bəyin budəfəki hədə-qorxusu futbolçuları motivasiya etməyib, əksinə, narazılıq yaradıb, bir çoxu etiraz edib. Nəticəsini matç günü görəcəyik. İndidən onu əminliklə demək olar ki, həftəsonu Sumqayıtda baş tutacaq matç daha çox əsəb döyüşü olacaq.

FƏRİD