Kavaninin qardaşı: “Neftçi”nin fantastik təklifindən imtina edə bilməzdim”

Azərbaycanda 2007-2009-cu illərdə “İnter”də, 2009-10 mövsümündə “Neftçi”də çıxış etmiş Uruqvay millisinin sabiq futbolçusu Valter Quqlemonun futbolinfo.az saytına müsahibəsi

– Azərbaycan çempionatını, keçmiş komandalarınızı izləyirsiniz?

– Açığı, izləmirəm. Sadəcə, müəyyən dərəcədə məlumatım var. Məsələn, “Neftçi”nin çoxdandır “Qarabağ”ın kölgəsində qaldığını deyə bilərəm. “İnter”in isə adı tez-tez dəyişdiyindən, çox diqqət yetirmirəm. Əvvəlki “İnter”dən əsər-əlamət qalmayıb. Halbuki yaxşı komandamız var idi.

– İki il “İnter”də, bir il isə “Neftçi”də çıxış etmisiniz. Hansı sizə daha doğmadır?

– Əlbəttə ki, “İnter”. “Neftçi”yə də böyük hörmətim var, tarixi klubdur. Amma “İnter”i özümə həmişə yaxın hesab etmişəm. Axı, orada iki uğurlu mövsüm keçirdim.

– Uğurlu çıxış etdiyiniz bir vaxtda komandadan niyə ayrıldınız?

– “İnter”də olarkən 45 oyunda 28 qol vurmuşdum. Xüsusən də ikinci mövsümüm (2008-2009) parlaq alındı, 17 qolla çempionatın bombardiri oldum. Nəticədə çempionatın ən iddialı komandalarından olan “Neftçi”dən fantastik təklif aldım. Bu elə təklif idi ki, imtina edə bilməzdim.

– Bəs niyə eyni uğuru “Neftçi”də davam etdirə bilmədiniz?

– Bunun müxtəlif səbəbləri var idi. İndi keçmişə qayıtmağın bir mənası yoxdur. Xatırlayırsınızsa, həmin mövsümü komanda olaraq çox pis keçirmişdik. Səhv etmirəmsə, “Neftçi” hətta avrokuboklara da vəsiqə qazana bilməmişdi. Mən isə çempionatda cəmi 2 qol vura bilmişdim. Biabırçı çıxışın əsas səbəbini stabilliyin olmamasında görürəm. Mövsüm ərzində rəhbərlik tez-tez baş məşqçi dəyişikliyinə getdi. Nəticə də göz önündə oldu. Amma “Neftçi”yə keçdiyim üçün heç vaxt peşmanlıq çəkməmişəm. Çünki həmin vaxtın tələbinə uyğun qərar verdim. Fikrimcə, mənim yerimdə kim olsaydı, təklifi qəbul edərdi.

– Dediniz ki, Azərbaycan çempionatını izləmirsiniz. “Qarabağ”ın avrokuboklardakı nəticələrindən də xəbəriniz yoxdur?

– Avrokuboklarda diqqətimi çəkən oyunları əlbəttə ki, izləyirəm. Xüsusən də Çempionlar Liqası matçlarını maraqla diqqətdə saxlayıram. Digər turnirlərdə daha çox nəticələrə, hansısa oyunun videotəkrarına baxıram. “Qarabağ”ın da oyunlarının nəticələrindən məlumatım olur. Bəzi matçlarının videoyazılarına da baxmışam. Deyərdim ki, bu komanda ondan gözləniləndən daha uğurlu nəticələr göstərir.

– Siz eyni zamanda ulduz futbolçu Edinson Kavaninin həm böyük qardaşı, həm də menecerisiniz. Onun karyerasının gedişatı ürəyinizcədir?

– Edinsonun 36 yaşı olmasına baxmayaraq, hələ də “böyük beşlik” ölkələrindən olan La Liqada çıxış edir. Onun karyerasından nöqsan axtarmaq nə dərəcədə düzgün olar? “Napoli”, PSJ, “Mançester Yunayted” kimi Avropanın böyük klublarında oynayıb. Hazırda da “Valensiya”nın formasını geyinir. Məncə, Edinson hələ də yüksək səviyyədə oynamaq iqtidarındadır.

– Onunla heç Azərbaycan futbolu barədə danışmısınız?

– Təbii ki, Azərbaycanda oynadığım vaxtlarda ona müntəzəm məlumatlar verirdim. Düzdür, Kavani ölkənizdə olmayıb. Amma müəyyən təsəvvürü var.

– Maraqlıdır, Azərbaycan futbolunu Kavaniyə necə tanıtmısınız?

– Karyeramın ən parlaq illərini Azərbaycanda – “İnter”də keçirmişəm. Əlbəttə ki, yalnız xoş təəssüratlarım var. Azərbaycan həm infrastruktur, həm də futbol sahəsi olaraq sürətlə inkişaf edən ölkədir. Orada oynadığım vaxtlarda Kavani özü də Bakıya gəlmək, orada gəzmək istəyirdi. Ancaq karyerasının yüksəlişə keçən dövrləri idi, heç cür vaxt ayıra bilmirdi. Ümid edirəm ki, bir gün onu Azərbaycana gəzməyə gətirəcəyəm.

– Qardaşınız müsahibələrinin birində demişdi ki, siz ondan daha yaxşı hücumçu olmusunuz. Hətta sizin İtaliyada oynamağınızı arzuladığını da söyləyib. Bu fikirlərində nə dərəcədə səmimi olub?

– Karyeramın əvvəllərində İtaliyada oynamaq imkanım olub. Ancaq həmin vaxt Fransaya yollanmağı üstün tutmuşdum. Məncə, Edinson təvazökarlıq edib. Onun karyerası hər bir uruqvaylı üçün nümunədir.

ABBAS