“Keşlə” kimi yaşayan “Şamaxı”: bölgə klubu… Bakıda məskunlaşacaq

“Keşlə” adından imtina edib bölgə təmsilçisi olan komandanın deyəsən, yalnız adı və emblemi fərqli olacaq. “Şamaxı”nın əsas komandası Bakıda məskunlaşıb yalnız oyundan-oyuna doğma şəhərə yollanacaq.

Problem təkcə əsas komandayla bağlı deyil. Klubun akademiyasının necə, harada məskunlaşacağı haqda da məlumat yoxdu. Şamaxılı uşaqların yetişməsinə töhfə verməli olan klub məktəbinin nədənsə paytaxtda fəaliyyət göstərməsini istəyirlər.

İnsafən “Keşlə”, elə adı “İnter” olanda da yaxşı yetirmələri ilə tanınıb. Bunda klubun məskunlaşdığı “Şəfa” stadionunun böyük rolu olub. Həm yerləşdiyi məkan, həm də mövcud infrastruktur klub rəhbərliyinin işinə yarayıb. İndi isə bu stadiondan çıxarılan akademiya çətin vəziyyətdə qalıb.

Əslində, “Keşlə/Şamaxı”nın uşaq məktəbinə akademiya demək olmur. Burada sadəcə, qruplar təşkil olunub, məşqçlər keçirilib, akademiya isə böyük anlayışdı. Hər nə isə… İndi bu akademiyaya Ramiz Məmmədovu qeyri-rəsmi direktor təyin ediblər. O isə paytaxtın canına düşüb meydança axtarır.

Məmmədov uşaq komandalarına məşq yeri axtarmaqda haqlıdı, amma bunu Bakıda yox, Şamaxıda etməsi gərəkdi. Çünki ad dəyişməklə bölgə komandası ölmur, klubun bütünlüklə Şamaxıya köçməsi gərəkdi.