Ölkə futbolu
Klubsuz Şamaxının yeni stadionu: UEFA-nın vəsaiti havaya sovrulub
Əvvəllər hansısa rayonda stadion açılır, mövcud olan komandası bir neçə il sonra dağılırdı. Şamaxıda isə futbol komandası ümumiyyətlə, yoxdu, ötən il Region Liqasında çıxış edən həvəskar kollektiv də ləğv edilib. Və bu şəhərdə hətta avrokubok oyunlarını qəvul etməsi mümkün olan stadion açılır. Paradoks!!!
***
Cüdo federasiyasında baş verən islahatlar bir anda ölkənin idman gündəmini dəyişdi. İki federasiyadan birini seçmək dilemması qarşısında futbolda qalmağı üstün tutan Rövnəq Abdullayevin açıqlaması ilə ara qarşıdı. AFFA prezidentinin “Artıq futbolla məşğul olacam, futbolda ciddi işlərin görülməsinə ehtiyac var” açıqlaması Elxan Məmmədov və dəstəsinin kürkünə birə saldı.
Abdullayev de-yure rəhbərlik etdiyi, de-fakto kənarda saxlandığı futbol təsərrüfatına döndüyünü bəyan etmişdi. Problemləri dilə gətirməsi isə özünütənqid idi, deməli, ciddi işlərin görülməsi üçün kadr islahatlarına ehtiyac duyulurdu. Belədə bütün ictimaiyyətin ağlına ilk olaraq icraçı vitse-prezident Elxan Məmmədov gəlir. Hamı bu adamdan narazıdı, onu futbolun düşməni olan səriştəsiz kimi tanıyırlar.
Cüdo federasiyasında 3 gün içində planlanıb reallaşdırılan bu dəyişikliklərdən Məmmədovun dostları öncədən xəbərdar idi. Onlar Abdullayevin futbolla vidalaşıb cüdonu seçəcəyinə ümid edərək Elxan bəyi ön plana çıxarmağa çalışdı. Əksi olduqda belə vitse-prezidenti nüfuza mindirmək, toxunulmaz kimi göstərmək üçün təbliğatına ehtiyac var idi. Və o, dövlət rəhbərliyinin qarşısına çıxarıldı.
Məmmədovun hamisi olan, hətta bir sıra məsələlərə görə qorxulu sayılması gərəkən şəbəkənin əli çox uzundu. Onlar səfər proqramına dəyişiklik edəcək qüdrətə malikdilər. Planda olmayan, hələ tam hazır vəziyyətə gətirilməyən Şamaxı səfər stadionu qısa müddətə açılışa səfərbər edildi, icra başçısı kənarda saxlanıldı.
***
Azərbaycan Respublikasının Prezidenti İlham Əliyev və birinci xanım Mehriban Əliyeva Şamaxı şəhər stadionunun açılışında iştirak etdilər. AFFA-nın icraçı vitse-prezidenti Elxan Məmmədov görülən işlər barədə məlumat verdi.
Bildirildi ki, 2200 azarkeş tutumu olan Şamaxı şəhər stadionu UEFA-nın ikinci kateqoriyalı sertifikatına malik olacaq. Bu isə stadionda beynəlxalq oyunların keçirilməsi üçün bütün imkanların olmasından qaynaqlanır. UEFA klub yarışlarının 1-ci, 2-ci və 3-cü təsnifat mərhələsinin, eyni zamanda, milli komandadan başqa, bütün yaş qruplarına aid milli komandaların oyunları bu stadionda keçirilə bilər. Bu stadionun inşası üçün maliyyə vəsaitinin 87 faizi UEFA, 13 faizi isə AFFA tərəfindən təmin olunub. Stadionun ərazisindəki idman kompleksində cüdo və güləş növləri ilə məşğul olmaq üçün zal, həmçinin fitnes-zalı inşa edilib. Bundan əlavə, stadionun ərazisində süni örtüklü iki mini-meydança yaradılıb və bu meydançaların 300 nəfər azarkeş tutumuna malik tribunası var.
***
Bütün bunlar çox yaxşıdı, hər bölgəmizə stadion lazımdı, Şamaxı da onlardan biridi. Amma Məmmədovdan soruşan olmadı ki, klubu, hətta uşaq komadaları olmayan Şamaxıda bu stadiona nə gərək var? Şərait tələbə görə yaradılır, Şamaxıda isə nəinki beynəlxalq yarışlar, heç Region Liqası səviyyəsində yarışacaq komanda yoxdu. Sadəcə, icra başçısı Tahir Məmmədov öz dəstələrinin adamıdı, əl-ələ verib maket düzəldiblər. Bu vəsait güləşi ilə məşhur olan Şamaxıdansa, futbol bölgəsi sayılan Mingəçevirdə, Masallıda, Qubada, Qaxda və s. rayonlarda stadion inşasına sərf edilsəydi, daha yaxşı olardı.
Stadionun açılışında uşaq komandalarının, futbol veteranlarının, rayon rəsmilərinin iştirakı gərək idi. Amma Məmmədov ölkə rəhbərliyinin qarşısına tək çıxarıldı. Şamaxıda daimi məşğul olan uşaq komandaları olmadığından futboldan danışmağın yeri yoxdu, icra başçısı isə Məmmədovun görüntüsünü korlayardı. Elxan bəy belə tədbirlərin gülü olan AFFA-nın vitse-prezidenti Rauf Əliyevi, digər veteranları da özüylə aparmamışdı. Heç olmasa, indi yanına salıb müvəqqəti istifadə etdiyi gənc nəsil veteranları, o cümlədən Cahangir Həsənzadə də Şamaxıya aparılmamışdı.
Kişinin oğlu fotosessiyalarda tək görünmək istəyirdi, hətta qalstukla kostyumda qapıda durmağı da ar etmədi. Məmmədov indi elə vəziyyətdədi ki, özünü qorumaq üçün başqa tələblərə də “baş üstə” deyərdi, amma bu dəfə qapıda durmaqla kifayətləndi. Özü də bilirdi ki, prezidentin vurduğu zərbə qol olur, sadəcə, tora daxil olan topa hiyləgərliyini gizlətməyən məsum baxışlarla baxmalıydı.
Prezidentin futbolla bağlı durumu Məmmədovla müzakirə edib-etmədiyini bilmirik. Zatən nağıl danışılacağı bəlli olduğundan, çox güman, hesabat xarakterli sual-cavab olmayıb, olsaydı, mətbuata çıxardı. Ölkə rəhbərliyi də bilir ki, real işlərlə bağlı cavab almaq üçün Məmmədovdan nəsə soruşmaq lazım deyil, “Qarabağ”ın oyunları, nəticələri ilə milli komanda, ölkə futbolunun real durumu arasındakı uçurumlu mənzərə göz önündədi.
Prezidentin başı daha vacib məsələlərə qarışmasa, soruşulacaq çox sual var və yəqin ki, postmüharibə olayları qaydasına düşdükdən sonra bunun zamanı çatacaq. Məmmədovdan cavab alınması gərəkən suallar:
- Ölkədə futbolla məşğul olanların sayı statistikada 200 min nəfər göstərilir, onlardan niyə 5-6 nəfəri Şamaxıda gözə dəymədi?
- Bu stadion hansı komanda üçün tikilib? Hətta divizionda təmsilçisi olmayan şəhərdə belə infrastruktura nə gərək var, onu futbol məktəbi ilə seçilən bölgələrdə inşa etmək daha səmərəli, məqsədyönlü olmazdımı?
- Şamaxının ötən il Region Liqasında təmsilçisi var idi. Bu il belə stadion istifadəyə verilirsə, həmin komandanın dağılmasına niyə göz yumuldu? Axı, bu, strateji planlama baxımından “bir addım irəli, iki addım geri” effektidi. Bu stadion görünüş üçünmü tikilib?
- İmişlidə, Lənkəranda və digər bölgələrimizdə stadionlar açılandan bir neçə il sonra bu şəhərlərin komandası dağıdıldı, həmin regionlar futbola həsrət qaldı. Şamaxıda isə arena açılmamış futbol məhv edilib. Bu, inkişaf strategiyasının yeni təzahürüdümü? Ümumiyyətlə, bu stadion kimin üçün tikilib?
Suallar çoxdu və həmişə aktualdı. Yəqin nəvaxtsa onlara cavab istəniləcək. 87 faizi UEFA tərəfindən ödənilən vəsait Elxan Məmmədovun karyerasını qurtarmaq üçün podiuma çıxarılması naminə sərf edilə bilməz.
FƏRİD
- Milli komanda2024-05-08 12:17
Millimizin gələcək baş məşqçisi Bakıya gəlir
- Ölkə futbolu2024-05-08 16:22
PFL-lə “YAŞAT” Fondu arasında anlaşma memorandumu imzalandı
- Dünya futbolu2024-05-08 12:02
“Sabah kimsə necə qalib gəldiyimizi xatırlamayacaq”
- Ölkə futbolu2024-05-09 13:53
“Azərbaycanda həm yaxşı pul qazandım, həm də hörmət”