Məsiyevin səhvinin fəsadları: Musayevin qəzəbi ikili standartlaradır

Murad Musayevin cəzası ağır olacaq. Aldığı qırmızı vərəqə öz yerində, meydana çıxması, hakimləri təhqir etməsi ona baha başa gələcək. Bu, qaçılmazdır.

Rusiyalı mütəxəssis hələ “Krasnodar”da işləyərkən də eyni hərəkətlərə yol verirdi və bu, onun karyerasına az təsir etməyib. Emosiyalara nəzarət etmək, lazım gələndə özünü yığışdırmaq lazımdır. Hakimlərin Musayevin etiraz etdiyi epizodda haqlı olduğunu nəzərə alsaq, legioner çalışdırıcıya heç cür bəraət qazandırmaq olmur.

İlk gəldiyi vaxtlar Musayevi bəyənməyənlərdən olmuşam. Amma zamanla iş baxımından davranışları bu məşqçi haqda xoş təəssüratlar oyatdı. O, sponsorların yaratdığı geniş imkanlardan sui-istifadə etmədi, deyildiyi kimi, sevimli futbolçu dəstəsini kluba doldurmadı, yalnız komandaya fayda verəcək transferlər etdi, normal komanda yaratdı. Yusif İmanov kimi qapıçını üzə çıxartması, yerli gənclərə güvənməsi, futbolumuza yuxarıdan aşağı baxmaması da qeyd edilməlidir.

İşi ilə rəğbət qazanan Musayev Şopiç, Qomes və başqa sələfləri kimi davranmadı, özünü işə verdi, nəticələr qazanmağa çalışdı. Komanda hazırda ilk “üçlük”də yerini təmin edibsə, bunu görməzdən gəlmək olmaz. Lakin heç nə Murad bəyə dünənki çılğınlığı etməsinə, meydana çıxmasına, ədalətli qərar vermiş hakimləri təhqir etməsinə haqq qazandırmır. Rusiyalının davranışı nümunəvi hərəkət deyildi.

Bəlkə də dünənki hərəkət “Qarabağ”la ötən turdakı oyundan qalma qəzəb idi. Həmin matçdakı hakim səhvini nəzərə alsaq, eyni epizoda fərqli standartın tətbiq edilməsinə əsəbləşmək olar. Oxşar penalti epizodunda “Sabah”ın lehinə cərimə zərbəsi verilmədi, dünən isə komandanın qapısına 11 metrlik təyin olundu. Fərqli yanaşmaya hirslənmək olar, lakin vulkan püşkürəcəkdisə, bu, Suraxanıdakı matçda olmalıydı, dünən qərar düzgün verilmişdi.

Daim AFFA-nı, Hakimlər Komitəsini tənqid etməyimizin səbəbi budur. Elçin Məsiyev kimi hakimlərin üzündən klublar ziyan çəkir. Onun səhvi dünənki düzü kölgə altına sala bilməz. Bəli, Musayev doğru hərəkət etmədi, amma məşqçini təbdən çıxaran oxşar epizodun hər ikisində məhz onun komandasının əleyhinə qərar verilməsidir.

Və Murad bəy bir neçə oyunluq cəzalanacaq. Qırmızı vərəqə, hakimlərin təhqir edilməsi, texniki zona qaydalarının pozulması – bütün bunlar üst-üstə qalaqlanıb cəzada əksini tapacaq. Bundan başqa, AFFA məşqçilərə hakimlər haqda danışmağı bağışlamır, əvvəlki turlarda buna görə cəzalar verilib. Musayev mətbuat konfransında ədalət təmsilçilərini tənqid etməyi də lazım bildi. AFFA bütün bunlara Məsiyevin “sövqetmə”sini unutsa, rusiyalının cəzası hətta 5 oyun da ola bilər.

Musayevin etdiklərini heç cür alqışlamaq olmaz, amma Məsiyev də unudulmamalıdır. Məhz onun üzündən “Sabah”ın mövsümlük hədəflərinə zərbə dəydi. Hakim düzgün qərar versəydi, bəlkə də “Qarabağ”la matçda qələbə qazanılacaq, həmin oyunun motivasiyasının davamı kimi “Turan Tovuz” da məğlub ediləcəkdi. Belədə “Sabah”ın çempionluğa real şansı olacaqdı. Lakin AFFA-nın sevgiylə əzizlədiyi hakim bir klubun bütün planlarını alt-üst etdi.

CAVAD