Premyer Liqanın taleyi: mayın əvvəlində qərar veriləcək!

Azərbaycan Premyer Liqasının taleyinə mayın ilk günlərində aydınlıq gələcək. Və indidən əminliklə demək olar ki, çempionatın bərpası, yekunlaşması üçün davam etdirilməsi qərarı veriləcək.

Futbolinfo.az xəbər verir ki, COVID-19 pandemiyası səbəbindən ölkədə tətbiq olunan xüsusi karantin rejimi futbol təsərrüfatına da ciddi təsir edib. Bütün yarışlar dayandırılıb, idman qurğuları bağlandığından hətta məşq etmək imkanı yoxdu. Bugündən karantin qaydalarında müəyyən yumşaldılma edilib, mayın 4-də isə vəziyyətin daha da yaxşılaşacağı gözlənilir. Hadisələr xoş axarla inkişaf etsə, idman qurğularıyla bağlı qadağa aradan qaldırılacaq.

Belədə Peşəkar Futbol Liqası klub rəhbərliyi ilə toplantı keçirərək, mövsümün qalan hissəsinin bərpası məsələsini müzakirə edəcək. Güman ki, klublara hazırlıq üçün 3 həftə vaxt veriləcək. Qalan 8 turun təqviminin dəqiqləşməsinin ardından – mayın sonunda yenidən Premyer Liqa oyunlarını izləyə biləcəyik.

Matçların azarkeşsiz keçiriləcəyi gözlənilir. PFL risk etməməlidi, virusun yenidən yayılma ehtimalı nəzərə alınmalıdı və bu səbəbdən boş tribunalar önündə futbol daha məqsədəuyğundu. Sadəcə, mövsümü yekunlaşdırmaq, avrokuboklara yollanacaq komandaları müəyyənləşdirmək lazımdı.

Mövsümün bitiminə 8 tur qaldığını nəzərə alsaq, hətta yarışların iyunda başlaması da problem olmamalıdı. Həftəyə 2 tur oynadılmaqla çempionatı yekunlaşdırmaq mümkündü. Hətta kubokda yarımfinal və final matçları da buna əngəl olmayacaq.

Avropa Peşəkar Futbol Liqalarına (EPFL) üzv liqaların nümayəndələrinin aprelin 24-də reallaşmış videokonfransında başverənlər belə yekunu proqnozlaşdırmağa imkan verirdi. Qurumun prezidenti Lars Kristen Olsen üzv liqalara çağırış edərək, şərtlər uyğun olduğu halda çempionatları tam şəkildə başa çatdırmağı tövsiyə etmişdi. Ölkədəki vəziyyət əlverişli olmazsa, ən geci 25 may tarixinədək mövcud və optimal təhlükəni nəzərə alaraq, yarışların gələcək taleyi barədə EPFL və UEFA-ya məlumat verilməlidi. Bizdə bu müddətədək vəziyyətin normallaşacağı ehtimalı böyükdü. Ona görə də Premyer Liqanın bərpa ediləcəyi şübhə doğurmur.

Təbii ki, ilk öncə Operativ Qərargahın qəbul edəcəyi qərarı gözləməliyik. Bu qurum pandemiya ilə bağlı mövcud vəziyyəti nəzərə alacaq – son günlərin statistikası isə bu baxımdan nikbinliyə əsas verir. UEFA-nın çempionatları tamamlamaq üçün tarixi ən geci iyul ayının sonu, yaxud avqust ayının əvvəli nəzərdə tutduğunu nəzərə alsaq, Premyer Liqanın yekunlaşdırılması üçün bizim imkanlarımız daha genişdi.