Qəbələdə oynamaq Turalın ürəyincə deyil: “Tam dəstək başqadır”

“Kəpəz”in yarımmüdafiəçisi Tural Rzayev komandasının ev oyunları Qəbələdə keçirəcəyi barədə qərara münasibət bildirib. Futbolinfo.az-a açıqlama verən futbolçu bunun komandasına təsir edəcəyini düşünür:

“Təsir edəcək, ona görə ki, azarkeş dəstəyindən tam yararlana bilməyəcəyik. Bilirsiz ki, Gəncədə oynamaq rəqiblər üçün çətindir. Çünki burada tərəfdarlarımızın dəstəyi ilə rəqiblər üzərində təzyiq yarada bilirik. Təəssüf ki, bundan yararlana bilməyəcəyik. Qəbələdə də azarkeşlərimiz, fan-klubumuz olacaq. Amma tam dəstək başqadır. Biz peşəkar futbolçularıq və bütün bunları unudub oyunlara köklənməliyik, xallar qazanmalıyıq”.

Rzayev Gəncə şəhər stadionunun ot örtüyünün oyunlarına mənfi təsir etdiyini də gizlətməyib: “Əlbəttə, çətinlik yaradır. Biz topla oynamağı sevən komandayıq, daha çox top saxlamağa çalışırıq. Meydança pis olanda bizim üçün də çətin olur. “Səbail”lə oyunda da buna şahid olduq. Düşünürəm ki, ot örtüyü yaxşı olsaydı, biz daha rahat qələbə qazanardıq. Meydançanın pis vəziyyətdə olması buna maneçilik törətdi”.

30 yaşlı oyunçu Misli Premyer Liqasının növbəti turunda “Turan Tovuz”la oynayacaqları Qərb derbisindən də söz açıb: “Çox istəyərdik ki, oyunu Gəncədə keçirək. Amma edəcək bir şey yoxdur. Vəziyyətdən asılı olmayaraq, oyuna köklənmişik. Hamı matçın əhəmiyyətini dərk edir. Bu mövsüm “Turan Tovuz” üzərində qələbəmiz yoxdur. Bu uğursuzluğu da qırmağa çalışacağıq. Tam olaraq hazırlaşmırıq. Qələbə həddən artıq vacibdir. Bundan başqa, “Turan Tovuz”dan sonra finala bərabər 3 oyunumuz var. Xallar çox əhəmiyyətlidir. Hamısı bizə yaxın olan rəqiblərdir və çempionatda qalmaq üçün onları udmaq önəmlidir”.