Rəfiyevin biznes obyekti… ona bir həftəyə 26 min dollar qazandırdı

Mətbuatda “Sumqayıt”la bağlı bircə xoş xəbərə rast gəlməzsiz. Ötən mövsümün ən bərbad klublarından biri yay fasiləsinə çıxanı kölgəyə çəkilib.

“Kimyaçılar”da yeni mövsümlə bağlı planlar bəlli deyil. Komandanın necə güclənəcəyi, harada hazırlaşacağı dəqiqləşməyib. Baş məşqçi istirahətdə, rəhbərliyin isə başı komandanın heyətini dağıtmağa, öz imkanlarını yaxşılaşdırmağa qarışıb.

Təsəvvür edin, “Sumqayıt”ın ciddi güclənməyə ehtiyac duyduğu bir zamanda, klubun menecer-prezidenti Riad Rəfiyev ən yaxşı futbolçularını başqa klublara pulsuz göndərir. Mövsümün bitimi ərəfəsində Ukraynada başverənlərdən istifadə edilərək havayı gətirilən Anatoli Nuriyev “Sabah”a, Rəhim Sadıxov “Zirə”yə göndərilib.

Nuriyev “Sabah”a satılmayıb, o, “Sumqayıt”ı azad agent kimi tərk edib. “Kimyaçılar”ın düşərgəsində cəmi 1 ay vaxt keçirən futbolçu il ərzində 3-cü iş yerinə yollanıb. Müharibə səbəbindən ukraynalı futbolulara güzəşt edildiyindən burada problem yoxdur. Amma məsələ ondadı ki, Rəfiyev bu vəziyyətdən də öz məqsədi üçün istifadə edib. Nuriyevi kluba bağlamaq, onu satıb pul qazanmaq əvəzinə, Anatoli azad agent kimi “Sabah”a yollanıb. Təbii ki, əvəzində Riad bəy özü yaxşı menecer haqqı alıb.

Sadıxovun “Zirə”yə keçməsi də klubun maraqlarından çox öz qazancını düşünən Rəfiyevin işinə yarayıb. Yenə azad agent kimi özünə klub tapan daha bir futbolçu keçmiş klubunu yox, menecer-prezidentini varlandırıb. Hər iki transferin komisyon haqqı başqa menecerə ödənilibmiş kimi göstərilsə də, keçidlər 3R şirkəti (Rəfiyev Riad Rasim oğlu) vasitəsi ilə reallaşıb.

Rəfiyev təkcə bu 2 transferdən 26 min dollar menecer haqqı qazanıb. Təxmnən 45 min manatı bir həftəyə əziyyət çəkmədən qazanan Riad bəyin “Sumqayıt”a biznes obyekti kimi baxdığı aşkar görünür. Bu şəxsin illərdi bu işlərlə məşğul olduğunu, hər transfer dövründə bir neçə belə və daha bahalı əməliyatlar reallaşdırdığını nəzərə alsaq, necə rahat milyonçu olduğu aydınlaşar. Onun bir həftəyə qazandığını həkimlər, müəllimlər, alimlər bir ilə qazanmır. Deməli, oxumaq yox, arxalı olmaq daha vacibdi.