Seriyaların bitdiyi, ümidlərin davam etdiyi tur

Azərbaycan Premyer Liqasında sona 9 oyun qaldı. “Qarabağ”la “Sumqayıt” bu həftə təxirə salınmış matçlarını reallaşdırdıqdan sonra komandaların matç sayı bərabərləşəcək və qalan 2 tur reallaşacaq.

Çempion “Qarabağ”, gümüş medalçı “Neftçi” üçün hər şey aydındı. Son 2 turda əsas məsələ Konfrans Liqasına vəsiqələrin taleyinin müəyyənləşməsi olacaq. “Zirə”yə vəzifənin həlli üçün cəmi 1 xal kifayət edirsə, “Sabah”la “Qəbələ” sonadək ölüm-dirim savaşı aparacaq.

“Qarabağ” 2022-ci ildəki məğlubiyyətsiz oyunlar seriyasını davam etdirir. Amma Qurban Qurbanovun yetirmələri ardıcıl 2 ev oyununda heç-heçə etməklə avrokuboklar mübarizəsinə təsir etdi. Çempionluğu təmin etdiyi görüşdə “Sabah”ı, son turda “Zirə”ni yenməyən ağdamlılar “Qəbələ”nin ümidlərini puç etdi. Lakin buna görə “atlılar”ı qınamaq olmaz. Ağır qrafikdə heyətdə rotasiyalar edilir, bütün futbolçulara oynamaq imkanı yaradılır. Digərlərindən fərqli olaraq, mayın 27-dək ağdamlılar daha 4 matça çıxmalıdı.

“Zirə”nin rəqibin zəif heyətlə oyunda qazandığı bir xal işinə yaradısa, “Sabah” “Səbail”lə səfər matçında büdrəmədi. Əvəzində “Qəbələ” evdə “Neftçi”ni çətinliklə yenib vəziyyətini düzəltdi. Son turda baş tutacaq “Qəbələ” – “Sabah” matçında avrokuboka son vəsiqənin taleyi həll oluna bilər. Bunun üçün Murad Musayevin yetirmələri növbəti görüşündə də mütləq qalib gəlməlidi.

“Neftçi”nin məğlubiyyətsiz seriyasının bitməsi də qeyd edilməlidi. Bakılılar ardıcıl qələbələrə rəğmən, son oyunlarda yaxşı futbol sərgiləmirdi. Nəhayət, Qəbələdə bəxt limiti tükəndi.

“Sumqayıt”ın 6 aydan sonra evdə qol orucunu pozub ilk qələbəsini qazanması da qeyd olunmalıdı. 15 oyunluq uğursuzluq seriyasının bitməsi Aleksey Baqanın da nəhayət, Azərbaycanda siftə etməsinə səbəb oldu. Əvəzində “Şamaxı”nın bəd seriyası davam edir – komanda adını dəyişdikdən sonra hələ ki, azarkeşlərini sevindirməyib. Dünən 2-ci turdan davam edən susqunluğunu pozan Əli Qurbaninin dublu bakılıların ciddi problemlərinin olduğunu göstərdi. Mərkəz müdafiəçilərinin oxşar epizodlarda hücumçuya mane ola bilməməsi “Şamaxı”da məşqçi işinin olmadığını göstərdi. Müvəqqəti çalışdırıcı Rüstəm Əliyev bu durumda postda qalıcı olacağına ümid belə etməməlidi.

Növbəti məğlubiyyət “Səbail”in son pillədən qurtulmaq ümidlərinə böyük zərbə vurdu. Düzdü, hələ şans var, amma çətin ki, “Sumqayıt” 3 xallıq fərqi qapatmağa imkan versin. Mövsümün qalan oyunları əsasən Konfrans Liqasına son 2 vəsiqənin müəyyənləşməsi baxımından önəm daşıyacaq.

FƏRİD