"Xəzər Lənkəran"ın seleksiyaçısı Mario Souza İngiltərənin "Çelsi" klubunun portuqaliyalı baş məşqçisi Joze Moгrinyo ilə görüşüb. Futbolinfo.az xəbər verir ki, "ağ-yaşıllar"ın sabiq futbolçusu bu barədə klubun rəsmi saytına fikirlərini bildirib:
"Əlbəttə, bu, çox vacib bir hadisə oldu. Görüşün vasitəçisi keçmiş futbolçu, hazırda agent fəaliyyəti ilə məşğul olan məşhur Derley oldu. O “Portu”da Jozenin rəhbərliyi altında çıxış edib və indi də onunla əla münasibətləri var. O ki qaldı Derleylə münasibətimizə, biz onunla uşaqlıq dostlarıyıq”.
Souza belə bir görüşün həm “Xəzər Lənkəran” üçün, həm də onun özü üçün vacib olduğunu bildirdi: “Komandanı bu səviyyədə təmsil etdiyim üçün çox qürurluyam. Derley artıq “Xəzər Lənkəran” haqqında geniş və tam təsəvvürə malikdi. Onunla komanda haqqında, burada oynaya biləcək oyunçular barəsində daim fikir mübadiləsi aparırıq. Mourinyo ilə görüş əsnasında da “Xəzər Lənkəran” haqqında ayrıca söhbət etdik, öz işim barədə ətraflı məlumat verdim”.
Hazırda isə Mario Portuqaliyadadı: “Ötən ay Cənubi Amerika ölkələrində oyunları izləyib, klub rəhbərləri ilə görüşlər apardım. Qısamüddətli London səfərindən sonra isə Portuqaliyadayam. Zon Saqreş Liqasının bir neçə oyununda olacam, gedəcəyim oyunların siyahısını hələ Braziliyada olduğum müddətdə hazırlamışam. Bu ölkədə də görüşlərim olacaq. Bilavasitə klub işləri ilə bağlı görüşlərlə yanaşı, dünyanın bir nömrəli futbol agenti Jorje Mendeşlə də söhbətimiz olacaq. Həftənin sonunda isə artıq San Paoloda olmalıyam”.
