İsveçrəli jurnalistlər “Qarabağ”ı daha şanslı sayır: “Bakıda hesab 3:0, 4:0 olmalı idi”

Azərbaycanın ən uğurlu klubu “Qarabağ” Çempionlar Liqasında çıxışını davam etdirir. Qurban Qurbanovun komandası “Lex” üzərindəki inamlı qələbədən sonra İsveçrə “Sürix”ni də Bakıdan məğlub yola saldı.

“Köhlən atlar” isveçrəlilərə qalib gəlməklə növbəti mərhələnin qapısını az da olsa, araladı. Qaldı səfərdə lazımi nəticəni əldə etmək.

“Sürix” isə ölkə çempionatında uğursuz çıxışı ilə diqqət çəkir. Elə isveçrəli jurnalistlər də komandanın bu durumundan narazıdır. “Futbolinfo”ya açıqlamasında onlar ağdamlıları üstün saydıqlarını bildirib.

“Corriere del Ticino” nəşrinin əməkdaşı Marsello Pelizzari “Qarabağ”ı üstün sayır: “Bu matç haqqında çox böyük xəbərlər yoxdur. Komanda sadəcə, çempionatda mübarizə aparır. Deyəsən, onlar bir az komanda ruhunu və tempi itiriblər. Sanki birlikdə necə oynamaq lazım olduğunu unudublar. Əsas problem Dumbiyanın yayda “Luqano”ya azad agent kimi getməsidir. O, komandanın əsas futbolçusu idi. Dumbiya ayrıldıqdan sonra onun yerini doldurmaq və problemi həll etmək yolunu tapa bilmədilər. Digər problem isə ötənilki baş məşqçi Andre Braytenrayterin “Hoffenhaym”a yollanması oldu. İndi bir az qarışıqlıqdı. “Qarabağ”la bağlı burada xəbərlər var. Hər kəs “Sürix”in 2:3 hesablı məğlubiyyətlə canını qurtarmasına komandanın şansı kimi baxır. Hamı düşünür ki, Bakıda hesab 3:0, 4:0 olmalı idi. Ola bilər ki, “Sürix” həm də UEFA Çempionlar Liqasına görə çempionatı ciddiyə almır və ilk oyunlarda inamsız çıxış etdilər. Burada azarkeşlər komandaların şanslarını 50/50-yə düşünür. İsveçrədə hər kəs düşünür  ki, Avropada yaxşı çıxış edə biləcək klublar “Bazel” və “Yanq Boyz”dur. “Sürix”in qitə oyunlarında təcrübəsi yoxdur. Üstəlik, “Qarabağ” qələbələrə ac və təcrübəli komandadır. Mənim şəxsi düşüncəmə görə, “Sürix” “Qarabağ” səddini keçə bilməyəcək. Amma futbolda hər zaman fərqli nəticələr olur”.

“Tamedia” nəşrinin jurnalist Oliver Zihlmann da “Qarabağ”ı şanslı sayır: “Açığı, “Sürix”i çox izləmirəm, amma çempionata bərbad başladılar. Azarkeşlər təbii ki, paytaxt təmsilçisindən qələbə gözləyir. Düşünürəm ki, “Sürix” evdə qələbə qazana bilər. Amma şəxsi fikrimə görə, “Qarabağ” mərhələni keçmək üçün daha şanslıdır”.

AĞA