Mühəndis-konstruktorla… “Səbail”də görəcək günlərimiz var

Rauf Vəliyev adını yadınızda saxlayın, barəsində qarşıdakı aylarda xeyli xəbər eşidəcəksiz. Düzdü, o, ictimai-siyasi mətbuatın tez-tez yada saldığı simadı, lakin bundan sonra idman mediasında da çox görünəcək. Və onu qalmaqallı klub rəhbəri, əcaib qərarların müəllifi kimi gündəmə düşən görəcəyik.

Rauf bəy Leninqrad Su Nəqliyyatı İstitutunun məzunudu. O, müxtəlif illərdə “Xəzər Dəniz Neft Donanması” İdarəsinin idarəetmə aparatında mühəndis-konstruktor, gəmi tikintisi üzrə nəzarət qrupunun mühəndisi, qrup rəhbəri, İdarənin xarici əlaqələr şöbəsinin rəisi, İdarə rəisinin xarici əlaqələr üzrə müavini vəzifələrində işləyib. Daha sonra Azərbaycan Respublikası Dövlət Neft Şirkətinin aparatında Donanma ilə iş üzrə şöbə rəisi, ARDNŞ-nin Baş ofisində Nəqliyyat İdarəsinin rəisi vəzifəsində çalışıb. Vəliyev 2013-cü ilin oktyabrında “Azərbaycan Xəzər Dəniz Gəmiçiliyi” Qapalı Səhmdar Cəmiyyətinin sədri təyin edilib.

Rauf bəyin karyerasında nəinki futbol, ümumiyyətlə, idmanla bağlı kiçik bir qeyd görmədiz. Amma bu şəxs artıq “Səbail”in əsas idarəçisidi. Bayıl təmsilçisinə ASCO – “Azərbaycan Xəzər Dəniz Gəmiçiliyi” Qapalı Səhmdar Cəmiyyəti sponsorluq etdiyindən klubun darəçiliyi də bu şəxsdədi.

Əvvəllər futbolla bir o qədər maraqlanmasa da, bu ildən “Səbail”ə ciddi diqqət göstərməyə başlayıb. Komandanın oyunlarına gəlir, futbolçu və məşqçilərə ciddi vədlər verir, sonra da dediklərini unudur. Baş məşqçi Aftandil Hacıyevlə yeni müqavilə bağlayan, 10 gün sonra anlaşmanı pozmağı əmr edən də bu şəxsdi. Yəni, bu qədər “peşəkar” biridi.

Rauf bəy futbolçularla görüşündə özünü elə aparıb ki, oyunçular başlarını salamat qurtarmaq üçün aradan çıxmağı lazım bilib. Nikolas Raysel saytımıza açıqlamasında “Mən “Səbail”də qalmayacam. Bu klubda heç nə peşəkar deyil. Ora qayıtmaq haqqında heç bir düşüncəm yoxdur. Bu, şəxsi seçimdir. Mənə yaxşı komanda, peşəkar komanda və yaxşı atmosfer lazımdır” deyibsə, Adil Nağıyev yaxşı təklifə rəğmən, klubu tərk edib. Komandayla danışıq aparan bir çox futbolçular fikrini dəyişib, heyətdəkilər də qaçmağa yer axtarır.

Vəliyev diktator rəhbərlərdəndi. O, şəraitə, komandasının, rəqiblərinin gücünə baxmadan bütün oyunlarda qələbə istəyir, məğlubiyyətlərdən sonra özünü Zaur Axundov kimi aparır. Uğuru istəmək yaxşı xüsusiyyətdi, amma “Zapı”yla “Ferrari”ni ötməyi tələb etmək xam xəyaldı.

Maraqlıdı ki, Vəliyev məşqçi və futbolçuların təkliflərinə əsasən komandanı gücləndirməyi vəd edib, hətta 15 milyon manatlıq büdcə söz verib, lakin iş yeni mövsümün heyət quruculuğuna çatanda fikrini dəyişib. Bu qədər dəyişkən fikirli olması ciddiliyinə kölgə saldığından futbolçular normal klub axtarışına başlayıb, Aftandil Hacıyevlə yollar ayrılıb.

Ola bilsin, klubu maliyyələşdirmək üçün ASCO ilə “Braxon” arasında var-gəl etdiyindən belə vəziyyət yaranıb. Amma o dəqiqdi ki, qarşıdakı mövsümdə bu şəxsdən çox tez-tez bəhs edəcəyik. Onun mətbuatı yaxşı xəbərlərlə məşğul edəcəyinə ümid edirik. Yoxsa Xəzər dənizinin, okean sularının hakimi futbol dənizində boğulacaq.

CAVAD