Ölkə futbolu
Bolqar bibəri
Azərbaycan Premyer Liqasında hər zövqə görə məşq&cced…
Azərbaycan Premyer Liqasında hər zövqə görə məşqçi olub. PRO kateqoriyali məşqçilərin işsizlikdən it döydüyü bir vaxtda PROsuz PROfessor, “PROvokasiya”sına “PROb” qoyduğumuz, problemli Böyükağa Hacıyev; Lənkəranı velosipedlə dolaşan, özünü ölkəmizə turist qismində gəlibmiş kimi aparan, karyerasının kölgəsində yatıb milyonlar qazanan Con Toşak; pul yeyən “banda”sıyla gəlib bir zada dərman olmayan Bojidar Bandoviç; “stilni” saçından başqa nə iləsə yadda qalmayan Vinfred Şefer; Bin Laden kimi Naci Şensoy; hərəkətləri ilə hamını dəli edən Hans-Yürgen Gede ilə birbaşa dəlixanaya yollanan Vlastimil Petrjela; qaraçı ənənələrini stadionda pişik saxlamaqla yaşadan Mirça Rednik; gürcü işbazların idarə etdiyi Kaxaber Sxadadze; pivə butulkasyla yatan Toni Adams; “vurmaqda” ondan geri qalmayan cizgi filmi qəhrəmanı Yuri Syomin və daha kimlər, kimlər…
Gözünüz aydın, biri də gəlir. İndidən özünü naza qoyan, gəlməmiş oyunbazlığa başlayan İvaylo Petev də futbolumuzda özünəməxsus iz qoyacaq. Ümid edirik ki, nəticələri ilə özündən söz etdirəcək, ondan tez-tez söz salmağımıza səbəbkar olacaq, daha davranışları, məntiqsiz açıqlamaları ilə yox. Amma bu adam hələ ki, işlədiyi komandalarda qazandığı az-çox uğurlardan elə məst olub ki, indidən özünü tələbolunan və vazkeçilməz biri kimi göstərməkdən zövq alır. Ola bilsin, “Qəbələ” ilə müqavilə bağlamaq üçün razılaşdığı məbləğ onun bir az da göylə getməsinə səbəb olub, elə bilir ki, AEL-də qala biləcəyini deməklə və ya “Botev”lə danışıq apardığını gizlətməməklə qiymət qaldırır. Kəsəsi, işə başlamasa da, oyuna başlayıb.
Bizimkilər İran, Rusiya, Ukrayna, Türkiyə klublarında dəstək vermək əvəzinə bir-birinin ayağının altını qazırdısa, Petev gəlməmiş onun həmyerlisi Georgi Nikolov reklama başlayıb. “İnter”in bolqar prezidenti ölkə mətbuatına açıqlamasında onun 5 hücumçuyla oynamasından, iş bacarığından elə bəh-bəhlə danışıb ki, sanki Qurban Qurbanov qoyun otarmaqla, Böyükağa Hacıyev ağac dibi belləməklə, Tərlan Əhmədov turp satmaqla məşğuldu. Con Toşak, Mustaga Dənizli, Yuri Syomin də zəhmət çəkmədən, tək ayaqla çempion olmağa gəlmişdi, əlləri ətəklərindən uzun qayıtdılar. Ona görə də bolqar bibərinin şirinliyindən dastan açmaq lazım deyil. Onun hansı qazanda bişəcəyini aşbazlar yaxşı bilir.
Düzü, Petevin dosyesinə ilk dəfə baxanda heyrətlənmiş, “Qəbələ”nin doğru birini seçdiyini düşünmüşdüm. Amma İvaylonun adı ətrafında gəzən son söz-söhbətlər bir qədər tərəddüdümə səbəb olub. O, mənə ağır atletikamızda bolqarların hoqqalarını, ümumiyyətlə, bu ölkənin nümayəndələri haqda gəzən mifik nağılların boşuna olmadığını xatırladır. Fırıldaq, işbazlıq sanki bunların vizit vərəqidi. Düzdü, Nikolov ölkəmizdə çalışdığı illər ərzində işi və alicənablığı ilə tamam fərqli təəssürat yaradır, “hər yerin pisi də, yaxşısı da olur” kimi Azərbaycan deyimini yada salır. Ancaq nədənsə İvaylonun addımlarından sonra tərəzinin bir gözünün daha ağır gəldiyini müşahidə edirik. Sanki bibər satmaq üçün yaxşı bazar tapılıb. Gərək kimsə Petevə xəbərdarlıq etsin ki, Qəbələdə son aylara kimi radiolokasiya stansiyası olub və hələ də qalan şüanın təsirindən əkdiyimiz şirin bolqar bibəri yetişəndə acı dada bilər.
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”