Müsahibə
Tərlan Əhmədov: "Mən belə komanda istəmirəm"
AZAL-ın baş məşqçisi Tərlan Əhmədov ötən gün …
AZAL-ın baş məşqçisi Tərlan Əhmədov ötən gün keçirilmiş "İnter"lə yoxlama oyunundan sonra jurnalistlərin bəzi suallarını cavablandırıb. Futbolinfo.az sizi həmin müsahibə ilə tanış edir:
– Çempionatın başlamasına az qalıb. Komandanız yeni mövsümə nə dərəcədə hazırdı?
– Bolu toplanışından qayıtdıqdan sonra komandaya 3 günlük istirahət vermişdik. Komanda hələ tam yığışmayıb. Bolqarıstanlı futbolçumuz Tomu gözləyirik. O, sabah komandaya qoşulacaq. Viza problemi vardı. Ona görə gecikirdi. Üç günlük fasilədən sonra məşqlərə başladıq. Bu yoxlama görüşünü də ona görə keçirdik ki, görək Bolu toplanışından sonra hansı boşluqlarımız, çatışmazlıqlarımız var. Həmin çatışmazlıqları aşkarlayıb, bir həftə ərzində onun üstündə işləyəcəyik. Əsas odu ki, birinci oyuna uğurla başlayaq. Bu yoxlama oyununda da müəyyənləşdirdik ki, hansı boşluqlarımız, səhvlərimiz var. Yəqin ki, qarşıdakı oyuna qədər bu çatışmazlıqları aradan götürərik.
– Boşluqlar, çatışmazlıqlar çoxdu?
– İstər-istəməz hər oyun boşluqlar, çatışmazlıqlar olacaq. Səhvləri düzəldə-düzəldə inkişaf gedir. Biz istədik-istəmədik, onsuz da , bu boşluqlar olacaq. Qarşıdakı rəqib də güclü idi, taktika ilə qarşıdakı komandanı boşluqlar yaratmağa sövq edir. Çalışacağıq ki, bizi düşündürən boşluqları aradan götürək.
– Yeni transferləriniz oldu. Həmin futbolçular komandaya öyrəşə biliblərmi?
– Yox. Bugünkü oyunda gördüm ki, hələ tam adaptasiya olmayıblar. Hələ ki vaxtımız var. Düşünürəm ki, birinci oyuna kimi tam adaptasiya olacaqlar.
– Premyer Liqanın ilk turunda “Xəzər Lənkəran”la qarşılaşacaqsız. Rəqibin son oyunlarını izləyə bilmisizmi?
– Yox. Son oyunlarını izləyə bilməmişik. Çünki onlar Sloveniyada, Avstriyada olublar. Həmişə birinci, ikinci oyunlar ağır olur. Çalışacağıq ki, ilk oyunda qələbə qazanaq, qələbə ilə başlayaq. Qismət amili də var. Çempionatı kiminlə başlamaq önəmli deyil, əsas odu ki, uğurla başlayaq.
– Bugünkü oyunu “Xəzər Lənkəran”ın baş məşqçisi Oğuz Çətin də izlədi, qeydlər götürdü…
– Olsun. Bu, onun işidi. Hər bir məşqçi həmişə oynayacağı rəqibin oyununu izləyir. İndi biz də çalışacağıq, rəqibin Sloveniyada keçirdiyi oyunların kasetini əldə edib, izləyək. Yenə deyirəm, biz evdə oynayacağıq. Çalışıb, elə taktika ilə meydana çıxacağıq ki, qələbə qazanaq.
– Avqustun sonuna kimi transfer pəncərəsi açıqdı. Komandaya yeni transferlər edəcəksizmi?
– Ola bilsin ki, olsun. Hücum xəttinə bir futbolu almaq istəyirik.
– Hazırda danışıqlar apardığınız futbolçu varmı?
– Var. Bir-iki futbolçu var ki, biz artıq onları izləyirik. Ola bilsin ki, yaxın günlərdə komandaya qoşulsunlar.
– Bu mövsüm, demək olarki, komandanı yenidən qurursuz. Təxminən neçənci tura kimi AZAL tam olaraq özünü göstərə biləcək?
– Deyə bilmərik ki, təxminən, bir, yaxud beş turdan sonra yaxşı olacağıq. Biz istəyirik ki, uğurla başlayaq və komanda oyundan oyuna inkişaf etsin. Biz münəccim deyilik ki? Onu Nostradamus deyə bilər. Biz məşqçilərdə başqadı. Heç kim deyə bilməz ki, komanda bir turdan sonra necə olacaq, yaxud hansı rəqiblə necə oynayacaq. Sadəcə, biz istəyirik ki, oyundan oyuna inkişaf edək və çempionatın sonunda da uğurlu nəticə qazanaq.
– Əvvəlki illərdə AZAL şempionata yaxşı başlayırdı, amma sonradan komandada çöküş olurdu. Bu mövsüm necə olacaq?
– Bayaq da dedim ki, çalışırıq ki, oyundan oyuna inkişaf edək. Mövsümə yaxşı başlayıb, pis bitirən komandanı istəmirəm. Mən istəyirəm ki, komanda oyundan oyuna inkişaf etsin və çempionatı uğurlu nəticə ilə başa vursun. Ötən mövsüm üçüncü, dördüncü dövrədə komanda, ümumiyyətlə qələbə qazana bilmədi. Komandanın aktivində cəmi 7 heç-heçə vardı. Mən belə komanda istəmirəm. İstəyirəm ki, get-getə artırsın və yer uğrunda mübarizə aparsın.
– Hədəfiniz nədi?
– Birinci-dördüncü yerlər uğrunda mübarizə aparacağıq. Çempionat dörd dövrədi. Buna nail olmaq asan da olmayacaq, amma hədəfimiz Avroliqaya düşməkdi.
ELMAR VƏLİYEV
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”